「抬頭望上去」係乜？依莉詩 + Summer 帶你睇海洋公園聖誕 6 大特別活動

最近電視成日播住「抬頭望上去…」呢句洗腦歌詞，原來係介紹海洋公園的聖誕活動－萬花筒冰上匯演。今日我依莉詩同 Summer 就率先睇咗，全程又真係無底過頭啵！

1) 萬花筒冰上匯演

今年怡慶坊再唔係室內燈海，取而代之的是一場集動感與華麗於一身的冰上匯演。以光雕投影技術打造色彩幻變的場景，再由滑冰高手施展飛跳、高速旋轉等優美溜冰花式，展現凌空倒掛等高難度技巧，挑戰人體極限，視覺非常震撼！

地點：怡慶坊

▲ 一開始由小丑推出萬花筒來點題。

▲ 接著一位外籍美女伴隨一首普通話歌的音樂開始施展身手，全場都 O 晒嘴。
▲ 表演中有多個空中高難道動作，難怪叫大「抬頭望上去…」啦！

2) 聖誕老人公園巡遊

為慶祝聖誕，海洋奇觀的飼養員換上了一身聖誕老人服裝餵魚。好彩的話聖誕老人仲會游過嚟同你合照架！

地點：海洋奇觀

▲ 聖誕老人一出，無論魚定人，大家的注意力都去晒佢度呢！

▲ 想過一個難忘聖誕夜的話，只要付出每人 $1580 (成人) / $1380 (小童)，就可以係館內通宵紮營，揭開海洋世界晚上的神秘一面。(唔知 D 魚會唔會俾鼻軒趕嘈到瞓唔到呢？)

3) 幻彩聖誕屋鬼馬聖誕照相館

對香港人嚟講，影相位當然重要啦！海濱樂園廣場就準備了兩個影相熱點，聖誕老人係佈滿七彩鮮艷的萬花筒圖案的「幻彩聖誕屋」等你同佢合照，而「鬼馬聖誕照相館」就特設巨型鏡子裝置，映照出顛覆常規的視覺特效，讓拍攝超現實合照。

地點：海濱樂園廣場

▲ 聖誕老人係佈滿七彩鮮艷的萬花筒圖案的「幻彩聖誕屋」等你同佢合照。

▲ 「幻彩聖誕屋」唔係好大，不過裝飾得好有歡樂氣氛。

▲ 「鬼馬聖誕照相館」就特設巨型鏡子裝置，映照出顛覆常規的視覺特效。影呢 D 相當然愈多人愈好睇啦！
▲ 每日下午 5點 45分，海濱樂園廣場的聖誕樹旁會有「點亮聖誕」慶典 ，「歡樂聖誕頌」合唱團將會用美妙歌聲散播溫馨暖意！

4) 萬花筒工作坊

小朋友想自製獨一無二的聖誕禮物送俾爸爸媽媽？可以去威威天地的「萬花筒工作坊」親手製作萬花筒。聖誕小精靈更會隨時在威威天地現身，同大家合照添！

地點：威威天地

▲ 原來萬花筒都唔易整架！聖誕小精靈好有耐性咁教我地呢！

▲ 走之前一定要同呢隻可愛的薑餅人影相先得！

 

5) 聖誕面部彩繪服務

怡慶坊附近的臉部彩繪攤亦由萬聖節恐怖妝改成化聖誕或動物主題妝的地方，只要俾 $100-200 就可以成為 party queen。

地點：怡慶坊

▲ 用咗短短 15分鐘，就畫好靚靚的雪花圖案啦！

6) 繽紛聖誕套餐

玩咗成日，聖誕大餐一定唔少得，呢個主題套餐有雪人、飛天鹿車同水晶球，每一道菜都好有心思架。(每位 $358 +10%服務費)

地點：海龍王餐廳、冰極餐廳

▲ 暖笠笠雪人湯原來係煙火雞栗子忌廉湯。

▲ 飛天鹿車就係煙鴨胸鮮果沙律。

▲ 主菜火雞響噹噹由栗子、燒火雞、蜜餞火腿砌成。

▲ 願望成真水晶球就係香芒慕絲配紅加侖子。

依莉詩點評

比起上年，只保留聖誕老人屋同聖誕樹，而無咗室內燈海同多啦A夢影相屋，真係有 D 失望。唔單止少咗影相位，今次所介紹的活動，如：難忘聖誕夜、面部彩繪都要額外收費，所以吸引力唔大。值得一提的是冰上匯演，除了第一幕用上普通話配樂有 D 怪之外，其他部份都相當精彩，去開的話一定要睇啊！

 

聖誕氣氛 ★★☆☆☆

必影指數 ★★☆☆☆

必玩指數 ★★☆☆☆

 

日期：2015年12月12日至 2016年1月3日

地點：香港海洋公園

分享到 :

最新影片