之前 Apple 的記者會，除咗宣佈會係下月推出 iPad Pro 之外，有一個唔太明顯（因為官方無乜點提……）嘅焦點，就落係 iPad mini 4 身上。今次 iPad mini 4 外形抄足大機 iPad Air 2，規格亦強化咗，大家終於可以係細機體驗到大機嘅效能啦！但用落係點？而家 Edward 同大家分享一下。
終有 2GB RAM Safari 多 tabs 唔再彈 APP
其實舊年 Apple 推出 iPad Air 2 個時，都有同期推出 iPad mini 3，但就只係加個 TouchID 指紋辨識器、加入金色等輕微改變，令大家都提唔起意慾去入手。今年嘅 iPad mini 4，終於同 iPad Air 2 睇齊，唔止都用上 Apple A8 處理器，最重要係終於有 2GB RAM！可能大家唔太覺加咗 RAM 有咩咁特別，因為 Apple 係 iOS 微調上都做得幾好，但對於筆者來講，之前 iPad mini 3 因為只有 1GB RAM，有時用 Safari 編輯網站文章，開多幾個 tab 之後部回之前開的 Tab 會 Reload 一次甚至會出現彈 APP 情況，最終唯有忍痛用番比較重嘅大機（iPad Air 2）。今次 iPad mini 4 終於有 2GB RAM，筆者就算開十幾個 tab 都好順，亦未見配合 iOS 9 有彈 APP 情況，以後終於可以拿部輕身好多（相比 iPad Air 2）嘅平板出街做嘢囉！
▲就算係 Safari 內開十幾個 tab 都無影響暢順程度。
機身抄足 iPad Air 2
今次呢部 iPad mini 4，機身設計上基本係抄足 iPad Air 2，機邊同樣採用較收邊設計，厚度亦同 iPad Air 2 一樣，只有 6.1mm，相比舊年嘅 iPad mini 3 達到 7.5mm 嘅厚度，真係薄咗好多。另外，重量方面 iPad mini 4 都只係得 299g（Wi-Fi）/ 304g（4G + Wi-Fi），相比 iPad mini 3 嘅 331g（Wi-Fi）/ 341g（4G + Wi-Fi），輕咗都有 12% 左右。可能大家睇數字唔覺係好多，但呢個輕、薄設計，真係拿上手真係會好覺。另外同 iPad Air 2 一樣，機身右側上方只係得番音量鍵，側邊按鍵被取消了，以後大家用 iPad mini 4 就同 iPad Air 2 一樣，少咗個制一啪靜音或者鎖定熒幕旋轉了。
▲iPad mini 4 係機身設計上基本係 iPad Air 2 嘅縮細版。
▲iPad mini 3（上）個時仲有嘅側邊按鍵，係 iPad mini 4（下）上就同 iPad Air 2（中）一樣取消了。
▲iPad mini 4（左）比上代 iPad mini 3（右）足足輕咗 1.4mm，十分明顯。
▲至於同 iPad Air 2（右）比較就相同厚度，都係 6.1mm。
▲iPad mini 4 好輕身，就算單手托住長時間都唔覺累。
▲另外無論直向定橫向拿機，就算長時間都唔會累到手震。
熒幕超微偏藍但仍準確
至於熒幕方面，iPad mini 4 相比上代 iPad mini 3 及 iPad Air 2，熒幕顏色都依然算準確，雖然同 iPad mini 3 拍埋一睇，好似有少少偏藍情況，但差別只係好微，唔係兩部機拍埋一齊睇純白色畫面，都唔會覺察得到，所以大家唔洗擔心。筆者再拿 Spyder 5 來測試 iPad mini 4 嘅熒幕白平衡準確度，達到 6798K，相比 iPad mini 3 及 iPad Air 2 嘅 6744K 及 6917K 讀數，明顯係比 iPad mini 3 藍少少但相差極微，但相比 iPad Air 2 就似乎有更準確嘅白平衡，所以熒幕質素來講，真係收貨。
▲用 Spyder 5 測試 iPad mini 4 的熒幕。
▲iPad mini 4 獲得 6798K 白平衡讀數，算係好唔錯。亮度為 429.7 cd/m2，真係好光。
▲至於上代 iPad mini 3，白平衡讀數都有 6744K，雖然睇落似乎更準確，但其實同新機相差唔遠。但亮度方面就只有 355.12 cd/m2，熒幕較到最光都明顯比新機暗。
▲至於 iPad Air 2，白平衡讀數就是 6917K，比 iPad mini 4 更藍；另外亮度都係得 369.01 cd/m2，可見全新嘅 iPad mini 4 嘅熒幕真係好光。
至於細緻度方面，iPad mini 4 依然採用 7.9 吋 2,048 x 1,536 Retina 熒幕，用來睇網頁依然十分清晰，文字顯示無論大細字都好銳利，睇得好舒服；而睇片時顏色亦偏向自然，整體來講表現都好好。
▲熒幕細緻度方面，可見真係好高，唔洗放大熒幕顯示都睇得到細字。
▲用來睇片效果都唔錯，顏色偏向較自然風格。
▲可視角度都算唔錯，從側面睇都無變色或變得過暗嘅情況。
多工情況 ? 電量 ? 下篇評測會提及
因為 iPad 4 Mini 剛剛到手，所以第一時間會大家報告以上的測試，至於 2GB 機獨有的 iOS 9 多工介面好唔好用、用電情況如何、喇叭音量、建議配件等等，下星期 edward 會同各位 unwire 讀者報告 !
總結：加 RAM 最吸引！
其實今次嘅 iPad mini 4，仲升級咗鏡頭功能去到 800 萬像素，像素大細仲達到 1.12µm，理論上係影相拍片，尤其是係較暗環境下進行時，質素應該會比上代嘅 500 萬像素鏡頭好得多。不過事實上又有幾多人會用部 iPad 影相拍片？所以筆者就唔多講啦。試玩過一陣後，筆者覺得最重點反而係 RAM 升級至 2GB，追得上 iPad Air 2 嘅效能，無論係係 Safari 入面多開十幾個 tab、係背景多開幾個 APP、用 iMovie 剪片、甚至玩對系統資源要求較高嘅遊戲，都可以更加暢順，呢一點反而係今代 iPad mini 最吸引嘅地方。加上機身進一步輕薄化，如果大家之前心郁郁想買 iPad Air 2 但又嫌佢太大部，iPad mini 4 絕對係值得入手嘅機款。
售價：$3,088（16GB；Wi-Fi）；$3,888（64GB；Wi-Fi）；$4,688（128GB；Wi-Fi）；$4,088（16GB；4G + Wi-Fi）；$4,888（64GB；4G + Wi-Fi）；$5,688（128GB；4G + Wi-Fi）
查詢：Apple（800 908 988）
分享到 :
最新影片
