上個月依莉詩走訪幾間懷舊士多，發現他們都有自己一套的生存哲學，而今次我就去到觀塘工廈內的幾間零食 Outlet，看看這些新派的零食小店如何活用社交媒體作宣傳，吸引一眾零食狂同哈日族瘋狂掃貨！
青木町－期間限定零食山
在無論日頭定夜晚都人車頻繁的觀塘區，表面上係唔少上班族聚集的地方，但當一走進駱駝漆工廈，一打開升降機門就會發現別有洞天，一座座零食山正在呼喚我。每一個零食山都分為不同的價錢有 $20、$28、$32等，如果成為會員，一次過買幾件仲會有優惠，絕對是瞄準零食控的掃貨心理。店內主打日本零食，北海道品牌 Hori、紅帽子 Tivolina、明治 Meiji、固力果、桃哈多、百邦等都有，大部份更是期間限定版。
▲ 每一座零食山都是同一個價錢，掃貨時都唔洗逐件諗價錢，方便好多。
▲ 雖然眼前已經好多款零食，但笑容甜美的負責人 Jessica 就表示「因為新年所以停咗一段時間無入新貨，3月中會有新一批貨返到。」好期待啊！
年輕人開店要多學習
正當我選擇困難的時候，發現這裡除了零食，旁邊有一排雪櫃售賣急凍海產。一問之下，原來 Jessica 的家族經營食品生意，「屋企人本身同日本人的關係好，都好關照我們這些後輩，而我同家姐 Carrie 又注意到香港人對零食的需求，因此決定於兩年前創業。」雖然她們都曾經在零售業工作，不過 Jessica 坦言創業同打工有好多不同的地方，「由入貨到定價，設計到宣傳，好有多事都要學習，除了上網同看書，我們會參考區內的零食 Outlet ，互相學習。」面對區內、區外的競爭愈來愈多， Jessica覺得每一間都有自己的特色，唔怕被搶生意，「我們只做日本零食，每季有200幾款，而且會入唔少期間限定的零食，希望藉此做出自己的特色。」
▲ 除了售賣零食，旁邊設有凍櫃，售價一些急凍的日本料理食材，長腳蟹、北海道刺身帶子、廣島蠔等等，想係屋企食好西的朋友要睇下啦！
Social Media 同客人做朋友
在工廈開店人流始終不及地舖，在我到訪的時候人流都只有小貓三四隻，Jessica 表示「唔同時段都有唔同的客人，星期一至五 OL 或者係區內工作的人Lunch 或放工先會比較多人，而星期六、日，工廈就變咗商場咁，多好多一家大細來掃貨。」至於選擇工廈開店，除了因為租金成本低，主要為了方便拆貨，「我們每次返貨都用 20呎貨櫃，工廈的停車場先夠大拆櫃卸貨，而且舖面夠大可以當作貨倉，比較方便。」
要解決人流較少的問題，二人選擇了網購這條出路。她們在上年 4月開設網店，推出免費送貨，吸引更多打工仔組團買零食。另外更開設 Facebook 和 Instagram 帳戶，除了介紹新貨外，更會講下生活上的事，同客人交流互動。「不少都有客人會拎住個 Post 上來問件貨仲係邊。」最近她們更不時邀請 Blogger 及 Youtuber 分享試食心得 及 在店內舉行粉絲見面會，大收宣傳之效。
▲ 除了 Facebook 和 Instagram 的用戶可以 Like 同 Follow 成為會員，享受優惠價外，還可以以傳統方式登記，定期接收資訊，可以說是大包圍。
樂駝柒－卡通零食吸客
▲ 門邊的貨架排得密密麻麻得眼花撩亂，好有日本雜貨店的感覺。
▲ 走進店內有很多款式的日本藥妝，當中有唔少是港人到日本必掃的款式，而且定價不是太貴，用晒可以在這補補倉。
▲ 還有不少日式家品，入到去就好似尋寶一樣。
開業多年一腳踢
在工廈開店，黃小姐坦言會遇到人流少的問題，「這一兩年多了不少自由行，不過近排經濟唔好，又開始少，而且過年洗完一大筆，本地人唔會點用錢住。」那小朋友逗到利是，不會用來買零食嗎？黃小姐更笑著說，「依家好多家長都會幫小朋友儲起，唔會比佢地亂洗，所以我們做 OL 同 媽咪生意比較多。」既然生意不太好，為何不做點宣傳呢？原來黃小姐鬆容地道「我都想擺上網賣，但無人手。平時自己一腳踢，幾乎無停手。只是新年隔咗一排無返貨，所以先有少少時間上網睇下資訊，接觸外界。」
▲ 雖然樂駝柒沒有網購，不過 Facebook 同 Instagram 偶然都會有一些新貨介紹，看來都不像黃小姐說得咁宅吧！
28food －二千呎特大零食場
經青木町的負責人 Jessica 推介下，我離開駱駝漆大廈，走到觀塘工業中心的 28food。藏身於停車場內，雖然是地鋪，不過亦唔算多人。門口插了幾支日文的旗幟，好像日本的特賣場。2千呎的鋪面，員工比較多，相比起其他兩間少了一份人情味，大家都在密密做，想傾句計都有難道。而一行行的貨架佈置，加上分為原價、會員價 和 批發價幾個價格，感覺上同阿信屋差不多，只是價格方面比較平同抵買。
▲ 雖然這裡的賣點不多，不過勝在老闆自己親到日本買貨，而且定價相當吸引。
▲ 價格分為原價、會員價和批發價比較混亂，當中如果以批發價整箱買，價格就最低，不妨同同事團購吧！
10 大必掃日本直送零食
介紹咗咁耐係邊買，當然要推介下當中的特別零食啦！
1) 近大金槍魚杯麵
呢款杯麵早前係日本大熱，據說一個月內就沽清150萬個，可以話一麵難求。湯底魚香味濃郁，難怪原價 $22、會員價 $19.3 個杯麵都要限購啦！
2) 不二家 Hello Kitty X 牛奶妹福袋
Hello Kitty 同 牛奶妹合作的福袋唔只包裝睇得，入面 5包不同的零食之外，仲有貼紙送，原價 $66.8、會員價 $58.5、批發價 $50.1，相當抵買。
3) GunDam Cafe 蛋糕
去日本買手信其中一款常見的就是 Cafe 蛋糕，一盒十幾舊，派比同事就最好。而呢盒印有 GunDam 圖印的禮盒 ($98) ，或者連自己都唔捨得食呢！
4) 麵包超人朱古力
麵包超人朱古力 ($22) 一盒有 6粒，粒粒都係麵包超人同佢 D 朋友的立體造型，其中一粒仲係士多啤梨味，睇得又食得。
5) 卡通曲奇
唔知點解，係香港食襯有卡通公仔的零食都係得個樣，但日本的就不同了，呢 D My Melody、Snoopy 同 鬆弛熊的印花曲奇 ($30)一盒 2塊，又靚又鬆脆。
6) Tsum Tsum 條裝餅
條裝餅平時食得多，呢兩條 Tsum Tsum 條裝餅 ($10.2) 唔只外面印有 Tsum Tsum 公仔，每塊餅都有米奇頭，超可愛！
7) Pocky 士多啤梨忌廉味百力滋
士多啤梨味百力滋食得多，呢款冬季限定士多啤梨忌廉味百力滋，除咗粗 D 同 短 D 之外，味道比起普通的濃厚，而且有一粒粒士多啤梨脆，雖然唔多，但加強口感，配合中間的朱古力餅就更好味，原價$20、會員價 $80/5件。
8) 明治 Galbo Ball 極品士多啤梨脆
同樣係冬季限定的士多啤梨脆有3層結構，入口即融的白朱古力粉 加埋士多啤梨朱古力甜而浪漫，最後的朱古力脆波一淡咬落去口感好有層次，原價 $16.8、會員價 $14.7、批發價 $12.6。
9) Dyatsu 童星點心麵－西京拉麵味
童星麵食平時食來食去都係個兩種味，而西京拉麵味就好似麵豉湯咁，味道濃郁，原價 $12、會員價 $50/5件。
10) UNA 烤菇
依家的人愈來愈注重健康，呢款菇小食唔知啱唔啱大家心水？食落有少少菇味同雞湯味，而且好脆，好似食蝦咁，夠晒特別，原價 $20、會員價 $80/5件。
(1) 、(2) 、(6)、(8) ：28 Food
(3)、(4) ：樂駝柒
(7)、(9)、(10) ：青木町
