每次惡劣天氣一來，我就會醒起中學時努力讀書的目標：入天文台做天氣觀測。
當然後來就係讀得唔夠好，而且 Physics 很差，所以不能揀相關科目*黎讀… 所以就冇得做… 所以我就退而求其次！諗住轉行做報天氣，即係做天氣小姐（大笑）。
*相關科目有：Physics, Earth Science, Mathematics 等等
▲報天氣唔使用 Rap 的速度架，太快就聽唔到佢講咩架啦～
唔知大家細個屋企係咪好似我咁，睇新聞一定要睇埋天氣先叫睇完？呢個習慣令我好細個就成為天氣報告的忠實擁躉，而且仲會係屋企同天氣小姐鬥讀字幕同埋報天氣，所以要一定要認得晒啲天晴、明朗、多雲、有霧、有驟雨、有雨、有雪、有雷暴等等公仔，仲有個啲紫外線指數，空氣污染指數同空氣質素健康指數等等，一定要讀熟，唔係就會輸（細個就係咁無聊…）。
報天氣仲有一啲術語，天氣圖中，可以睇到高壓脊呀，低壓槽呀，冷鋒呀等等，一啲主要天氣資料。仲有啲大家應該有聽過，但唔為意，例如，「初時有零散大驟雨」即係幾時？「稍後時間轉趨天晴」即係幾耐之後？微風、和緩 同清勁的風即係幾大風？
天氣報告所有用字都好講究同精準，仲有最緊要兩個字：「預料／預測」。都話「天有不測之風雲」，氣象嘅野，話變就變，天文台又好，天氣報告都好，邊有反應得咁快。尤其是主要天氣報告一日得兩三次廣播（唔計互動新聞台），所以點解啲人成日話唔準，就係咁解：誤差太大。氣象秒秒在變，你以為琴晚睇定今日個天氣實冇死？但一晚可能已經唔同晒。
好似啱啱星期一佛誕個日咁，你以為天文台唔準，又話落雨點知日頭藍天白雲，搞到失左預算冇入到長洲睇飄色；到你懶醒入左長洲以為天公造美有得睇埋搶包山，點知落大雨，取消埋。
唔想咁樣，可以點樣？
其實而家咁方便，只要你有下載天文台隻 App，基本上隨時可以自行預測降雨。但如果你同我一樣覺得天文台隻 App 好樣衰，可以用其他天氣 Apps＊，例如港女就係用緊 HK Weather 嘅，隻 App 入面有雷達雲圖，天文台每 12 分鐘更新一次，仲可以動畫序列方式收看，咁就可以知道啲雨雲的移動速度同方向啦！
＊注意：隻 App 一定要用天文台的 Open Source 先準，電話 built-in 個啲多數都唔準
▲呢張係香港 64km 範圍內的雷達圖，仲有 128km 同 256km 版 Source：天文台
就拎返佛誕當日傍晚張雲圖黎睇，首先你要搵到香港，跟住睇到香港的 64 公里範圍內的北面有一大 pat 雲，右邊的 scale 就話埋俾你知各種顏色代表的雨量，用動畫睇的話，更加會見到上面個Pat野係向住香港慢慢移落黎，所以聰明的你就會知個晚一定會落大雨。當然你預計唔到會取消搶包山，但見到個勢，你可以提早決定走定留低丫嘛。
如果你覺得個 scale 太複雜，你可以學下我咁理解：
藍色：微雨，唔帶遮都 ok
深綠：會淋得濕，但都可以唔擔遮
淺綠：中雨，帶定遮穩陣，因為旁人會開遮，而且會滴濕你
黃至橙：有雷暴，大雨，踢拖，或帶多對鞋，著短褲，有得揀最好唔好出街
紅：落狗屎，唔好叫我出街，擔遮都冇用
再上：可能會好似上年3月尾咁落雹，揼死冇命陪
其實天文台仲有好多實用的氣象資料，只不過佢地成日收收埋埋，又唔好好利用佢黎向市民大眾解釋現象。大家有興趣可以自行上去佢地個網頁度發掘下黎研究，都幾有趣架～
參考：地下天文台長訪問
分享到 :
最新影片
