聽到 Google Play 會諗到 D 咩？應該都係 Game 吧！為咗唔知乜東東，Google 搞咗個遊戲節，仲擺咗 7部夾公仔機係利舞臺俾大家免費玩，夾到手機可以拎走添！可惜…我依莉詩夾咗 4次都係 Tote bag 囉！
試完 Game 玩夾公仔
《Google Play 遊戲節》係利舞臺出面擺咗 7部夾公仔機，唔駛係商場消費，只要排隊試玩 2分鐘指定的 12款人氣手機遊戲就可以有 2次夾禮物機會，真 ‧ 免費！
▲ 今日係傳媒開放日，大家都夾得好興奮！
▲ 7部機咁多，加上利舞臺比較遠，我諗開咗都未必好多人排隊掛？
▲首先係 12款人氣手機遊戲入面揀 1個，玩 2分鐘就會有相關的遊戲優惠話你知。睇完之後就到戲肉！夾禮物！
近百份「寶物」 等緊你
有夾公仔機當然有禮物，仲要成 3,000幾份咁多！當中包括各樣充滿回憶和珍藏價值的童年小玩物、Google Play 精品 同 手機遊戲精品外，最吸引的當然係 Nexus 5X 智能手機 同 Nexus 9 平板電腦啦！
▲ 唔知各位 wire民有無玩過鐵皮玩具呢？
▲ 木質玩具都好特別架！
▲ 另外仲有 D 遊戲精品。
▲ 夾到糖都好丫！
▲ 不過…如果夾到狗碗就…
依莉詩戰績
雖然易夾過冒險樂園好多，幾乎個個都有收穫。不過都講番小小心得先，呢部夾公仔機係用 touch mon 控制，只可以按一次向前同一次向右，唔可以重覆，所以一定要襟實，啱位先放手。記著唔好太大力或者太細力襟，唔係感應唔到就會自動落個鉗。仲有，入面的禮物都係用方形盒裝好，要睇入面的字先知禮物係咩，所以唔駛用重量估禮物係咩了。至於我的戰績，好不幸用大家講，我夾咗 4次都係 Tote Bag，就算有過百款禮物都好，都係要睇運氣啦！
Google Play 遊戲節
日期 : 2016年4月29日 至 5月 4日
時間 : 早上 11時 至 晚上 10時
地點 : 利舞臺廣場 Open Piazza (銅鑼灣波斯富街99號)
相關文章:
日本或立法引入第三方 App Store 防止 Apple Google 壟斷 Palworld 官方澄清未推出手機版 稱已向 Apple Google 反映
分享到 :
最新影片
