昨日的創業 Tips 就講到有唔少創業的朋友，很多時因為覺得時間唔夠而需要捱更抵夜完成工作，但其實大家究竟有冇有效善用時間，以達到你想要的目的呢？你可能睇過好多書，甚至上過有關時間管理的堂，但都硬係覺得搞唔掂喎，有好多嘢做唔晒喎，甚至你預期的效果出唔到喎… 點算？睇下我今日俾嘅 Tips 幫唔幫到你～
首先，你要明白，咩係「時間」。我梗係唔會叫你睇霍金個本《時間簡史》啦，我只係想講，時間係彈指之間不斷經過，而我地所花時間只會做呢 3 樣嘢：諗嘢（thoughts），講嘢（conversations），同做嘢（actions）。良好的管理就可以好好安排時間透過做上述 3 樣嘢從而達到目標。
1．記錄所用時間
開始實行大計之前，用本 schedule 記錄低一個星期入面，你諗嘢，講嘢，同做嘢（actions）的時間，從而了解自己寶貴的時間真正用左 / 浪費左去邊。
2．分配時間予重要事項
如果你有用開 To-do List，有冇發現佢只會愈寫愈長，而且硬係做極唔完？呢個時候我地應該轉一轉方式，唔好寫個水蛇春咁長的 To-do List 啦，改為同自己約時間啦！我地要預留時間俾自己做啲重要，可以幫你達到目的事情。而且要切實執行！
3．預一半時間做實事
唔講唔覺，其實我地一日真係會有好多時間 hea 走左，所以係做計劃的時候就要最少預留有一半時做實事，盡量減低浪費時間的機會。
4．預時間俾人拖後腿
呢個世界有好多人會阻住你完成你嘅目標，唔係話佢地心懷惡意要拉你落黎，只不過總係會有人係你開緊 turbo 的時候同你傾兩句，叫你幫手搞其他野呀，甚至有意外發生！所以要預鬆少少時間走盞。
5．用半小時計劃一整天
每日開始工作之前，用最少半小時計劃下今日的目的同埋工作時間，千祈唔好覺得呢樣嘥時間，其實反而會幫到你慳時間！
6．做嘢之前停一停、諗一諗
打電話或者做一個 task 之前，先用 5 分鐘度一度你想從中得到啲咩，等你可以集中出擊，正中目的。完左個 task 之後，你亦到要檢討下自己有冇 achieve 到目的，如果冇，下次可以點做。同自己開 E 會都係緊要架！
7．棟「請切騷擾」個牌出黎
當你有野唔做唔得的時候，就要話俾你身邊的人知，叫人唔好搞你啦！
8．秒回？要戒喇！
唔好因為個電話響或者有 notification 彈出黎就即刻覆！如果可以令自己無視啲無關重要的 messages，集中注意力做啲重要野，就可以慳返好多時間啦！不過，覆 message 係社交禮儀的一部分，你都唔想輸左頭家架嘛，咁你可以安排一個時間覆 email 同電話嘅～
9．同社交媒體 Say No!
除非你嘅生意係 社交媒體度黎啦（例如：網站、網店、網媒…），否則社交媒體係一個好大的 distraction，好易令你分心架！
10．長命功夫長命做
創業人士一定要明白，工作係冇可能做得完的，做完咁你盤生意就真係「完！」，學懂將工作以重要性及趕急程度排序，就唔會 miss 左啲工作啦！
最後，無論你自己創業又好，打工都好，人人都有潛能係 20％ 的「諗嘢，講嘢，同做嘢」當中，俾到八成的工作成效，唔好睇小自己呀！
來源：Entrepreneur
甚麼是 unwire.space ?
unwire.hk 作為生活科技網站，一直有報道科技生活之餘，亦有採訪科技創新企業，試透過我們的綿力推動一下香港創業文化的發展，因此推出類似現時流行的 co-working space 概念工作間 – UNWIRE Space。就在我們位於觀塘區的編輯室旁方便我們採訪報導，Co-working space 結合新媒體宣傳力就是我們與眾不同的 unwire.space 了
