近年隨住好多手機都加入 Timelapse 縮時攝影功能，令呢種攝影技巧愈來愈多人玩，有啲人用來影車軌、街景；有啲人甚至用來影星軌、銀河。不過每次影親 Timelapse 片郁下都幾個鐘，手機影又未必夠電，用相機器材一般又唔平。最近 Brinno 就推出了 TLC200 Pro Timelapse 攝錄機，具備 HDR 功能，影出來效果都唔錯架！加個防水殼仲可以有防水功能，如果落微微雨都唔驚整壞部相機。
最短 0.3 秒影一格
Brinno TLC200 Pro 既然稱為 Timelapse 相機，自然專攻這項攝影功能，佢在攝錄上，最高同一般相機一樣，支援 30fps 720p 質素，算係唔錯。另外，拍攝時隔方面，最短支援 ASAP 模式，可以每 0.3 秒影一格，而最長就可以每 24 小時先影一格，令拍攝題材上更具彈性：大家可以旅行用來影溪流、夜景，如果時間夠長（例如：想影住宅室外 1 個月的風景變化），就可以每 24 小時只影一格都得。
▲有不同質素可供大家選擇，至於格式方面，就一定係 avi，解像度最高就是 720p。
▲設有 ASAP 模式，即係每 0.3 秒影一格，適合拍照快速移動的物件。
▲預設時間就由一秒到一小時都有，如果想再耐啲先影一格，都可以用 Custom 自設，最長可以一日先影一格。
用 AA 電換電超方便
大家可能會問：24 小時先影一格？影足一個月？乜可以頂到影咁多日咩？事實上 Brinno TLC200 Pro 本身十分慳電，只要啟動了攝錄功能約 1 – 2 秒，熒幕顯示就會關閉，以便節省耗電。當大家要結束攝錄時，只要按住 OK 鍵不放約 2 秒，熒幕顯示出「processing」字樣後，就可完成攝錄過程。
▲只要扭至 On 然後設定好，再按住 OK 鍵就可以開始攝錄，想結束時按住 OK 鍵不放約 2 秒就得，操控好簡單。
▲攝錄時熒幕會自動關閉，以節省耗電。
另外，呢部相機相比其他相機或手機來講，最大優勢係只係需要用 4 粒 AA 電就可以推動得到，而且 4 粒 AA 電可以最長影足 45 日，要買電換又方便，真係好體貼。
▲用 4 粒 AA 電就推動得到，唔洗用差電，真係無電個時換電都方便好多。
可換鏡頭極具彈性
Brinno TLC200 Pro 的另一特色，就係可以好似一般單反 / 無反相機咁換鏡頭！佢隨機會附送一支螺絲批同埋一粒大釘頭螺絲，只要扭出本身係鏡頭側邊嘅螺絲，再扭上大釘頭螺絲，就可以將鏡頭扭出，換上其他 Brinno Lens（需另購）。本身跟機的鏡頭可拍攝 112 度視角、19mm 焦長、F/2.0 光圈，方便拍攝一般城市夜景、煙花等。另外兩支鏡頭，第一支 BCS-24-70 就可拍攝 94-38 度視角、24-70mm 焦長、F/1.4-2.4 光圈，適合拍攝城市、海邊、山景等；另一支 BCS 18-55 就能拍攝 113-48 度視角、18-55mm 焦長、F/1.2-1.9 光圈，適合拍攝星空、銀河等現場光線非常暗的場景。
▲用隨機附送的螺絲批扭鬆鏡頭旁的螺絲。
▲再扭上同樣係隨機附送的大釘頭螺絲。
▲然後就換得鏡頭架啦！換上後只要將本身的細螺絲扭回新鏡頭旁的螺絲位就可以了。
此外，Brinno TLC200 Pro 的鏡頭方可讓用家自行調較清晰度，只要在目錄中選擇「Focus」功能，相機熒幕就會放大顯示，之後再用螺絲批扭鬆少許鏡頭旁的螺絲，然後就可以扭動鏡頭頂部的微調圈調整鏡頭清晰度。完成後再以螺絲批扭緊螺絲就可以將清晰度鎖定，再將相機放上腳架，就可以拍攝出清晰的縮時影片，好簡單，任何人都做得到。
▲要微調鏡頭清晰度都好簡單，只要按下 Menu 並選擇 Focus 功能，就可以見到熒幕放大了顯示畫面。
▲然後扭鬆少許鏡頭旁的螺絲（少許就得，唔洗成粒螺絲扭出來）。
▲之後扭動鏡頭頂部的微調圈就 OK 了。
除了可換鏡頭之外，Brinno 的鏡頭都可以俾大家調整拍攝角度，拍攝時彈性會比手機、相機高好多，最少唔洗用腳架就嘛！
▲可以調整拍攝角度，唔洗下下用腳架就。
▲平時唔用個時記住用跟機送的保護蓋保護鏡頭本身呀。
大感光元件 + HDR 效果唔錯
大家可能會諗：咁細部機仔用來影 Timelapse 片，得唔得架？筆者就實試過，就算放係 office 窗邊影日出，由夜間維港景到天濛光到完全日出，基本上畫面都無過暗或爆光的情況，以 2 千零蚊機仔來講算係好滿意。因為 Brinno TLC200 Pro 採用了超大感光元件，而每個像素的大細更大達 4.2µm，相比一般手機的感光元件及像素都大得多！此外，它亦具備 HDR 影片功能，可以自動調節畫面光暗度，可以令高光位唔會咁易爆光，低光位亦唔會黑哂無哂 detail。所以用來影夜景、街景、甚至星軌、銀河，都一樣做得到。
▲Brinno TLC200 Pro 本身的感光元件都好大，成 4.2µm，比一般手機大得多，拍攝出來的效果自然更佳。
▲本身都有唔同場景模式供用家選擇。
▲HDR 級別都可以俾用家自選。
▲影片播放速率都有得揀！（要留意呢個唔係拍攝影片的幀數。）
以下就同大家分享一下筆者自行拍攝的一段 Timelapse 影片啦！設定方面調較了每 20 秒拍攝一格，質素方面為 Best，場景模式為 Night，至於影片播放速率就設定為 10fps。效果都算真係幾唔錯喎！
防水殼就算微微雨都唔驚入水
此外，Brinno TLC200 Pro 亦有專用的防水殼（需另購），它支援 IPX4 防水功能，雖然未至於去到可以俾大家浸係水入面影 Timelapse 影片，但就算影影下落微微雨（只要唔係暴雨就唔大問題），都唔洗驚相機入手導致機件故障。另外呢個防水殼都好體貼，就算裝上後都可以插到快門線開始 / 結束拍攝，亦可以用 Micro USB 線接駁電腦過片。不過要留意的是，安裝防水殼上要有少許技巧，先可以裝咗之後都插到線；另外安裝後鏡頭就不能調整拍攝角度，只能拍攝前方景像。
▲安裝防水殼後就算落雨都唔驚機身入水。
▲防水殼有兩個扣扣實，加上內殼有防水膠圈，咁就唔驚入水啦。
▲不過要留意呢個防水殼只係支援「生活防水」功能，千祈唔好拿來浸落水拍片呀！
▲安裝上亦有啲技巧，首先係裝入去前要反出 Extension Slot 的保護蓋。
▲大家可以見到放入相機後，防水殼有個位專俾大家晾住塊保護蓋。
▲之後鎖緊防水殼後，旁邊有兩個蓋，打開就可以插到快門線或者 Micro USB 線啦！
售價：$2,278（Brinno TLC200 Pro；附送 4 枚 AA 電池及 4GB SD 卡）；$329（Brinno ATH120 IPX4 戶外防水盒）；$2,269（BCS 18-55）；$999（BCS 24-70）
查詢：Everbest（2541 2982）
分享到 :
最新影片
