唔知大家有無習慣睡前玩手機？結果就愈玩愈精醒，但日頭就唔願起身呢？原來瞓覺前暴露係電子產品發出嘅光線中，可能會影響身體規律。最近我依莉詩就搵到另一個神奇眼鏡，利用光線嘅原理去抑制有助睡眠嘅荷爾蒙分泌，調整番個生理時鐘。
綠光調節褪黑激素分泌
今次呢個 Re-Timer 助眠眼鏡原理同上次試用嘅 NeuroOn 眼罩差唔多，都係利用光線改變睡眠習慣。不過呢個助眠眼鏡就唔係瞓覺時用，而係喺起身時戴 30-60分鐘，佢所發出嘅柔和綠光不帶任何紫外線，可以調節人體自身褪黑激素分泌，騙過大腦對晝夜判斷，以漸漸改變入睡同起床時間，要輪班工作或者經常出差嘅人都好啱用。不過，因為唔係一時三刻就見效，對大部份忙到連幾時瞓都無辦法自己控制嘅朋友，要連續數日定時入睡，定時起身就係好難呢！
▲ 綠光由眼鏡下方照射到眼部，因為光線唔會被眼簾及眼眉阻隔，係最佳的出光角度才能達至最佳效果。幸好光線都算柔和唔刺眼，一邊工作都唔會睇到眼花花。
▲ 助眠眼鏡內置了 3.7V 200mAh 充電電池，充一次電大約可以使用 4小時。
▲ 開關係鏡框旁，按下圓形按鈕就可以調整高低兩種亮度。
硬膠框看似高科技
呢個助眠眼鏡睇落似一個無鏡片嘅浮潛水鏡，白色硬膠邊框，科技感十分，而重量只有 75g 非常輕巧，中間鼻墊可以調整，就算要每朝要帶一個鐘都唔會有壓痕，仲可以同連埋眼鏡同時帶，唔仿礙日常活動。不過以我哋呢啲咁忙嘅打工嚟講，化妝食早餐都可能係車解決，要每朝戴 30-60分鐘就好難。
▲ 助眠眼鏡其中一個用途就係對抗時差，所以附送一個黑色硬盒，等你方便攜帶出 trip。
▲ 同一般鏡框一樣可以摺疊。
▲ 眼鏡打開後呈弧形，鏡腳幾長，但唔屈得，如果頭大會怕整爛。
▲ 帶住自己副眼鏡，都可以佩戴，唔仿礙日常活動。
▲ 鼻墊可調整高低，帶一個鐘都唔怕有壓痕。
▲ 助眠眼鏡側邊有 USB充電孔，不過係 Gopro 果款，而唔係一般手機嘅充電孔。
依莉詩：「有無用睇自己有無恆心」
平時夜收工，每日返到屋企已經差唔多十點，食埋飯沖埋涼，再玩陣手機，起碼二三點瞓，結果第二朝又唔願起身。起初以為呢副眼鏡可以幫到我調整返個生理時鐘，早睡早起。不過用咗幾日，初初的確係早咗少少起身，但夜晚就算幾眼瞓都係想玩多陣，爭取僅餘嘅私人時間，結果呢副眼鏡對我好似沒有太大作用。我諗要調整生理時鐘，眼鏡只係助力，都係配合自己嘅恆心，瞓前唔玩手機，鬧鐘響就即刻起身比較重要。
Re-Timer 助眠眼鏡
售價：$2,388
查詢：fitboxx (8104-5000)
相關文章:
睡前看手機不是睡眠問題兇手 專家：在床上看手機才是最大原因
分享到 :
最新影片
