之前已經有不少揣測指新嘅 iPhone 7 會踢走 3.5mm 嘅耳機插口，而今日喺網上就流傳首個疑似係 iPhone 7 嘅 case ，似乎增加咗呢個講法嘅可信性。從流傳嘅照片中可見，iPhone 7 嘅底部將會只留低 Lightning 同埋兩個喇叭位置嘅出口，意味住嚟緊嘅 iPhone 7 有可能係轉用 Lightning 耳機或者藍牙耳機，並且加入立體聲喇叭。
喺外型方面，呢款流傳嘅 iPhone 7 就顯示出機身都係用類似 iPhone 6 系列嘅機身，即邊位圓滑但前後平滑嘅設計。由於流出嘅 case 無講明尺寸大小，所以機身大小亦都未能夠揭曉。而相機位置都大咗，不過分析指果個鏡頭位根本容納唔到兩個鏡頭，因為鏡頭之外仲要有位置放埋 LED 補光燈先係。所以亦有傳言話雙鏡頭可能只出現係 iPhone 7 Pro 度，但單靠呢幅相片就不得而知了。
之前亦有傳言話 iPhone 7 將會移走機背兩條天線 Bar 同埋鏡頭位置唔再突出，但好可惜係呢幾幅 case 嘅流出相片都無法確認是否屬實。
來源：9to5Mac
分享到 :
最新影片
