昨日 Apple 正式推出各平台的新 OS，而 iOS 亦正式推出 iOS 9.1，筆者自然第一時間為手上 iPhone 6s Plus 及 iPad mini 4 升級。試完之後，只有一個反應：「未至於伏伏伏，但穩定性不及 iOS 9.0.2！」點解？而家就同大家講講啦。
WhatsApp 快覆無難度
今次更新 iOS 9.1，其實都令第三方軟件有受惠，例如：WhatsApp，以前要覆 message 一定要入 APP，但而家有新 message 到時，會係熒幕最頂位置 pop up 出來，仲有埋個對話框，大家只要係對話框內輸入文字再按傳送，就可以唔洗入 APP 都覆到 message，咁情侶們就唔驚俾女朋友詐型話只讀不回啦。不過從此打工仔就再無藉口話睇唔到老闆個 message 唔覆了 sosad……
升級建議用 iTunes
首先今次 iOS 9.1 升級，可以話係 iOS 9 推出以來的最大升級（睇數字可知），而可以玩新 emoji（黃絲帶、舉中指等），相信都吸引到唔少人想第一時間升級。不過筆者身邊收到唔少朋友話升級個時出現問題，包括 OTA 幾次都升級唔到（但駁線開 iTunes 又寫住已升級至 iOS 9.1……）、hold 住係白蘋果畫面進度欄唔郁、甚至就算升級後都不停重啟系統。當中筆者發現絕大部分用家都係用 OTA 方法升級，雖然筆者兩部機都係用 OTA 升級亦無上述問題，但其實為穩陣起見，建議大家都係用 iTunes 為 iOS 裝置升級會比較穩陣。但如果大家心急到想盡快用到，一定要用 OTA，都建議身處 Wi-Fi 接收較穩定嘅地方。
▲筆者的朋友用 OTA 升級升到火滾……
另外，當開始升級前，建議先將檔案備份去 iCloud，升級完成後最好進入設定 –> 一般 –> 重設 –> 清除所有內容及設定，將 iOS 裝置 format 一次先用，咁就可以確保升級後少好多不必要嘅 bugs。
相關文章:
【評測】MacBook Pro M4 2024 詳細效能評測 + 選購指南分析 7 大要點 【評測】Mac mini M4 2024：進階用家最應該買的 Apple 電腦 效能、日常應用詳細評測分析 【教學】iOS 18.1 如何用 Apple Intelligence 只需 2 個設定 + 香港免 VPN 也可用
耗電無快到 6s Plus 用到一日
相信好多 wire 民都擔心升級 iOS 之後，會唔會耗電咗？升級後，筆者就試用咗一日，發覺裝咗 iOS 9.1 嘅 iPhone 6s Plus，耗電情況其實同升級前嘅 iOS 9.0.2 差唔多，使用時間大約是 7 小時 46 分鐘，而待機時候為 11 小時 57 分鐘，合共即係大約用咗 19 小時 43 分鐘，仲剩下 6%，基本上我大約朝早 11 點半左右停止充電，到當日零晨 24:22 先插番充電器，係熒幕亮度長期保持一半左右，有駁藍牙耳機聽歌，亦有打機同用 Facebook、WhatsApp 情況下，都用到一日，算係咁了。
小伏！iPhone 6s Plus 升後窒咗慢咗
另一樣大家都想知就係：究竟升咗之後，會唔會影響整體使用體驗？呢樣嘢，筆者試過一日之後可以同大家講：唔算大伏嘅，但小伏就一定有㗎啦！比起升級之前好順，升級後間唔時轉頁或者進入搜尋介面，雖然唔係成日，但每日都會有幾次係窒窒地，甚至會出現成個 APP Hang 咗，要 force quit 再重新啟動隻 APP 先回復正常（個個 APP 唔係第三方程式，只係內置嘅郵件 APP……）。筆者唔知係咪得自己有呢個情況啦，因為問咗同事又唔係個個有呢個情況，但佢哋嘅 Facebook APP 就會係咁彈，但呢方面又輪到我無發生過。唔知大家升後「災情」又如何？歡迎大家報告一下。
▲升級後連係郵箱入面要開搜尋都搞到 hang 咗，要 force quit 重開先用得番。
Safari 不再彈 APP
不過升級後有一樣嘢肯肯定係好咗嘅，就係 Safari 彈 APP 嘅 bug 終於解決。之前用 iOS 9.0.2 OS 個時，一開 Safari 正準備打 keyword 搜尋，十次有六、七次都會未打完個字已經彈 APP，令我要利用 iPhone 本身嘅 Spotlight 搜尋輸入關鍵字，再點選搜尋網頁先至可以搵料。升級後，直接係 Safari 網址欄輸入關鍵字都唔再彈 APP，呢個困擾咗筆者成個月嘅 bug 終於消失了！
▲但升咗 iOS 9.1 之後係 Safari 網址欄輸入關鍵字終於唔再彈 APP！
可玩新 emoji
另一項升級 iOS 9.1 後可玩嘅功能，就係全新 emoji。根據 Apple 表示，新版 OS 入面會新增超過 150 個表情符號字元（emoji），當中大家最想玩嘅肯定係黃絲帶同埋舉中指。另外新版亦全面支援 Unicode 7.0 及 8.0 的表情符號，大家以後就可以用 emoji 傳情啦。不過留意，對方一定都係要用 iOS 9.1 嘅裝置，又或者 Mac OS X El Capitan 嘅 Mac 電腦，先至會睇得到；如果大家係用 Windows 電腦，又或者 Android 或其他 OS 嘅手機或平板，就未必睇到了。
▲升咗 iOS 9.1 終於多咗好多 emoji 玩。
▲係 Facebook APP 入面一樣用到。
▲如果大家用 Mac 電腦又已升最新版本的 El Capitan，都可以睇到呢啲新 emoji，但唔知點解（留意上圖）中指同收聲兩個 emoji 之間多咗個肉色方格……
▲係 Mac OS 入面用 WhatsApp 網頁版一樣睇到相關 emoji。
▲但係 Windows 10 入面就睇唔到了，絲帶係見到但就由黃色變咗黑色……
▲係 Android 手機都一樣睇唔哂啲新 emoji，大家可以見到舉中指，但係黃絲帶就變咗紅絲帶囉！
相關文章:
【評測】MacBook Pro M4 2024 詳細效能評測 + 選購指南分析 7 大要點 【評測】Mac mini M4 2024：進階用家最應該買的 Apple 電腦 效能、日常應用詳細評測分析 【教學】iOS 18.1 如何用 Apple Intelligence 只需 2 個設定 + 香港免 VPN 也可用
多工處理經常要 Reload
另外，筆者亦感受到升級至 iOS 9.1 後，多工處理效能好似比係 iOS 9.0.2 低咗，以一款筆者經常玩嘅遊戲《Fallout Shelter》為例，以前係 iOS 9.0.2 上面，除非兩次開 APP 玩嘅時間之間開過 5 個以上其他 APP，否則就算隔成 4、5 個鐘，再開個時都會直接顯示 Loading 然後入 game 玩得，唔洗再重新 load 過；但係升級至 iOS 9.1 之後，試過隔半個鐘再開，已經要重新再 load game，雖然載入時間都唔算太耐，但始終都唔太習慣。但筆者都要提多一點，就係呢個「多工處理效能下降」嘅情況，又唔係經常出現，好似今朝咁，又好似回復番 4、5 個鐘都唔洗重新 load game；但昨晚試個時，又真係有呢個問題，可見 iOS 9.1 雖然 Apple 標示已「改善多工處理介面的執行效能」，但實際用落似乎都未算穩定，時好時唔好，表現好 random……
▲筆者係 1:36 玩完隻《Fallout Shelter》，按下 Home 制暫時唔玩。
▲但去到 2:44 分，只不過係一個鐘多少少，隻 game 已經要重新啟動……
總結：可以睇定啲唔升住
總括而言，升級 iOS 9.1 之後，筆者覺得除非大家好想「舉中指」或者 send「黃絲」俾朋友，否則整體效能好似都未係十分穩定，建議可以睇定啲，等下個更新先上都未遲。
相關文章:
【評測】MacBook Pro M4 2024 詳細效能評測 + 選購指南分析 7 大要點 【評測】Mac mini M4 2024：進階用家最應該買的 Apple 電腦 效能、日常應用詳細評測分析 【教學】iOS 18.1 如何用 Apple Intelligence 只需 2 個設定 + 香港免 VPN 也可用
分享到 :
最新影片
