由唔知幾時開始，小販檔幾乎絕跡香港，就連農曆新年限定的桂林街夜市都被殲滅，試問香港人仲可以去邊掃街？難道就要日日食老麥、大快樂？幸好每年 5 月青衣市政大廈旁的空地都有兩大節日，除了睇台上的人做大戲，感受粵劇文化外，最重要的就是台下的熟食檔。雖然不再是一車車拖出來，但仍然充滿小販檔的風味，岩晒依莉詩這些鍾意掃街的人！昨日是真君大帝寶誕的最後一日，小編就把握機會去巡視左一次，兼且記下左幾個要點，等 unwire 的讀者為 18 至 22 號的天后誕作準備。
T-SHIRT、短褲，忌踢拖
昨晚的天氣幾乎 30 度，而且仲好多人，加埋燒烤、炒嘢的油煙，環境都幾悶熱同焗促，好快就會流晒大汗，所以最好就著件就快唔要的 T-SHIRT 同短褲去。不過就千奇唔好著拖鞋，因為人太多，而且又係泥地（雖然沒有品酒節咁嚴重），但比人踩到腳趾尾就唔好啦！另外，最好就孭背囊，可以空出雙手，一隻手捧野食，另一隻手拮。
擇好時晨，愈夜愈多人
下次 18 至 22 號都是平日，所以唔洗擔心星期六日特別多人，但最好都不要太夜才去掃街啦，否則愈夜愈多人事小，好嘢食賣晒事大！小編昨晚放工去到未到 8 點，最出名的鑽鑽西瓜已經賣晒，未夠 9 點連燒生蠔都賣晒啦。所以不但要早去，而且要襯少人的時候先了解清楚最搶手的食品位置，再決定排邊條隊先。
▲ 未夠 9 點連燒生蠔都賣晒啦 ！嗚…小編仲未排到呀！
揀好目標，邊食邊排隊
▲ 如果每買一檔都停低食的話，一晚可能只食到一兩檔。
▲ $25 串的燒鮑魚可以說是燒生蠔外的必食推介。
▲ 沙嗲和充滿孜然粉的串燒都相當好味！
▲ 自從家樂坊對面的臭豆腐唔再臭，已經好耐無食過真正的臭豆腐啦！
▲ 魚蛋始終都是一串串的先夠地道！
大大碟，豬朋狗友一齊 share
▲ 煎蠔餅大大塊，一個人真係未必食得晒。
▲ 原條燒茄子，睇到都流口水。
邊行邊飲，消暑解熱氣
掃街的小食大部份都是煎炸野，非常熱氣，加上天氣炎熱，就算未口渴都好，最好經過就買定個椰皇、西瓜或者涼茶，邊行邊飲，咁就算排排下隊口渴都有野飲下。
▲ 記得帶定個細袋袋住個椰皇呀！（唔好好似小編個朋友咁，為左空隻手食野而放個椰皇入布袋呀！）
▲ 最佳的消暑恩物是非常懷舊的菠蘿冰。
▲ 連最近流入香港的韓國小食鯛魚燒雪糕都有呢！（雖然好似簡單左 D，無晒 D 朱古力醬同提子）
必吹，上 Facebook 呃 like
來到戲棚，當然要懷舊一下。這個用糖做的吹波波就一定要玩下。吹得夠大仲可以放上 Facebook 呃 like 添！
▲ 小朋友都好鍾意玩呢！
▲ 要在糖未凍之前輕輕力吹，唔好一次過大力吹，唔夠就會穿啦！
保持清潔，小心垃圾山
最後，吃喝玩樂當然開心啦，小編亦都好支持夜市的出現，既可以保留昔日小販檔的特色，又可以有多一個食堂給市民選擇，真的希望每區都可以有受規管的夜市出現。不過看到這些垃圾，不禁有點心痛。想不到只是數天的晚上已經可以製造這麼多的垃圾。小編覺得如果可以參考一下台灣的夜市，以紙碗來代替發泡膠裝食物，可能會更加好。
▲ 檔口同檔口中間都有好多垃圾，經過的時候要小心竹籤拮到腳呀。
▲ 想不到只是數天的晚上已經可以製造這麼多的垃圾。
地址：青衣青綠街 38 號青衣市政大廈旁
日期：5 月 18 ﹣ 22 日
時間：7:30pm – 12:00mn
