灣仔碼頭原來無水餃，不過就快有鱈場蟹、海膽丼、直送生猛日本海鮮食了！因為 10月中過萬呎嘅「港版築地」山貴水產市場將會喺灣仔碼頭二樓開幕，自問係吃貨嘅依莉詩今日就有幸率先入內食食食！

1.1萬呎港版築地登陸灣仔碼頭

山貴水產其實係日本築地市場內其中一家水產批發商，今次係灣仔碼頭二樓打造 1.1萬呎嘅水產市場。除了每日由日本築地直送嘅海鮮外，更會提供世界各地嘅時令食材，成為一個包括鮮活海產、即買即燒、食品零售購物一站式空間。雖然大部份食物都未定價，不過相信會以大眾化價錢滿足愛食嘅香港人。

▲ 雖然基本裝修已經完成，不過官方仲肯透露確實開幕日期，只說是 10月中，而營業時間將為每日10am-10pm。

▲ 灣仔碼頭二樓地點不算方便，如果搭地鐵要十幾分鐘先到，建議搭渡海小輪或者巴士前住。

▲ 1.1萬呎嘅市場並唔似日本築地分開場內、場外，只有室內區域，不過大家都可以購買外帶到樓上天台食，(如果唔介意隔離仲係地盤)。

▲ 隔住廁所嘅木係由日本築地運過嚟，係咪有好大陣海水味呢？

1) 立吞壽司伴維港美景

市場多個區域中最受矚目就係有 132個企位嘅立吞區同生蠔吧，對住 180度無敵維港景，邊食手握壽司邊欣賞景色，特別滋味。立吞區供應嘅一系列手握壽司盛合，師傅會選用當日最新鮮嘅 5種材料做壽司，保證新鮮。另外，海鮮生蠔拼盤亦係招牌菜之一，頂層大大隻波士頓龍蝦，下層有生蠔、翡翠螺及鮑魚，份量十足！

▲ 132個企位嘅立吞區同生蠔吧，對住 180度無敵維港景，邊食手握壽司邊欣賞景色，特別滋味。

▲ 叫得立吞區當然一個位都無，好似我呢啲 150cm 嘅朋友記得著高跟鞋去啊！

▲ 手握壽司質素相當高，特別係主打嘅鮪魚壽司盛合，一魚多食，件件口感都唔同，入口即溶。

▲ 刺身件件都厚切，入口回甘、魚肉彈牙。

▲ 一邊嘆海鮮拼盤 ($368) ，一邊欣賞維港夜景絕對係高級享受。

 

▲ 生蠔吧由香港蠔商負責，由法國空運到港。

2) 坐低食直送海鮮丼飯

想靜靜坐係度食可以到海鮮丼飯區，同樣有海景，不過得 36個位，要食可能要排一陣隊。多種海鮮丼由 $98起。而大廚特別推介海膽丼，師傅會選用時令海膽，包括加拿大海膽、北海道馬糞膽及紫海膽，肥美鮮甜海膽鋪滿飯面，睇到都流口水！特上山貴丼更加係胃食之選，原隻蟹箝、龍蝦肉、三文魚籽及 10多款角切魚生鋪滿丼飯，大廚建議先直接食用魚生，再用紫茶包住刺身同壽司飯自製手卷，最後加高湯，當茶漬飯食，3 重風味！

▲ 特上山貴丼($238)上鋪滿原隻蟹箝、龍蝦肉、三文魚籽及 10多款角切魚生，派場一流。

▲ 魚生丼區的各式海鮮丼亦相當吸引，價錢由$98起，重點推介足料「海膽丼（$268）」。師傅會選用時令海膽，包括加拿大海膽、北海道馬糞膽及紫海膽。

 

3) 即揀即捕浜燒鱈場蟹

就算唔鍾意刺身，呢度都滿足到你。浜燒海鮮區可以俾即揀生猛鱈場蟹同龍蝦，即撈即燒，燒烤時噴灑清酒同鹽，提升鮮味，單單陣氣味已經非常吸引。另外，師傅仲會係特別時段表演劏原條鮪魚，除了欣賞專業師傅嘅精湛刀法外，仲可以即時品嚐最新鮮現切鮪魚，魚樂無窮！

 

▲ 浜燒海鮮區有 3個大水缸，所有海鮮即撈即燒。

▲ 大大隻生猛鱈場蟹夠晒吸引！

▲ 鹽燒鱈場蟹同龍蝦香噴噴，肉質彈牙，鮮味十足！

▲ 師傅仲會係特別時段表演劏原條鮪魚。

▲ 除了欣賞專業師傅嘅精湛刀法外，仲可以即時品嚐最新鮮現切鮪魚！

4) 黃婉曼主理外帶藍帶龍蝦包

除了堂食，更有外賣區。多款便當、壽司可以選擇。另外亦有由曾到東京修讀法國藍帶廚藝學院麵包課程的前主播黃婉曼主理嘅海鮮包。主打嘅龍蝦包以自家烘焙嘅法包或甜包夾原隻或半隻波士頓龍蝦 (分別賣$168及$98)，份量十足。另外，更有由歐洲入口墨魚汁製成墨魚汁海膽包（$68）。

▲ 龍蝦包可選原隻或半隻龍蝦，分別賣$168及$98。

▲ 墨魚汁海膽包 ($68)由歐洲入口墨魚汁製成，加上原隻海膽，用料十足。

▲ 另外仲有多款便當同壽司可以購買。

5) 購物區買日本直接生果

食飽飽，最後可以到購物區買日本直接嘅零食同生果返屋企。雖然啲嘢大部份係一田同 citysuper 都有得賣，不過未知價錢，或者會平啲掛！

▲ 購物區睇落其實似一田同 citysuper 。

▲ 生果、清酒都會有。

依莉詩：「大部份未定價，唔知貴定平」

其實市場嘅格局唔多似築地，反而似台灣嘅上引水產或者靚啲嘅大型超市。至於食物上，手握壽司嘅質素唔錯，而燒蟹腳都好入味，不過大部份價格未知平定貴，始終香港有咁多高質素日本餐廳，現時好難判斷值唔值得去。如果去尖沙咀可以坐船去灣仔行下嘅。

 

築地．山貴水產市場
地址：灣仔碼頭二樓
開幕日期：預計 2016年10月中