近年主攻運動及生活監測的穿戴式裝置越來越多選擇，Jawbone 早前亦推出了 UP24 的後代：UP2。官方講呢款智能手帶比上代更輕更易用，配合官方 APP 內的 Smart Coach 功能，更可以監察生活上所有細節，讓大家經常保持身體健康。究竟用落又係咪真係咁好？Edward 就試了幾日，而家就同大家分享一下感受。
手感比上代正好多
今次 Jawbone 推出的 UP2，聲稱比上代 UP24 細小了 45%。不過小編戴上手時，第一感覺就係：好輕，但好難戴！因為佢唔似其他手帶或者手錶咁戴，而係穿過金屬扣後，再將扣鈎攝入扣內。但由於手帶過輕，有時放在手臂上正打算穿過金屬扣，但就輕飄飄到跌咗落來，最後又要重新再戴。而且扣鈎要攝入扣內確實需要點技巧，唔似一般手錶咁，就算關燈或者合上雙眼都可以扣到，所以第一使用感受，Edward 覺得真係唔太好。
▲UP2 穿過金屬環後再將鈎扣咩在帶上，初上手其實都會覺得幾難戴。
▲不過手帶本身幾輕，長時間用都算舒服。
▲而且有鬆緊度可以俾大家自行調較，好過上代 UP24。
▲不過個鈎扣好易鬆，有時真係跌咗條手帶都未必知……
但戴上手臂後，佢嘅用料，加上極輕的重量，又真係令大家幾乎唔覺有嘢戴在手臂上一樣，就算瞓覺個陣唔除，都唔驚責爛或者「梗住梗住」咁瞓得唔舒服，呢樣又真係抵讚！所以，結論係：大家如果要用 UP2，初期適應了難戴的「學習期」後，使用體驗應該會有大幅提升。
如果同上代 UP24 無扣的設計相比，Edward 覺得雖然難戴咗，但係因為可以調較鬆緊度，所以相比「硬掘掘」的 UP24 會更為舒服（尤其是好似小編呢種擁有肥手臂的用家來講）。加上 UP2 主體部分採用類金屬物料製造，比 UP24 成條都係膠物料，手感會更佳。加上因為錶帶極輕極幼，所以就算小編同埋隻 Apple Watch 一齊戴，都唔覺手臂負荷太重。如果你是 UP24 的用家，小編覺得單是手感這一原因，已值得升級。
轉換模式麻煩好多
上代小編自己都用過，其實除咗戴起來唔夠舒服之外，其餘功能都幾滿意，尤其是由生活模式轉換為睡眠模式，只需要按住一個制就搞掂，真係超方便。不過來到 UP2，唔知係咪手帶本身細咗，連一個細制都放唔落，所以感應器的操控模式都複雜咗，小編要首先點按兩下表面喚醒裝置，當出現橙色標示後，再按實表面一會兒，直至月亮標誌亮起才成功進入睡眠模式。雖然都唔算太難學，但點都無上代有實體鍵咁方便。另外上代有活動計時模式，今代都取消咗，令大家計時要拿番部手機出來，又或者同時要戴住隻手錶先至做到，確實有點失望。
▲平時輕點兩下帶面就可以喚醒手帶，正常模式是如上圖的橙色 mode。
▲喚醒手帶後再按住表面不放，大約 1 秒左右之後就會進入睡眠模式，會檢測用家的睡眠質素。
▲另外點按官方 APP 右上角的按鍵，再選擇「睡眠模式」同樣可以進入。
加入 Smart Coach 尤如生活教練
當然，除咗輕之外，仲有原因令小編覺得轉用 UP2 係幾好的事，就係新加入的 Smart Coach 功能。佢會按用家的生活習慣，提供度身訂造的指導及建議，幫助用家達成目標。例如：當小編經歷幾日瞓得少的生活後，UP2 會建議今晚應該什麼時間開始睡眠，以便第二天有充足體力應付工作。Smart Coach 亦會就飲食、運動等提供目標設定，例如：用家可用 Smart Alarm 設定入睡及起床時間，又或者步數設定。對於像小編這種懶於運動又習慣做「夜貓」的人來講，想改善生活規律，令作息更健康的話，UP2 確實係一個好幫手。
▲配合使用的 UP 程式，內建了 Smart Coach 功能，可以為你生活或運動上提供不少建議。
▲會提醒什麼時候應該睡覺，對於已習慣做「夜貓」，但又想改變呢個壞習慣的小編來講，真係好體貼。
▲Smart Coach 還有不少生活小貼士提供，例如：健康飲食、處理壓力等，有別於其他健康管理 APP，十分特別。
▲UP 程式還可讓用家記錄其他事項，包括：運動、情緒、飲食等。
▲情緒方面，有不同的公仔俾大家表達當日的心情，而且公仔都幾得意哩！
▲而飲食方面，預設已有數項食物俾大家加入。如果發現表中沒有，可以點按右上角的「+」鍵，然後透過掃描（掃描食物包裝上的 barcode）、輸入（輸入食物關鍵字搜尋資料庫內數據）或拍攝（為食物影相然後自行輸入資料）輸入食過什麼，對於減肥人士來講真係好好用。
生活教練戴上手！
整體來講，UP2 一拿上手，Edward 的感覺係得個輕字，而且既難戴，要轉換模式又比上代麻煩，真係有點討厭它。但實際用上幾日後，就發覺生活開始越來越離不開它，因為佢真係做到生活健康上的各種提點：唔止提你幾時要瞓，亦可以設定時間，只要佢感應用家係指定的時間內無乜起身走動，就會震一震提提你係時候起身行下，呢啲方面真係幾體貼。而經常遲睡遲起的小編，戴了 UP2 後，配合 Smart Alarm，又真係可以好容易朝早起到身，連鬧鐘都唔洗較（以前小編就算較 3 個鬧鐘都未必叫得醒個「肉體」…….）。加上它的售價比第一代更便宜，只係 $929（UP24 初推出時售價為 $1,339），更加親民。如果大家都想有個健康生活，UP2 應該真係可以幫到大家。
售價：$929
分享到 :
最新影片
