港女上個星期去左日本，除左學做垃圾分類之外，當然不少得去觀光。如果有睇過港女上年出過嘅幾篇遊記（自我植入廣告：一、二、三），各位讀者大概會知道我唔係咁鍾意去旅行行街 shopping （因為無錢），反而睇下風景，了解下風土人情較多。今次係日本都唔例外，我訂出黎嘅觀光行程重點，都係為左一睹「富士山」的風采～
好！可！惜！上個禮拜東京差唔多日日都落雨，又大霧，本來可以睇到富士山的行程，最後乜都睇唔到，只係見到白茫茫一片，老實講真係有少少失望嘅。但皇天不負有心人，最後，港女竟然超級好彩，俾我係呢個角度睇到富士山！
影到呢張相真係完全係一個巧合，港女覺得係日本給我的一個紀念品。話說臨走當日，由於港女同友人的行李太重，拎住周圍走好唔方便，決定提早少少搭早一班機返香港，又真係咁啱得咁橋有位，仲要係窗口位，於是我地係天黑之前就上左機。同行友人話我地個機位係機尾，可能坐得唔係咁舒服，不過我就無咩所謂，反而仲幾鍾意坐機尾添！撇開安全問題唔講，坐機尾遠離中間引擎及機翼，睇風景又開心啲，又唔使咁嘈～
港女次次搭飛機都可以在 30 分鐘內訓著，今次都沒有例外，雖然日光日白，但真係敵不過周公急 call。訓訓下，係耳機聽到機長開咪，話「我地將會於一分鐘後喺右手邊見到富士山。」咁啱我地坐右邊窗口位，坐隔離嘅友人即刻拍醒我，叫我睇下窗口！一開始其實咩都睇唔到，淨係有好多雲，過左半分鐘到，真係見到富士山山頂，全世界即刻拎起相機影相。（港女提醒大家，飛機上最好唔好用電話相機電腦，如果真係要用，就要避免係飛機起飛或降落的時候使用，使用的時候亦要關掉所有裝置上的藍牙、數據、WiFi 等傳輸功能）
係呢個角度睇富士山，港女真係諗都無諗過，後來同其他朋友傾開，佢地仲話我知，原來我要係多雲的日子先影到，亦要咁啱雲線係圖中的位置先有「仙景」的效果。嘩！加加埋埋咁多巧合先影到的一幅相，可遇不可求，港女真係受寵若驚，ありがとうございます！
分享到 :
最新影片
