年年萬聖節，海洋公園、迪士尼甚至各大商場都變得鬼影幢幢，偏偏又會吸引大量勇士去挑戰。如果唔想浪費排隊時間，又想玩到最正鬼屋就記得留意 Unwire 啦！事關今年籮文同依莉詩組成【萬聖節敢死隊】，將會深入各大鬼屋，為大家報告情況。頭炮就喺海洋公園其中 6間鬼屋，我地搞到連襪都飛埋、碌埋落地，仲比條吹氣棒迎面扑，過五關斬六將架！！！
1) 15年驚異回魂
今年哈囉喂踏入 15 周年，如果之前無玩唔緊要，呢間就俾你一次過經歷晒過去 14年嘅「驚」典精華！由 2010 年代表作【幽靈遊樂園】中嘅巨型旋轉木馬開始，穿越迷宮一般嘅陰森領域。 2008 年【厲鬼村】嘅猛鬼電梯、2009 年【13 號差館】嘅鬼差館、2012 年【鬼魅冥婚大殿】嘅心寒婚禮都一一重現重現眼前。
位置：急流天地
開放時間：下午 1 時 – 晚上 11 時
依莉詩點評
海洋公園搞咗咁多年哈囉喂我都只喺去過一次，仲要只喺玩咗兩間無咁恐怖嘅鬼屋，今次入到呢間鬼屋真喺嚇到唔知發生咩事。最驚嚇喺有個位明明寫住「員工專用」以為安全，點知有隻鬼喺籮文背面。
驚嚇度 ★★★★★
必玩指數 ★★★★☆
籮文點評
老老實實，想懶係型扮晒勇敢，不過依個堅係驚驚地，雖然試玩當日嘅朝早做完 Apple 發佈會，差唔多冇瞓過咁滯，不過入到去俾啲鬼嚇一嚇真係醒咗啲。入面有幾款鬼俾我印象特別深刻，首先係一隻中國疆屍，喺一排唔識郁嘅疆屍之中無啦啦彈隻人扮嘅疆屍出黎，我都一早估到其中一隻係人扮架啦！（馬後炮）只係唔知邊隻先係囉，所以係驚嘅！另外有一隻戴晒金鏈又盛，造型好 Hip Hop 嘅小丑，好鬼型！
2) 生化突變大暴走（日）
全日祭同以前只有夜場最大分別喺某 D 鬼屋會由日間輕鬆嘅模式升級到夜晚嘅恐怖模式。而生化突變大暴走日間會有全長 40 米嘅充氣障礙賽道身高 1.2 米以上嘅小朋友可以以兩人對決嘅方式，跨越「攀石挑戰陣」、「無敵風火輪」等重重機關，一考身手。
位置：登山纜車廣場
開放時間：下午 1 時 – 下午 5 時 30分
依莉詩點評
講恐怖呢間鬼屋又真喺一 D 都唔恐怖，不過就好講體能。起初以為 for 小朋友玩嘅彈床應該好簡單，點知只喺第一關爬上去已經用晒 D 力。我喺呢度提提大家，一定要著對長襪先好去玩！
驚嚇度 ★☆☆☆☆
必玩指數 ★★☆☆☆
籮文點評
唔係呀嘛，依間都叫鬼屋呀？冇鬼架喎！不過真係好好玩，可以同對手一齊玩依個障礙賽，最爽係一開波爬完梯之後，瀡滑梯個 Part，速度感十足，好刺激！不過之後嘅障礙就有啲太簡單囉，志在彈下彈下同埋同對手鬥下快囉，不過我個對手（依莉詩）實在太弱啦，我玩完成個 Round，佢都未爬到上第一關，好無癮囉，不過入夜再去多次就唔同講法啦…
驚嚇度 ☆☆☆☆☆
必玩指數 ★★★★☆
3) 異種突襲大屠亡（夜）
日間嘅生化突變大暴走喺夜晚會變成異種突襲大屠亡，賽道上會多咗好多隻生化怪物嚇你，想避過凶猛怪獸突襲就要加快腳步啦！
位置：登山纜車廣場
開放時間：下午 5 時 30分 – 晚上 11 時
依莉詩點評
其實日夜差距唔會太大，所以我建議只喺排夜晚，刺激 D 又好玩 D。不過，本身喺彈床企穩已經唔容易，夜晚仲要多咗多鬼失驚無神彈出嚟真喺好易跌低，好彩因為安全理由 D 鬼唔會追住我，唔喺就唔知點算啦！
驚嚇度 ★★☆☆☆
必玩指數 ★★★☆☆ 
籮文點評
PR又帶我哋黎返依度，我心諗又玩多次？好囉，玩囉。玩到中間，嘩！有隻鬼彈出黎嘅！？真係嚇一跳，然後都係繼續跳。日間版本同夜間版本分別不大，只不過係多咗啲鬼嚇下你，同埋有燈光效果囉。咁俾我揀，我梗係揀夜晚玩啦！
4) 甜心蘿莉大宅 （日）
另一間會升級嘅鬼屋就喺甜心蘿莉大宅，日間去到呢間華麗大宅，不但有精美大廳、綠油油嘅溫室花園、掛滿各式蘿莉服飾嘅大型服裝間同公主式設計的可愛睡房，更會有甜心少女拎住手機同你大玩 selfie。
位置：動感天地
開放時間：下午 1 時 – 下午 5 時 30分
依莉詩點評
去鬼屋唔影得相是常識吧！而呢間就破天荒俾你任影，仲唔會嚇你添！岩晒鍾意自拍嘅我！雖然話燈火通明，不過要自拍得靚，最好就帶定個神燈去啦。
驚嚇度 ☆☆☆☆☆
必玩指數 ★★☆☆☆ 
籮文點評
各位男士，依間蘿莉大宅啲蘿莉有啲都幾靚女，陪女朋友入去搵佢哋影下相啦，女仔實好鍾意入面啲佈置同啲衫㗎… 啲蘿莉唔會嚇你嘅，不過佢哋會同你講「主人你返黎啦？～」，依個時候你就要驚女朋友呷醋，到時就驚嚇度勁過玩鬼屋。
5) 血咒哥特古宅（夜）
甜心蘿莉大宅喺夜晚會變得鬼影幢幢，由大舞廳走到房間，你更會發現甜心女保持青春嘅凍齡奧秘，竟然喺捉活人飲鮮血！
位置：動感天地
開放時間：下午 5 時 30分 – 晚上 11 時
依莉詩點評
呢間鬼屋日間同夜晚好大分別，燈光暗咗之餘，D 蘿莉由可愛變得恐怖。雖然日間去過一次已經知道 D 位點行，血腥蘿莉亦都唔太嚇人，但 D 機關偏偏喺以為可以鬆口氣嘅地方出現，真喺估佢唔到。
驚嚇度 ★★★☆☆
必玩指數 ★★★☆☆
籮文點評
入夜啲籮莉就變到血淋淋，仲會嚇你架添！哇巧驚驚吖！不過玩完日間版本就會大約知道啲鬼喺邊，變相夜晚玩會冇咁刺激，建議大家想比鬼嚇下，日間就去玩下過山車先啦。
6) 小南瓜糖果遊
岩岩講嘅未必岩小朋友玩，而呢個由南瓜妖怪打造嘅萬聖節迷宮，入面有好多有獎小遊戲，完成任務後更會得到繽紛糖果、朱古力餅同小禮物添！一家大小仲可以同造型趣怪嘅科學怪人、吸血鬼、殭屍同木乃伊齊齊扮鬼臉合照，為開心時刻留念。
位置：自然大揭秘
開放時間：上午 11 時 –晚上 11 時
依莉詩點評
全日祭之後，哈囉喂多咗好多歡樂元素，唔單止唔驚嚇，仲好岩小朋友玩，同妖怪玩完小遊戲就有糖果收，總算有個位可以抖下氣。
驚嚇度 ☆☆☆☆☆
必玩指數 ★★☆☆☆
籮文點評
好熱好曬好攰，我唔想影相，我唔要食糖呀，可唔可以快啲去下一間鬼房呀？！
驚嚇度 ☆☆☆☆☆
必玩指數 ☆☆☆☆☆
睇完呢 6間鬼屋，對於追步刺激嘅朋友可能會有少少失望，除咗 15年驚異回魂似樣 D 之外，其他都以歡樂為主。
不過唔洗心急住，下星期我地【萬聖節敢死隊】會再出發，同大家直擊連夏蕙 BB 都玩嘅 H15 同埋 以 The Walking Dead 為藍本嘅逃出陰屍路，記得留意啦！
分享到 :
最新影片
