雖然仲未感受到秋意，不過都喺時候為季節轉換做好準備。要面對因為轉天氣而狀態變差嘅皮膚，除咗喺護膚品方面著手之外，亦可以利用導入機喚醒皮膚嘅吸收力，提升護膚品功效之餘，達致深層保濕，唔怕皮膚又乾又痕。而最近我依莉詩就替大家試用 Philips 最新嘅 VisaBoost 超聲波保濕儀，依家就一齊睇下好唔好用先。
超聲波 + 微震按摩雙重導入
VisaBoost 超聲波保濕儀同其他導入機唔同，並非用離子技術做導入，而喺以每秒 500萬次超聲波將護膚品分解成微分子，令護膚品更容易導入皮膚底層，以提升皮膚吸收護膚品嘅效果。同時，每秒 300萬次微震為皮膚輕柔按摩，從而提升肌膚血液循環。另外，保濕儀會自動偵測並調節溫度到最適合皮膚吸收不同護膚品嘅溫度。雖然保濕儀唔喺用離子導入，不過用嘅感覺有 D 似 Hitachi 嘅離子導入機，暖暖地同會發出「滋滋－滋滋－」咁，兩長一短嘅震動。
▲ 保濕儀喺無線設計，只需要充 2 小時充電，就可以使用 20 分鐘，即喺用 2次就要充電。如果帶去旅行就要記得帶埋插頭啦。
相關文章:
【評測】Philips 2000 系列半自動意式咖啡機開箱評測 半自動但操控容易 + 沖調花款更多樣化 + 啡味更出更好喝 美研可穿戴血壓計大小如郵票 非入侵技術超聲波隨時量血壓
▲ 用嘅時候暖暖地，會自動調節溫度到最適合皮膚吸收不同護膚品嘅溫度。
▲ 保濕儀嘅導頭可以防水，用完可以直接喺水龍頭沖洗，非常方便。
步驟簡單，10分鐘搞掂
雖然用嘅感覺同 Hitachi 嘅離子導入機有 D 似，但呢部保濕機就方便好多，唔洗記住 d 步驟，只需要塗護膚品上面，開著保濕儀，10分鐘就會完成導入。我試過用爽膚水、精華同乳霜做導入，都一樣可以加快皮膚吸收。用喺紙面膜同睡眠面膜嘅效果就更好。平時敷完 20分鐘面膜，都會剩番好多精華，唔想浪費只好用嚟敷下手腳，而用咗保濕儀 10分鐘，精華大部份已經吸收咗，得番好少喺皮膚表面同面膜度。而我臨瞓都會塗層厚厚嘅睡眠面膜，有時都覺得好黏膩，要等皮膚吸收得咁上下先轉得身，用咗保濕儀皮膚 3分鐘就差唔多吸收晒，夜晚可以慳番唔少時間。
▲ 用保濕儀導入爽膚水 (右) 同用手塗，吸收嘅速度差唔多。
▲ 用保濕儀導入乳霜 (右) 同用手塗，吸收嘅速度差分比較大，用保濕儀導入 3分鐘就已經令皮膚完全吸收。
▲ 睡眠面膜嘅效果就更好，厚厚嘅啫喱 3分鐘就差唔多吸收晒。
依莉詩：「秋天唔怕面痕痕！」
每逢轉天氣塗極護膚品都好似唔吸收咁，塗完爽膏水又要等一段時間先吸收，之後仲要塗精華、乳霜同睡眠面膜，唔等夾硬塗又會搞到好厚、黐笠笠。而呢部保濕儀就明顯比用手塗抹護膚品吸收得快，可以慳番唔少等待嘅時間。而微溫配合震動按摩又可以促進血液循環，用完面色都紅潤咗，咁就唔怕秋冬面無血色啦！
售價：HK$998.00
查詢：Philips (2619 9663)
相關文章:
【評測】Philips 2000 系列半自動意式咖啡機開箱評測 半自動但操控容易 + 沖調花款更多樣化 + 啡味更出更好喝 美研可穿戴血壓計大小如郵票 非入侵技術超聲波隨時量血壓
分享到 :
最新影片
