近年觀塘出現了不少又有嘢食又有嘢買的消閒空間，引來不是文青同偽文青聚集，今日我依莉詩就帶大家睇下呢間 3千8百呎的生活雜貨店，仲訪問了 主理人 Stanley 對手作潮流再興起的看法。
樓上的休閒尋寶地
Com n’sense 嘗.式開業半年左右，位於工廈，佔地比較大，是一間集特色家品、文具雜貨、Cafe 同 DIY 於一身的地方，假日會舉行表演同市集，行的時候空間相當寬闊舒服，絕對符合文青的生活態度。
▲ 店的右手邊主要售賣從世界各地和香港引入的生活小物，不過中間放置了不少梳化、茶几等傢俱，感覺就好似係屋企一樣。
▲ 售賣區內，你發現到唔少新品牌同手作產品，大部份係出面都未必見過。
▲ 好似這盞燈就相當特別，會懸浮在燈座上，令燈泡變得不再平凡。
▲ 還有各款各樣的 DIY產品出售，每一個都獨一無二。
▲ COM N’ SENSE 的左邊是咖啡區，平時會提供蛋糕同咖啡，方便人行到攰攰哋，可以坐底休息下。主理人 Stanley 更表示「呢度有WiFi，鍾意就可以上嚟坐下，就算你唔消費都得。」
▲ 咖啡區內有少量的蛋糕提供，不過因為主要唔係做咖啡店，所以數量唔多。
▲ 咖啡區後面是 DIY區，設有布料 printer 同繍花機，大家可以帶備設計好的圖樣同布料上去印 tote bag ($80) 或者 T-恤 ($80-$100) ，創作自己的單品。
本地的藝術家同手作人唔係廢青
行咗一段時間，起初我以為一間咁年青，咁多手作小物的小店，應該是由一班充滿熱誠的年輕人開，但問落先發現，原來主理人是一位好有爸爸感覺的男士— Stanley Liu，年紀明顯同我有一點差距，所以就膽粗粗去問問點解會選擇開店。原來 Stanley 起初開店的只係想做一些特別的購物體驗，所以好多家品同擺設都係由世界各地搜羅，香港反而比較次要。不過後來接觸多咗本地的藝術家同手作人之後，就改觀了，而且預留了不少位置俾本地手作。「雖然家庭成員都有年輕的，但平時都係打招呼，唔會點傾計，開咗呢度反而接觸年青人，發覺並唔係我地所講的廢青，反而好有理想同諗法，而且當我知道佢地製作過程就會覺得無個心係做唔到。」
相關文章:啟德和東九龍集體運輸系統招意向書 就首次引入智慧綠色集體運輸系統收集意見
曾創立香港品牌，但對香港失望
曾經做過幫過唔少香港品牌同日本等外國品牌時裝做 Banding 的 Stanley 其實都年輕過， 試過自己開鋪頭搞品牌又試過開 workshop 幫人生產服飾，除了發現市場愈來愈萎縮，更深深感覺到香港人對本地品牌的唔公平，「2000年左右香港品牌經歷有過好的黃金歲月，當時駱克道成條街都係樓上鋪，可惜維持得唔耐。香港人有個天生的壞習慣，由上一代到我呢代，或者年輕一代，都會崇外國產品，有 D 人唔知係香港品牌就好地地，但一知就會唔鍾意，就算用料上明明比較好，但都會覺得外國品牌先係好，令當時唔少做自創品牌的人，對香港都好失望。」雖然小編無經歷過黃金歲月，但仍然感受到 Stanley 對香港的又愛又恨。隨著時間過去，Stanley 認為網絡令世界距離拉近，令唔少人以為自己上網睇過就好了解一樣嘢，但可能係未正式了解或者未實際接觸過件產品之前就會作出批評，「事實上無論香港定外國，都係會參考他人的作品去研發新產品，但日本人改就會贊改得好好要致散，但香港人改就話人跟風，有時點解釋都無用。」
有能力就更想支持年輕創作人
對於近年手作熱潮興起，Stanley 認為係一件好事，「當然同大品牌競爭係無可能，人地手工可能用你差唔多，但人地包裝上，宣傳上，各樣一定優勝過你，但都希望藉著熱潮令大眾對本地品牌改觀。」在這方面，Stanley 不遺餘力，除了讓手作人在店內寄賣，更會定期借出地方搞市集，「我未至於咁偉大，只係我地公司有優勢，因為物業係自己，可以任性 D ，提供一個平台去撐本地手作，如果真金白銀租呢個地方，經營上就要好商業。」Stanley 覺得年青人希望用自己興趣去行條路出嚟，投資時間，通宵達旦去為自己理想，好值得去支持，「所以手作人拎產品上嚟寄賣，除非質素好差，唔係我盡量唔會推，我都希望你得！」
週日市集
講到創意市集，呢個週末 (2016年 3月5日 至6日， 下午1時 ‑ 7時) 係 Com n’ sense 舉行香港漫漫步市集 X 台灣閣樓日 Girl’z，到時除了本地的創作品牌和閣樓日的成員，也邀請了台灣及海外的作家來港參與，有興趣可以去睇睇啊！
Com n’ sense 嘗．式
地址：觀塘巧明街94-96號鴻圖中心3樓A1
電話：3584 7886
相關文章:啟德和東九龍集體運輸系統招意向書 就首次引入智慧綠色集體運輸系統收集意見
