手機顯微鏡，之前喺 Indiegogo 同 Kickstarter 都見過有，又有人上網教平價自製顯微鏡，咁家陣我好想玩，又可以點呢？唯有自己跟住個教學整啦，到底係咪真係咁容易呢？答案最後開估，你睇埋我點整先！
材料易搵 但整要勁耐
首先你要準備一啲材料：一支鐳射筆 (為咗拎佢塊透鏡出嚟)、一啲工具 (螺絲批)、Blue Tack、電話。
▲ 支鐳射筆係啲雜貨文具鋪買，本身想搵啲平啲，但係發覺平果啲原來無塊透鏡，無得玩，所以買咗支幾廿蚊嘅 (好貴) ，豈有此理，外國啲網又呃我。 
▲ Blue Tack
▲ 電話
▲ 架生
DIY 過程全檢閱：搞咗我成兩個鐘
為咗方便咁多位讀者睇，我會盡量簡短，兩個鐘嘅嘢兩分鐘應該睇得晒。
本身以為佢易拆，但原來好難…打開咗佢個頭，原來塊透鏡收埋咗係裡面，又用螺絲紋整實咗，想用死力都唔得。
▲ 拎晒啲架生出嚟，但係無支啱 size …
▲ 搞左一大輪，都係唔掂，搵咗支超大碼嘅一字批，先可以整到佢出嚟。
▲ 終於拎到佢出嚟…
▲ 啲 Blue Tack 點用呢？原來係將佢磋成條狀，幫佢圍邊。
▲ 吸住個相機鏡頭就得喇。
▲ 大功告成！iPhone 6 之後有個好處佢個鏡頭突咗出嚟一試便知龍與鳳。
結果 : Fail
網上教學效果 :(微生物級數)
現實效果 :
我試咗幾張相，都係要貼到好埋先影到，個焦距太短，不過，都影到啲嘢嘅。
▲ 蘋果「掟」
▲ 我啲指紋，死啦會唔會俾人偷咗架，不過算啦，老細s記得加我人工為工作而犧牲
▲ 個 Mon 啲像素一粒粒都見到
▲ Keyboard 個 Alt 掣都影到，原來放大咗佢都係有好多細微嘅坑係上面。
