香港係美食天堂就係人都知，不過要食到米芝蓮級的大廚的作品都未必咁容易，唔係要早幾個月訂位就係好貴。不過係 TASTE 美食節就可以一次過試到多款名菜，重點係最平 $50 就可以試到，我依莉詩當然唔執輸衝咗去啦！
14間頂尖餐廳招牌菜等緊你
TASTE 美食節足跡早已遍佈全球 22個城市，而今次係首次係亞洲區舉行，更匯聚咗 14間頂尖著名餐廳，例如：米芝蓮二星的法國菜 Amberz 及 粵菜都爹利會館、倫敦著名高級餐廳 Duck & Waffle 等，呈獻近 50道頂級招牌菜式。每碟由 $50 至$380 不等，雖然份量細少少不過就可以一次過試到多款名菜。
▲ 場內以 CROWNS 皇冠代幣消費，1個等於 $10，所以買嘢食之前記得去場內的 CROWN BANK 增值啊！
▲ 基本上每日分為 2個時段：中午 12時30分 至 下午 4時 30分 及 晚上 6時至 10時，不過星期日就不設晚間時段，所以要去就趁早啦！
▲ 係場內有大大小小的攤位，當中掛住紅色招牌的就係頂尖餐廳。而攤位外會貼有餐牌，寫上 3 款招牌菜式同 1款以紅框表示的代表菜式，清楚易明。
▲ 繞了會場一周，我最後選擇了 Aberdeen Street Social 的「北海道帶子刺身配鏗魚啫喱、蘋果、紫蘇、牛油果及日本芥末」，如果係店食要 $228 ，而美食節中只係 $100，十分抵食。帶子上的鏗魚啫喱鹹鹹地，連埋蘋果同紫蘇一齊食，玩味十足。
▲ 另外，我揀咗 Amber 的「日本生蠔配生海藻、馬鈴薯、生紅蔥、蕃茄及豬肉小香腸脆片」，平時餐廳要預早一個月訂位，依家 walk-in 就食到，仲要 $120 咋！海藻、馬鈴薯等材料打成泡泡，食落軟綿綿，口感特別，而日本生蠔有濃郁海水味，一試難忘。
頂尖廚師大師級示範
除了品嚐名菜，每個時段都有來自世界各地的名廚係 Bosch 美食舞台 同 福滿樓攤位一展身手，等你可以一嚐手藝之餘，仲可以從中偷師！
▲ 名廚即場示範如何將普通的食材變成美食。
▲ 師傅仲教導我地如何揀生猛龍蝦。
相關文章:
Corsair 為 Mac 推出全新電競鍵鼠 屬 K65 Plus 鍵盤及 M75 滑鼠系列配專屬藍白雙色 Apple 更新 Mac 週邊配件 Magic Trackpad 等全線改用 USB-C
與頂尖大廚會面
另一個特別的活動就係 Chef’s Table。大家可以隨便坐低同本地及國際頂尖大廚會面，分享飲食經驗同炮製美食心得。如果遇過咩烹飪難題都可以等佢地一一解答。
▲ 名廚 Paul Lau 同身邊的人都好 nice 呢，不停邀請我地傾計，可惜我英文麻麻地，怕雞同鴨講。
美酒配美食
有美食的地方當然有美酒，場內除了有紅白酒及手工啤酒外，更有清酒吧同香檳，最平 5個代幣有交易。另外，仲有頂級調酒師、紅酒及高級酒品大師班，鍾意的可以隨時跟佢地學習。
▲ 場內有好多不同的酒類提供。
▲ 仲有唔少佐酒小食。
環境優閒，音樂助慶
雖然大部份攤位都不設坐位，不過攤位與攤位之間都有枱凳，等你可以行下、抖下、食下 又 飲下，非常輕鬆。
▲ 就算唔食嘢，都可以同三五知己坐下傾下計。
▲ 現場仲有 DJ 打碟，增加氣氛。
▲ 仲有籃球機可以玩添。
依莉詩：「好似去咗外國一樣！」
呢個美食節同平時會展的好唔同，除咗匯聚著名餐廳外，仲著重廚師同遊人的交流，整個氣氛都好輕鬆捨意，就好似去咗外國一樣。雖然對我嚟講無論入場費定食物價格都唔係一個平常的消費，不過總算係難得的體驗，可以用負擔得起的價錢試到平時食唔到的名菜，感覺很幸運。
Taste 美食節香港站「Taste of Hong Kong」
日期：2016年 3月 10日至 13日
地點：中環新海濱
入場費：
預售票價：普通門票 $138/位（平日）、$168/位（周末）
即場票價：普通門票 $168/位（平日）、$198/位（周末）
相關文章:
Corsair 為 Mac 推出全新電競鍵鼠 屬 K65 Plus 鍵盤及 M75 滑鼠系列配專屬藍白雙色 Apple 更新 Mac 週邊配件 Magic Trackpad 等全線改用 USB-C
分享到 :
最新影片
