最近好多人講 FinTech，大家都以為 FinTech 係好先進又係好賺錢嘅科技，先唔講賺唔賺錢，但就肯定唔係 Rocket Science，其實大家每日生活都有機會接觸到。大家日日用緊嘅八達通已經算係早期嘅 FinTech，不過當年就仲未有 FinTech 呢個概念，呢個 Term 都係近年先至出現。唔少人直覺以為「FinTech 咪就係 Apple Pay 囉」，其實 FinTech 唔單止「畀錢」呢一瓣，成個金融行業有好多地方都希望用科技嚟幫手發展，呢 D其實都算係 FinTech 嘅範疇。
iPad 變身碌卡機
例如由 Twitter 聯合創辦人 Jack Dorsey 自己搞嘅另一間公司 Square，就係透過幫助小商舖喺 iPad 上插一個碌卡裝置，就可以直接用金融卡服務，配合 iPad 安裝 POS App，簡單講就係可以用 3G 上網嘅隨身碌卡機兼收銀機。
好多公司都只係「一人生意」，未必肯花錢裝部 POS 收銀機，用 Square 就幫到佢地解決會計同收錢嘅問題。唔係大生意? 你以為啦! Square 喺 2014 年就已經為全球數百萬商戶處理咗 300 億美元交易，而且已經喺上年年底 IPO 上市。
Online Game 虛擬貨幣都可以網上投保
另一個 FinTech 應用方式就係「網上投保」。依家你要畀幾多保費，背後都係有一套精算方法去計，中間考慮嘅要素包括你嘅年齡、工作性質同病歷。話明係 FinTech，當然就要用科技去代替人腦去計。中國其中一家最威水嘅獨角獸公司叫做「眾安保險」，亦係中國最大嘅網上投保公司。
呢家估值有 50 億美元以上嘅公司，2012 年先開始籌建，完全走網上生意嘅路線，而且投保嘅物件仲可以完全虛擬，你玩 Online Game 嘅虛擬貨幣都可以投保防止偷竊盜險，而你喺網上嘅消費亦可以投安全保障責任險，完全超出咗大家嘅想像。據講喺 2015 年眾安在線已經有超過 2.5 億名客戶，賣出咗 16 億張保單。
工人姐姐匯錢靠 Bitcoin
又例如數碼港有間公司叫 BitSpark，就係透過電子貨幣而做匯款服務嘅生意。
原來香港而家有成 14 萬菲律賓人做家傭工作，平均每月都會將 $3,000 至 $4,000 港幣兌換成比索匯返菲律賓，但如果經傳統方式匯款就需要大約 2.5% 手續費，仲未計匯率嘅風險。
而 BitSpark 就係透過買入虛擬貨幣，另一邊廂遠在菲律賓嘅工人姐姐屋企人就可以去當地銀行、當鋪、找換店兌返當地嘅貨幣出嚟，中間嘅手續費更只係 1%，比傳統服務又平又快！
所以話，金融科技真係好多範疇都用得著，你以為屋企個工人姐姐落後過你？佢可能掉轉暗笑你仲走去銀行排隊入錢。你有 FinTech 橋？可以考慮參加數碼港創意微型基金呀。
香港人生活乜都同錢銀有關，其實係好有條件搞 FinTech，咪日日諗住炒 iPhone 啦，不如諗條同 FinTech 有關嘅好橋，然後去數碼港申請數碼港創意微型基金 (CCMF) 仲實際啦！
相關文章:
財政司司長網誌： 香港全力發展 AI 產業 推動科技創新與經濟升級
分享到 :
最新影片
