依家的 Party 好多時都會放 Photo Both 俾賓客即時影相、印相留念，不過普通相又點夠即影即有咁有風味？而今日新出的 FUJIFILM instax SHARE SP-2 相片打印機就可以一次過滿足兩個願望，既可以即時印相，又有即影即有風味。我依莉詩今日就試過用佢嚟印相啦！
10 秒速印，清過即影即有
其實呢部唔係 FUJIFILM 第一部推出的迷你相片打印機， instax SHARE SP-2 的外型同 2014 年發佈的 Instax Share 差不多，只是由流線型機身變得「方」了一點，配合金色或銀色亦提升了時尚感。而今次最大的提升最要在打印速度同相片質素上。比起上一代 16 秒的打印速度，SHARE SP-2 只需 10 秒鐘就能列印一張照片，不過呢項改變好似唔多大分別，因為即影即有印出嚟之後都仲係要等嘛。至於相片質素採用了 OLED 技術，能夠分辨達到 320 dpi，明顯比上一代改善，甚至比起用即影即有相機影出來更清晰豔麗。
▲ 偏直線的多角形設計簡單俐落，感覺更加時尚。
▲ SHARE SP-2 同第一代差唔多大，只係輕咗少少，未去到好似其他牌子咁，可以放係手袋隨時印。
▲ 側邊有開關同 reprint 掣，按一下 reprint 就可以重印對上一張相，啱晒印合照用。
▲ 頂部有開關同剩餘相紙數目的燈，清楚顯示。
▲ SHARE SP-2 用富士 2×3 英吋迷你相紙，係街好易搵。
▲ 10秒就能列印一張照片，不過呢項改變好似唔多大分別，因為即影即有印出嚟之後都仲係要等嘛。
拼貼分割盡情發揮創意
相片打印機同用即影即有最大的分別就係可以後製。用手機影完的相可以先係 Apps 加濾鏡、拼貼 或者 分割 再印出嚟。Apps 用起來都算易，可以輕易調節相片的光暗度、對比度及飽和度，又可以將二至四張相片拼合打印成一張相 或 分拆成兩張相，不過因為只有每次只可揀一張相，拼合要入咗先可以揀其他相，如果唔小心就必須重新再搵一輪。至於手機連接方面，記招現場大部份的手機都可以連接，只是有短暫的連接超時。不過我的 Z5 就連極都連唔到，真係可惜。
▲ 每部機底部都有個型號，正常應該好快連到線。
▲ 手機 Apps 界面有點眼花，不過都幾易用。
▲ 只要一按就可以將相片分割，相當易用。
▲ 分割模式可以將一張相片分拆成多張相片打印，非常有趣。
▲ 拼貼模式可以合併兩至四張相片成一張，可以發揮更多的創意。
▲ 另外，社交平台模式可以直接列印 Facebook 同 Instagram 上的相，仲會顯示照片標題、like 數、名稱等。呢種新舊的對比十分特別。
▲ 除咗相片 SHARE SP-2 ，instax mini 70 同時推出 5款新色，熱情紅、午夜黑及星塵金同之前的色系一樣型格。
依莉詩：「快咗又清咗！」
其實今次的 Instax Share SP-2 同上一代分別不大，如果係新入手的朋友可以考慮下，不過有第一代的就未有太大誘因換機。因為無論打印速度幾快都無用， 即影即有印出嚟之後都仲係要等，不過呢種等待亦係即影即有獨有的味道。而我覺得今次最有趣的改變係 Apps 的分割模式，可以一個掣就將一張相變成兩張，好有創意。
Instax Share SP-2
售價：$1580
