衛生防護中心數據顯示，心臟病係香港排名第三位嘅疾病殺手。心臟病之所以係殺手，除咗因為佢冇特別先兆「來去如風」難以預測，更因為病發會令心臟突然停止跳動，大大增高死亡率。由病發開始起計，生還率每分鐘下跌百分之四至八，所以把握救命黃金時間尤其重要。人命悠關，香港團隊 Heartisans 決定用創新方法嚟預測潛在心臟病風險，在病發前預先警告患者，俾佢哋有足夠時間求救。
團隊 Heartisans 喺 2014年四月開始研究一款手帶，透過脈膊收集心跳數據預測心臟病發。小編同過佢哋嘅創辦人之一黃相淵傾過，佢話有唔少醫學研究發現量度心跳同心跳之間嘅距離（R-R Interval）同埋變化，有助提早發現心律異常狀況，預測突發性心臟病。一般人想知自己有冇心臟病，做身體檢查嘅時候醫生可以用心電圖分析心律，但要預防突發性心臟病唔通 24 小時要 check 住心電圖咩？即使你係高危一族亦都冇可能長時間夾住隻手指、孭住部機 24 小時監察住。故此，Heartisans 希望用一個方便舒適嘅方法為高危心臟病患者提供預測同埋警示，提醒患者心臟病發的潛在風險。
心臟病康復者率先測試
黃相淵話佢哋嘅手帶有 Machine Learning 嘅演算法，簡單嚟講即係識得自行分析收集返嚟嘅數據，並向使用者提供有用嘅資訊，例如警告患者有潛在心臟病發風險。佢哋同緊香港大學合作，嚟緊會做臨床實驗，俾 D 心臟病康復者同埋植入心律除顫器嘅患者戴上 Heartisans 手帶。因為康復者嘅心臟病復發率比一般人高，希望佢哋戴咗之後可以驗證到理論嘅可行性及數據分析嘅可信性，然後再推廣出市場。
以「救命」作為目標
黃相淵深明「上醫治未病」呢個道理，佢認為自己嘅產品雖然聽落好似係個「不可能嘅任務」，但佢覺得以物聯網嘅發展趨勢嚟睇，數據分析比純粹提供資訊嘅價值更高，希望藉此令用家有一個更健康嘅生活模式，「Apple Watch 話你聽你心跳係幾多根本就冇意思㗎，我哋要創造價值俾用家」。一如好多其他嘅創業公司，佢哋秉承企業家精神，抱住「唔試過點知唔得」嘅想法成立 Heartisans，「當初我哋都掙扎咗八、九個月先決定要瞓身開公司，每一步都好難行，唔係話想做就開始，團隊每日都仍然係 Trial & Error 中學習」，佢希望 Heartisans 手帶真正做到救命用途，造福用家。
Heartisans 上年入選數碼港創意微型基金，曾經獲注資大約 380 萬港元，現時正籌備臨床實驗，預計將會喺未來六個月分階段進行。
分享到 :
最新影片
