Tesla 相信好多 wire 民同小編都好想買返架，但始終個銀行戶口唔爭氣，至於聽落好似平啲嘅平價版 Tesla 3 就仲要等多幾年先有。今日，Tesla 就推出 2016 年升級版 Tesla Model S。究竟今次升級版同舊版有咩咁大分別，值唔值得升級換車？
外型更似 Model X
今次 Tesla Model S 2016 升級版同舊版最大分別，在於車頭鬼面罩部份明顯比舊版縮細咗，用咗更類似 Model X 嘅一體式設計，車身裙腳嘅顏色亦由黑色改用咗同車身一致嘅顏色，成部車嘅感覺更一體化，而且車尾部份嘅全新擾流板設計，令到全新 Model S 更加流線更「型仔」。
手術室級數空氣過濾系統
好多時大家坐車坐得耐都覺得頭暈暈，除咗同司機技術好壞有關之外，好多時都係因為車廂內嘅空氣有關。Tesla Model S 2016 升級版，就特別配備咗原本應用喺 Model X 上嘅 Tesla HEPA 空氣過濾系統，可以有效去除車廂內至少 99.97% 嘅排放懸浮粒子，仲可以隔阻當中嘅致敏原、細菌同埋污染物，其中嘅「生化武器防禦模式」（Bioweapon Defense Mode）更可以喺車廂內形成氣壓保護乘客，聽落好似好high tech。
充電更快行得更遠
充電車其中一個重點就喺要充電要快，先滿足到車主嘅需要，Model S 2016 升級版由以往嘅 10kW 充電裝置升級至 15kW，配合連接 380V 電源嘅 Type 2 牆上充電器使用，可以每充電一小時，就可提供 75KM 嘅行車距離，都算係一個小改進。
各位 wire 民如果想親身體驗一下全新 Tesla Model S 2016 升級版，由即日起至 5 月 12 日期間，會在太古廣場展出，而 5 月 13 日至 5 月 26 日，則會在太古城中心展出，經過可以去試坐一下，咁就唔駛成日諗住call 車先有得坐啦！
相關文章:
Tesla 宣佈 2025 年推出 Model Q 售價 3 萬美元以下 + 主攻入門電動車 香港 Tesla 中速充電開始收費? 車主惡耗 Elon Musk 鉅額薪酬案再次被拒 Tesla 股東投票通過但無法扭轉裁決
分享到 :
最新影片
