今日喺 7月 14，又即喺中國人嘅鬼節，偏偏海洋公園唔識死邀請傳媒今日去邊食恐怖菜式邊聽佢今年哈囉喂全日祭有咩新搞作，D 嘩鬼同夏蕙 BB 條宣傳片真喺嚇到我嘢都食唔落呀！
8 間鬼屋，10 種體驗
今年哈囉喂同上年一樣搞全日，由 10 月 2 日至 11 月 1 日將會開放俾公眾入場，一張飛就可以由朝早 10 點玩到夜晚 11 點，如果買普通飛，我諗好彩嘅應該可以玩到 3、4間鬼屋嘅，所以依家就快 D 揀定排邊幾間啦！
H15 經歷死後「頭七」
每年最恐怖個間鬼屋通常都喺只限自己一個人入場，真喺少 D 膽都唔敢玩。今年更張恐怖升級，大玩港人熟悉既恐怖元素 －「頭七」！試想一下，突然有一日你明明仲有知覺但唔郁得，俾人放咗上靈床，「仵作」帶你由掛住自己「車頭相」嘅喪禮開始前往陰曹地府。我諗呢 10 分鐘嘅模擬經歷應該令你永世難忘。不過，因為呢間喺限制級鬼屋，所以只限 16 歲或以上同能接受極度驚嚇嘅人入去，而且想「死」之前要預先喺網上登記，首輪網上登記就喺聽日 8 月 28 日開始、第 2 輪登記就喺 9 月 4 日展開、第 3 輪喺 9 月 10 日進行，夠膽你就去登記吧！。
位置：動感天地
開放時間：上午 11 時 – 晚上 11 時
逃出陰屍路
The Walking Dead 應該唔少人都睇過，呢間鬼屋就喺以劇集 《 陰屍 路》 ( The Walking Dead) 多幕經典驚慄場面塑造出嚟，令你猶豫置身喺喪屍圍城嘅極度恐慌，必須想盡辦法面對喪屍嘅凶猛突襲，由詭秘嘅小鎮監獄走到終點站。
位置：海濱樂園廣場
開放時間：下午 1 時 – 晚上 11 時
十五年驚異回魂
今年喺哈囉喂踏入 15 周年，如果之前無玩唔緊要，呢間就俾你一次過經歷晒過去 14年嘅「驚」典精華！鬼屋以 2010 年代表作【幽靈遊樂園】中嘅巨型旋轉木馬為核心，穿越神秘閘門後，置身迷宮一般嘅陰森領域，闖進 2008 年【厲鬼村】嘅猛鬼電梯、2009 年【13 號差館】嘅鬼差館、2012 年【鬼魅冥婚大殿】嘅心寒婚禮等。
位置：急流天地
開放時間：下午 1 時 – 晚上 11 時
生化突變大暴走 V.S. 異種突襲大屠亡
全日祭同以前只有夜場最大分別喺某 D 鬼屋會由日間輕鬆嘅模式升級到夜晚嘅恐怖模式。而呢間生化突變大暴走日間會有全長 40 米嘅充氣障礙賽道身高 1.2 米以上嘅小朋友可以以兩人對決嘅方式，跨越「攀石挑戰陣」、「無敵風火輪」等重重機關，一考身手。但一到夜晚，賽道就會被生化怪物佔據，想避過凶猛怪獸突襲就要加快腳步啦！
位置：登山纜車廣場
開放時間：下午 1 時 – 晚上 11 時(下午 5 時 30分 轉場)
甜心蘿莉大宅 V.S. 血咒哥特古宅
另一間會升級嘅鬼屋就喺甜心蘿莉大宅，日間去到呢間華麗大宅，你不但會有甜心少女款待，佢地更會同係大玩 selfie。但一到夜晚，大宅就會變得鬼影幢幢，由大舞廳走到房間，你更會發現甜心女保持青春嘅凍齡奧秘，竟然喺捉活人飲鮮血！
位置：動感天地
開放時間：下午 1 時 – 晚上 11 時(下午 5 時 30分 轉場)
魔偶凶靈工坊
傳說有一個失意嘅木偶師將眾玩偶注入法術，希望將佢地變成照顧患病愛妻嘅小助手，可惜最後玩偶慘被邪靈附身變成妖怪，大開殺戒，唔知你又可唔可以幫佢捉番呢班失控嘅木偶呢？
位置：極速之旅旁
開放時間：下午 1 時 – 晚上 11 時
多啦 A 夢哈囉喂影城
哈囉喂點止喺年青人玩意，今年多啦A夢再次喺哈囉喂出現，只要啟動影城內嘅控制台、音效同水晶球，就可以施展七彩繽紛嘅神奇魔法，同多啦A夢、多啦美、大雄、靜香、胖虎同小夫拍電影。
位置：威威天地
開放時間：上午 11 時 – 晚上 11 時
小南瓜糖果遊
除咗多啦 A 夢哈囉喂影城，小朋友仲可以挑戰呢個由南瓜妖怪打造嘅萬聖節迷宮，入面有好多有獎小遊戲，完成任務後更會得到繽紛糖果、朱古力餅同小禮物添！一家大小仲可以同造型趣怪嘅科學怪人、吸血鬼、殭屍同木乃伊齊齊扮鬼臉合照，為開心時刻留念。
位置：自然大揭秘
開放時間：上午 11 時 –晚上 11 時
通行證程式縮減輪候時間
年年哈囉喂排隊嘅時間仲多過入去玩嘅時間，醒目嘅就記得喺玩果日登入「哈囉喂預訂通行證」應用程式，預先登記定幾時入去【十五年驚異回魂】、【生化突變大暴走】/【異種突襲大屠亡】、【甜心蘿莉大宅】/【血咒哥特古宅】同【魔偶凶靈工坊】玩啦！
分享到 :
最新影片
