講起激光劍唔少人都會諗起星球大戰，不過原來激光劍唔只係小朋友玩具咁簡單，仲可以係一項鍛練身心的新型運動。我依莉詩今日就去到 Crossfire 學習成為絕地武士！
玩劍練手力減 byebye 肉
咪以為只係拎住把激光劍揮揮下咁簡單，原來佢係一項 2006年開始源於意大利的劍擊運動同武術。當中結合咗合氣道、柔道、柔術、空手道拳法、法式和中世紀劍擊等劍法，非常專業。而 Crossfire 就引入咗呢項運動，更有導師教你對打的步法招式和不同轉劍的技巧。係漆黑的環境中跟著導師揮動激光劍，唔單止有型，而且可以鍛鍊到平時少用的手臀肌肉。話唔定練多幾次就可以減 bye bye 肉添！
▲ 導師 Lewis 示範雙手劍十分有型，相信要練番一段時間先可以咁靈活控制把劍呢！
▲ 除咗不同轉劍的技巧，最緊張刺激真係二人對決。係 30秒內擊中對方的手套次數最多就會勝利，不過要記住戴上手套和眼罩啊！
▲ 劍柄都係金屬製造，揮揮下都覺得佢幾重，而發光部份都幾硬淨，就算大大力打落另一把劍都唔會斷，唔需要留力。
▲ 劍柄有 6款，每款都參照唔同國家的劍法製造適合的劍柄，就好似日本刀法會向前劈，而美國式就會雙手揸。
▲ 原來每把激光劍都係 100%人手裝嵌，售價 $2000-5000 不等，絕非小朋友的玩意。
熄燈做運動更有活力
講完激光劍呢個新玩意，原來 Crossfire 仲有泡泡足球同射箭，而且全部都係夜光，熄燈玩超有氣氛。係 4千呎場地入面，有一半都鋪有仿真草地，適合不同運動。不過呢度大部份都係包場，臨時想玩可能要上官網睇咗有無開放時間先，因為負責人 Adwin HO 表示「我地唔係 party room ，反對定位自己係 event planing 公司，設計不同公司需要的活動。」至於以運動做主題就係希望 team building 期間，員工可以多 D 郁動。有趣的是，開業年半左右，小朋友 party 反而佔 40%，暑假更去到 60%，看來呢度的客人都好廣泛呢！
▲ 每一個泡泡足球都係夜光，熄燈之後超有氣氛。
▲ 4千呎的場地中，當中有一半鋪人仿真草，適合各類型的運動，而另一半地方就可以坐低傾下計，玩下 D 靜態活動。
依莉詩：「練到手力！有型唔兒戲」
本來見到 Crossfire 推出玩激光劍覺得好無聊，以為就咁拎支嘢揮下，對打下就算。不過去到先發覺原來玩都可以好專業，現場有導師教劍法同步法。好彩，對我呢 D 無乜運動細胞同跳舞根柢的人都算易跟。雖然，起初因為揮劍會用到好多平時少用的肌肉，所以覺得把劍幾重，手臀好攰。不過練咗 10分鐘左右都開始習慣，揮到一套劍法就好有成功感。之後熄晒燈同導師對打就更加刺激，好有拍電影的感覺呢！
Crossfire Arena
地址：鰂魚涌船塢里8號華廈工業大廈13樓D室
電話：9378 1875 / 9726 8238
收費：
Public Class－；3小時 $280/位（逢星期二或四7-10pm）
Private Class－1.5小時 $2,988/12位；$3,988/18位（任何時段）
分享到 :
最新影片
