春夏又到了，面部皮膚的清潔變得更重要。之前我依莉詩就介紹過好多部洗面機，不過大多都係刷毛設計，部部都係差唔多，而今日的 B.KETTNER 發佈會就展示出一部比較另類的洗面機，不但係矽膠表面，仲要防水識震，係咪好勁呢？嗱～唔好諗錯隔離呀！我講緊洗面機咋！
另類洗面機 矽膠表面不易藏菌
呢部 VisoVibe 微震淨肌舒緩潔膚儀走另類路線，以矽膠表面代替掃毛刷頭，同時利用柔和軟粒面低頻交替震動按摩肌膚以導出毛孔污垢。因為硅膠表面經過抗菌處理，比起掃毛刷頭不易藏菌，所以唔駛經常更換擦頭。不過，亦因為硅膠表面比較硬，難以深入面部死角，眼邊同鼻邊都用唔到，所以清潔力亦較低，我諗呢部洗面機比較適合平日唔化妝的靚太。
▲ 潔膚儀以矽膠表面代替掃毛刷頭，減低皮膚拉扯的同時可以對面部進行按摩，提昇皮膚緊緻度。
▲ 正面的柔和軟粒面摸落係刷毛咁柔軟，不過感覺都幾得意。
▲ 潔膚儀側面睇都幾厚身同墜手。
身體面部兩用 豐胸通淋巴
除咗正面的柔和軟粒面可以用嚟清潔面部外，潔膚儀的背面比較粗粒，配合兩段震動模式可用嚟按摩身體唔同部位。係發佈會上資深美容治療及專業產後修身專家 Karen Loke 仲提議我地可以利用潔膚儀的微震動按摩腋下同三角位，以促進淋巴液回流，仲有豐胸效果添！聽落係好多功能，不過按摩完腋下我就唔敢用番嚟洗面了，哈哈。
▲ 潔膚儀的背面比較粗粒摸落比較硬。
防水設計 沖涼都用得
無論用嚟潔面定潔身，通常都會係沖涼的時候一次過進行，而潔膚儀係防水設計，充電後可用 50次。咁淋浴定浸浴都可以用時使用，唔怕入水了。另外，潔膚儀開啟後 3分鐘會自動關閉，咁就唔會唔記得熄了。
▲ 充電式的防水設計，沖緊涼都用得。
▲ LED燈顯示電量，有無電一睇就知。
▲ 潔膚儀附送柔和潔臉泡沫以分解毛孔內污染物及化妝殘留污垢。
▲ 潔臉泡沫加咗水之後會起泡，而且散發淡淡香味。
依莉詩：「矽膠 + 防水，仲會震！」
呢部洗面機同之前試過的好唔同，用矽膠代替刷毛，感覺上就係無咁貼面，鼻邊同眼周就係貼唔到，清潔力當然無咁強。不過換來的就係更強按摩功效，單單可以通淋巴已經好吸引，加上矽膠無咁易藏菌又易清潔，咁就唔駛成日換刷頭。對於平日唔化妝又要靚的女仕應該幾夠用，就快到母親節，可以考慮下送俾媽媽啊！
查詢：www.bkettner.com
分享到 :
最新影片
