2014 年推出的 AQUOS Crystal 出晒名邊框超窄，今次 Sharp 再接再厲，推出 AQUOS Crystal 2，同樣有超窄邊框，更加入防水功能，想知有幾窄就繼續閱讀啦！
近乎零邊框 乾淨脷落
雖然擁有5.2吋螢幕，但因為螢幕有零邊框設計，機身體積非常就手，好似揸住一部 4吋 iPhone 5 嘅感覺。機面用上玻璃面，非常簡約美觀，但係機背就略嫌膠感重咗啲，揸上手有啜手感覺，而機身邊框用上金屬材質，而且有特別功能（容後再講）。邊框玻璃有斜邊切割，一來避免割手，二來令機邊閃令令更美觀，美感方面，就係機背繼續上一代膠感扣咗半分，籮文俾9分半（10分滿分）！另外今代加入上一代遺憾地冇嘅防水功能，咁至係架嘛！
▲雖然擁有5.2吋螢幕，但因為有零邊框設計，機身體積非常就手
▲邊框玻璃有斜邊切割，一來避免割手，二來令機邊閃令令更美觀
▲機面用上玻璃面，非常簡約美觀，但係機背就略嫌膠感重咗啲，揸上手有啜手感覺
▲音量制及開關位於左機側，但 Crystal 2 比較有性格，當多數 Android 手機開關係於音量制之下，Crystal 則是相反跟 iPhone，令籮文係咁㩒錯制，非常困擾。
▲機底 MicroUSB 位，外層金屬面板睇落以為係 Type-C 插口，其實內面都只係普通 Type-B 插口
▲3.5mm 耳機孔及 Sim Card MicroSD Card 插槽都於機頂
螢幕得 720p 但有零邊框補救
畫面方面，雖然數字上只有 720p，但屏幕由上一代 5吋 加到 5.2 吋，像素密度有算下降，但質素仍然算唔錯，就算微距閱讀文字都未見嚴重起格，而螢幕亮度尤其強，顏色鮮艷，亦可以通過動態模式，設定色彩表現。螢幕本身唔差，再配合零邊框睇片，畫面好似浮出黎咁，感覺更立體，不過邊框窄就一樣嘢唔好，就係橫向揸機嘅時候左手邊掌心就好易誤觸螢幕，但直向揸機嘅時候因為機身窄，比較少發生。而喇叭方面表現不錯，調教到80%音量先開始拆聲，但整體音量都算夠大聲，但同好多其他手機一樣喇叭於機背，聲音未能夠直接傳到用家耳朵。
▲近一近都睇唔到有起格
▲色彩非常鮮豔，不過邊框窄就一樣嘢唔好，就係橫向揸機嘅時候左手邊掌心就好易誤觸螢幕，但直向揸機嘅時候因為機身窄，比較少發生
▲喇叭方面表現不錯，調教到80%音量先開始拆聲，但整體音量都算夠大聲，但同好多其他手機一樣喇叭於機背，聲音未能夠直接傳到用家耳朵
相關文章:
Sharp 大阪堺市工廠全面停產 日本僅存電視液晶面板廠正式消失
日系機得意功能
日系手機喎，唔少得一啲養眼嘅功能。 就如 EDGEST Effect 功能，螢幕解鎖或者有來電打入時螢幕邊框就會有幻彩效果，真心靚。 加埋 Magic Grip 功能，用家只要手握手機就可以解鎖螢幕。仲有一個 Clip Now 功能，只要手指一篤住螢幕嘅左上或右上角，水平或垂直拉都可以 Save 低個 Cap Screen 或者暫時性嘅 Screen Memo。放手機喺枱面，點知有電話打黎，怕俾啲行過嘅人見到邊個打俾你？好彩有 Simple Secret For Incoming 功能，如果手機靜止時有來電，來電人的資料就唔會顯示，直到有人拎起部機先會顯示出黎。
▲仲有一個 Clip Now 功能
▲Cap Screen 就明，咁咩係 Memo 呢？籮文首先左上角篤一篤
▲再拉落去暫存。之係不論你去到咩頁面，屏幕左面就會一直 Keep 住有隻角
▲拉返隻角出黎就可以見到頭先 Cap 嘅 Screen Memo
▲放手機喺枱面，點知有電話打黎，怕俾啲行過嘅人見到邊個打俾你？
▲好彩有 Simple Secret For Incoming 功能，如果手機靜止時有來電，來電人的資料就唔會顯示，直到有人拎起部機先會顯示出黎。
影相功能非主打 但都有 Manual Mode
後鏡頭只有 800萬像素、前鏡更只有200萬像素，顯然依部 Crystal 2 唔係主打影相啦。像素雖然低，但成像都唔差，並且有多種模式可以選用，最重要梗係有 Manual Mode 手動模式啦，但係手動模式冇得較光圈快門，只可以較 ISO 同 白平衡等⋯⋯
▲後鏡頭只有 800萬像素、前鏡更只有200萬像素
▲配合零邊框黎影相，部機直頭好似透明咁
▲有多種模式可以選用，最重要梗係有 Manual Mode 手動模式啦
▲但係手動模式冇得較光圈快門，只可以較 ISO 同 白平衡等⋯⋯
▲同螢幕表現一樣，Crystal 2 拍出來嘅相保持到原來色彩。而成像驟眼睇好似 OK
▲只要輕輕放大少少就可以見到即使係光位，油畫化都十分嚴重
▲光暗對比係做得到，即使有高光燈飾，前景深色車都可以見到大部份輪廓
▲但暗位雜訊表現一般
▲認真影相唔係好得，唯有玩下啲得意影相功能，例如依個 Bleach Bypass。（上圖為冇 Effect，下圖為有 Effect）
籮文：「規格好一點就完美了」
同上一代一樣內搭 Snapdragon 400 及 2GB Ram，加上相機都係得800萬＋200萬像素，Crystal 2 實屬中階規格，但係擁有突出外型嘅優勢，以貌取「機」嘅用家的確有可能心動，但我對佢就冇乜 Feel。
售價：＄3,680
查詢：三禾電氣（23740618）
相關文章:
Sharp 大阪堺市工廠全面停產 日本僅存電視液晶面板廠正式消失
分享到 :
最新影片
