今日的 Google I/O 2015，Google 就宣佈將會推出新版本的 Android Wear，加入了不少新功能，而且更加似番隻錶！以下就讓 Edward 同大家該點講講：
長開芒睇時間唔洗 fing 手
而家的 Android Wear 手錶，為了省電，當閒置時熒幕會關掉，而要睇時間或者睇有咩新 messages 時，就要 fing 一 fing 手腕先可以開得番。新版本的 Android Wear，Google 加入了 Always-on Screen 功能，熒幕會長著，讓大家唔洗 fing 手都可以隨時睇到時間，十分體貼！
長開 APPS 既省電又方便
Always-on Screen 唔止令大家可以隨時睇到時間，Google 亦加入 Always-on Apps 功能，只要軟件支援，當大家開了 APPS，閒置時就會以黑白模式長著在熒幕上，更方便大家隨時睇信息。例如：當大家去買嘢之前 build 了一張購物清單，只要顯示了在錶上，閒置時清單仍會以黑白模式顯示在熒幕上，這樣大家購物時就更方便睇清單了。據 Google 在大會中表示，現時已有超過 4,000 款程式支援 Android Wear，而當中的 Foursquare、Citymapper、Uber、Nest 等已能支援 Always-on Apps 功能，令大家可以更方便在手錶上使用程式。
全新手腕手勢操控睇信息更方便
Google 亦加入了全新的手腕手勢操控 Wrist Gesture，當有一堆新信息或提示時，只要手腕向上轉一轉，就會跳到下一單信息或提示，令大家唔洗掂熒幕都操控得到。
可手畫傳送 emoji 給朋友
而信息回覆方面，Android Wear 亦加入了新功能，就是手畫傳 emoji。方法是當回覆信息時，只要選擇 send emoji，然後手畫相關圖案（例如：想約朋友去飲酒就畫隻酒杯），然後手錶就會出現相關 emoji，再選擇後就可以傳送給對方，超級方便又夠 fun！
朋友清單隨時溝通唔怕無朋友
最後一項新功能，就類似 Apple Watch 的朋友清單。只要在手錶上開啟了此功能，就可以隨時與朋友溝通，甚至傳送 voice messages 給朋友都可以，超級方便！
更多感應器應用更廣泛
最後 Google 亦預示了未來新的 Android Wear 裝置可以有什麼功能，從設計圖可見未來會在手錶或其他穿戴式裝置上加入更多感應器及咪高峰，配合不同的 APPS，可以有更多功能，例如：配合 Google Fit 可以記錄不同運動進度、配合打 golf APP 可以感應運動員的揮球棍動作、配合 Shazam 可辨識音樂、配合汽車程式可以瀏覽汽車狀況甚至泊車地點等，十分強勁。
