根據小說《The Price of Salt》改編而成，由男同志導演 Todd Haynes 執導嘅《卡露的情人》終將係 2 月 11 日於香港上映。 Todd Haynes 作品唔多，最為人熟悉嘅當然係 2007 年嘅《I’m Not There》；而今次亦唔係佢首次執導同性戀電影，早係 2002 年嘅《Far From Heaven》已經處理過同性戀題材。有留意 Todd 的話，都會發現佢嘅作品都係不乏大量提名及獎項。咁今次 CAROL 成功入圍奧斯卡獲得六項提名（最終失落「最佳影片」 sosad），而且仲令 Rooney Mara 成功奪得康城影后。到底呢部戲係咪真係咁吸引？又會唔會成為 LGBT 電影嘅代表作呢？
當生澀的 Therese 遇上貴婦 Carol
故事講述少女 Therese 嚟到紐約追尋夢想，佢渴望成為攝影師，但只能暫當百貨公司售貨員，生活猶如一潭死水，直至遇上來為女兒買禮物嘅貴婦 Carol 。Carol 優雅動人嘅外表同談吐舉止深深吸引住 Therese ，令佢怦然心動。 Therese 按捺不住聯絡 Carol ，兩人愈走愈近，再也無法遏止心底間嘅情感，並決定一齊出走。
必須要先說的是，係選角上相當好。 46 歲嘅 Cate Blanchett 飾演 Carol ，一向貴氣四射嘅 Cate 的而且確係 Carol 嘅不二之選；而另外一位女主角 Therese 則係由 Rooney Mara 飾演。相信好多人對佢最深刻嘅印象會係來自作品《龍紋身的女孩》，當時神秘感十足嘅 Rooney 成功演活 Lisbeth 令人為之一嘆。而今次挑戰嘅係個性生澀嘅 Therese ， Rooney 仍然表現得極為出色。 Cate 和 Rooney 兩人出奇地夾，無筆者一開始擔心嘅違和感，就好似當初睇斷背山時嘅 Heath 同 Jake 。
大量沉默畫面 更見電影實力和張力
整套 CAROL 並無太多音效或配樂，帶來嘅係更多無聲畫面；而呢啲畫面往往都係透過將鏡頭導向演員上。音效同配樂的確可以營造氛圍，但對於 CAROL 呢類題材嘅電影，無聲畫面往往先係最好嘅選擇：令觀眾更感受到壓迫嘅臨場感，而且可以更好咁專注係角色表現上。但唔係個個導演都敢放膽咁做，因為會非常缺乏娛樂效果，一旦處理不妥整套戲就會「悶到窒息」。不過 CAROL 並無出現呢類問題，反而更筆者感覺到整套電影由編劇﹑導演﹑製作﹑演員以至拍攝等等都有相當強大的實力，亦令成套戲更顯張力。不過可惜嘅係，始終香港觀眾睇慣 Hollywood 大片，鍾意誇張嘅娛樂效果；對於 CAROL 呢種展現形式未必接受同欣賞，筆者觀看優先場嘅時候亦見唔少觀眾提早離場，最早嘅更有半個鐘已離開。
拍攝講究細節 耗時十一年
電影設定係 1950 年代，而導演 Todd Haynes 為求更細膩嘅拍攝去展現當時環境，可以話係做足功課。先係參考大量同時期作品，採用具顆粒感嘅膠片拍攝，避免影像數碼化處理，以重現當時五十年代懷舊氛圍。而且服裝同場景亦非常講究，成功營造出兩位女主角間嘅愛與情慾，以及人際關係中嘅冷漠。耗時十一年嘅 CAROL 的確係畫面上令人驚嘆，尤其係具顆粒感卻又不失清晰度嘅膠片拍攝，非常有歐洲味道；而且服裝同場景，以至整個造型，都非常貼近五十年代的感覺。
總結：女版「斷背山」 唯美而細膩
會賦予 CAROL 「女版斷背山」，並唔單係因為 CAROL 係 LGBT 電影（否則筆者寧願將佢同 Blue Is the Warmest Colour 去作比較，雖則兩者走向不太一樣）；而係因為 CAROL 同斷背山一樣講求細節，畫面和情節都非常細膩，步伐緩慢而不無聊。 Carol 和 Therese ，Ennis 和 Jack ，這兩對組合都非常唯美，的確令人非常容易把他們聯想在一起。而兩者最相同之處，筆者就覺得是像在斷背山飾演 Ennis 嘅 Heath Ledger 所講「與其話呢部係同性戀電影，更似一部兩個男人（女人）探索同性之間感情嘅電影」。最後，雖則 CAROL 相當出色同耐看，不過仍然不及斷背山咁經典。《斷背山》係部睇完會崩潰到難以收拾情緒嘅淒美電影，而《CAROL》則係會心微笑（好似少少劇透了）。或者差距就在此。
分享到 :
最新影片
