萬聖節想玩鬼屋又怕排長龍，今次【萬聖節敢死隊】就有好介紹啦！呢間「潛逃喪屍工廈」鬼屋喺由室內 War Game 場變身而成，唔單止有喪屍嚇你，仲有少少密室逃脫感覺。就等我依莉詩同籮文解構一下呢間嘅鬼屋值唔值得玩啦！
室內 War Game 場變身鬼屋
海洋公園都有間「逃出陰屍路」鬼屋就知道喪屍鬼屋幾受歡迎。今次由 PTS Infinity 會喺 2015年10月23日至11月1日將室內 War Game 場改裝成「潛逃喪屍工廈」鬼屋，同樣以喪屍做主題。喺黑暗又四通八達嘅 War Game 場入面隨時都會有喪屍走出嚟嚇你，唯一可以做嘅就喺手持氣槍自衛同快快想辦法離開現場。
▲ 入場前要先聽一段神秘錄音，以微弱又驚恐嘅聲線話俾大家知我地需要入去搵血清嚟拯救人類。
▲ 一行 4-10人 每人都需要手持氣槍自衛，以防止受喪屍攻擊。
▲ 幸好唔喺每隻喪屍都會突然走出嚟，呢隻就會乖乖企定定等你行埋去。
追加密室逃脫更緊張
除咗喺 War Game 場加入驚嚇元素外，當中亦追加咗密室逃脫嘅任務，每隊 4-10人必需喺 20分鐘內喺漆黑嘅鬼屋入面尋找離開嘅線索同血清，以醫治活死人症，否則就會有大量喪屍出嚟圍住你，令氣氛更緊張。
▲ 喺尋找離開嘅線索過程中要有喪屍出嚟阻礙你，希望你陪佢一齊留喺度。
▲ 幾經波折，我同籮文就成功過關啦！睇嚟都唔太難姐！
依莉詩點評 ：「如果喺打喪屍會更好！」
雖然 $100 只玩得 20分鐘好似貴咗少少，不過 book 咗就玩得，唔洗排長龍，都喺成班 Friend 感受萬聖節氣氛嘅好選擇。而且呢間鬼屋將 War Game 、驚嚇同密室逃脫集於一身都幾有新意。鬼屋入面嘅環境好黑又四通八達要搵到血清同線索真喺有 D 困難。不過氣槍只喺可以用嚟射固定嘅靶好似有 D 浪費，如果喺打喪屍會更好！當然，我估亦有唔少淆底獸會揸支搶亂射啦！
驚嚇度 ★★★☆☆
必玩指數 ★★★☆☆
籮文點評：「要驚，唔一定要去迪迪尼或海馬公園」
男人最鍾意就係玩槍，籮文見到原來有得玩手槍就即刻好興奮，不過原來只係射靶，而且你係可以行到好埋個靶度射，太簡單啦！不過透過音效、燈光等，成功營造到一個好緊張刺激嘅氣氛，解謎途中又會有喪屍嚇你，有時仲會行錯路行咗去啲死胡同。老老實實，一百蚊，我覺得係超值，位置又方便，唔似迪迪尼或海馬公園咁遠，如果 Halloween 想玩下又唔想去咁遠，不妨考慮下依個「潛逃喪屍工廈」！
驚嚇度 ★★★★☆
必玩指數 ★★★★☆
票價： 每位港幣100元正
日期 : 10 月 23 日至 11 月 1 日
查詢：2332-7128 (ext.: 112)
分享到 :
最新影片
