見到人哋玩拍北極又拍火山口，其實真係心癢咗好耐不過價錢貴又好似好難控制咁，萬一買返黎玩兩下就撞爛左，咁就 GG 了！不過 DJI 最近就推出咗 Phantom 3 的 Standard 版本，價錢更大眾化、操作亦都更安全同簡單。今次我籮文就黎到科學園試玩呢部航拍機，而今次亦都係我第一次「放飛機」，睇下我有冇炒機啦！
第三代產品 航拍都 4K
航拍大廠 DJI 第三代嘅 Phantom 系列有三個版本，包括 Professional、Advanced、同埋 Standard。當中 Professional 及 Advanced 加入視覺定位系統及超聲波感應器，能夠感知地面紋理及相對高度，就算 GPS 出錯仍可以精確地定位懸停和平穩飛行。而 Phantom 3 Professional 更有 4K 相機鏡頭以及非球面鏡的鏡組，能夠消除鏡頭畸變還原真實景像。而今次我航拍新手籮文幫大家試嘅就係最入門級嘅版本 Phantom 3 Standard 。
▲Phantom 3 Standard、遙控 及 DJI 傳訊總監 Michael Perry 部 iPhone
簡單 Setup 唔使1分鐘
DJI 傳訊總監 Michael Perry 為我哋示範基本操作同各項功能之後就交咗俾我控制，我只要喺我部手機度 Download 咗 DJI GO app，用 Wi-Fi 連接咗部 Phantom 3 Standard ，跟手喺手機度打開個 App ，夾埋部手機上 Phantom 3 Standard 嘅遙控上面，基本上就可以控制到部機，交接過程 1 分鐘搞掂。
▲DJI 傳訊總監 Michael Perry 為我哋示範基本操作同各項功能
相關文章:
【評測】DJI Goggles N3 價格親民 + FPV 入門不錯選擇 【評測】DJI Air 3S 新黑科技 LiDAR 探測系統 + 黑夜飛行可偵測玻璃 DJI 控告美國國防部 指其無證據下將其列作「中國軍事企業」
「放手 放開所有～」 部機都唔會跌落黎
Michael 介紹基本操作嘅時候，講講下見住佢冇啦啦放低個遙控，作為新手嘅我當然係好緊張啦，我心諗，你放開晒啲掣部機未會跌落黎？原來係唔會嘅，Phantom 3 所有版本都有定位懸停嘅功能，你放晒手佢到只會喺同樣位置同高度懸停。介紹完畢，終於到我接手，揸住個大大嚿又重揼揼嘅遙控，令我立刻感覺到自己就係一個機長，負擔起一個使命感。
▲揸住個大大嚿又重揼揼嘅遙控，立刻感覺到自己負擔起一個使命感
實際操作 好快上手
第一件事，就梗係起飛啦，資料顯示，多數飛行事故都發生喺起飛同降落，不過唔使驚，原來，Phantom 3 有 Auto-Takeoff 同 Auto-Landing 功能，一㩒手機上嘅 Auto-Takeoff，我部 Phantom 3 Standard 就自動上升到一個人嘅高度，咁就可以避免到人手操作起飛會有失誤，掃到人哋隻腳或者整花人哋部車，飛到唔知去咗邊亦都可以㩒 Return-to-Home，部機就會自動返到你身邊，如果飛得太遠，離開咗遙控嘅接收範圍，Phantom 3 亦識得自己回航。起飛後，操作上最主要都係左搖桿、右搖桿同遙控左上方嘅一個轉輪。一邊望住部機、一邊望住手機上嘅實時畫面，左搖桿控制高度及旋轉，右搖桿控制前後及左右，而轉輪就控制鏡頭嘅垂直角度。除咗上下左右移動係用遙控操作，其他操作例如錄影、拍照，仲有高度距離等數據都係於手機上操作同監察。
▲Phantom 3 的基本操作
個人分享快速上手秘訣
不過有幾樣野新手要注意，操作嘅時候籮文發現左搖桿右搖桿靈敏都好高，推少少部機就已經郁得好快，所以一定要手指好穩定先可以操作得好。另外建議新手初時嘗試時，起飛前可以將航拍機擰到同自己面向嘅方向一樣，熟習前都唔好左右撥動支左搖桿去旋轉部機，咁樣你嘅左邊亦都係部機嘅左邊，如果你將航拍機面向你，操控就會相反，好易搞亂。
Phantom 3 Standard 無其他兩個版本使用嘅 Lightbridge Liveview 圖傳系統，反而係用 Wi-Fi 黎同時傳送操作指令同實時畫面，有效距離會比較短，所以操作嘅時候 Liveview 就有點兒窒，當放開操控讓航拍機懸停時，Liveview 又順暢得多喎，現場工作人員就表示可能同場有多部航拍機操作緊，有其它訊號干擾。總括來講，籮文用咗大概5分鐘就熟習到部機嘅基本操作，可以隨心所慾地拍攝現場嘅靚景，同埋 Selfie！
▲籮文用咗大概5分鐘就熟習到部機嘅基本操作
入門版本都夠晒玩 即時 Download 即時 Share
話就話係最低階版本，Phantom 3 Standard 雖然冇 Professional 版本嘅 4K，不過都支援 2.7K 影片拍攝，即係 2704 x1520 既解像度，而影相亦有 1,200萬像素，如果你係買黎拍下生活點滴，甚或至拍下短片微電影，Standard 版本其實都已經好夠用。只要操控時 DJI GO app 內嘅影相或者錄影掣，Phantom 3 就會將相片影片儲存到機內嘅 SD 卡，除咗抆張卡出黎抄之外，仲可以喺 DJI GO app 用 Wi-Fi 從 SD 卡 Download Full-Size嘅相片落手機，不過用依個方法 Download 影片就只有 720p。Download 到手機後可以喺 APP 內進行簡單嘅剪接，方便用家可以即時分享上 Facebook、Instagram，唔洗返屋企用電腦先過到。
▲ Selfie！拍照有1,200萬像素，線條銳利度都好好，暗位亦不失細節
▲可以見到陽光照射下光暗分明，天空同樹嘅顏色飽和度適中，可見 Phantom 3 Standard 嘅相機表現突出
▲放大後油畫化不算嚴重。
相關文章:
【評測】DJI Goggles N3 價格親民 + FPV 入門不錯選擇 【評測】DJI Air 3S 新黑科技 LiDAR 探測系統 + 黑夜飛行可偵測玻璃 DJI 控告美國國防部 指其無證據下將其列作「中國軍事企業」
即將追加之新功能
Phantom 3 有幾項即將追加嘅新功能都好令人期待！包括 Point Of Interest，只要揀選自己嘅位置， Phantom 3 就會 360度圍住你黎拍，十足十 Matrix 咁。仲有 Waypoint，只要喺地圖 Set 定一條路線，Phantom 3 就會跟住黎飛。而 Follow Me 故名思義就係跟住你黎影，去到邊影到邊囉，最後 IOC 就係智能方向控制，估計係 Phantom 3 會學習你嘅操控模式，令操作變得更簡單。
總結：好易上手! 第一次玩都唔炒機
玩過 Phantom 3 Standard 之後，真係好想買一部，控制一部航拍機自由地翱翔於天際之餘，又可以拍低所處嘅美景，的確係一件賞心悅目嘅事。Phantom 3 Standard 比 Advanced 或 Professional 版本缺少嘅主要係 4K 拍攝、Lightbridge 系統、雙定位模組、超聲波視覺定位等入門玩家不必要嘅功能，五千幾六千蚊真係超值。希望 Point Of Interest 等新功能快啲推出，有興趣嘅人就多一個入手的理由。
試玩影片
相關文章:
【評測】DJI Goggles N3 價格親民 + FPV 入門不錯選擇 【評測】DJI Air 3S 新黑科技 LiDAR 探測系統 + 黑夜飛行可偵測玻璃 DJI 控告美國國防部 指其無證據下將其列作「中國軍事企業」
分享到 :
最新影片
