以前學過一句諺語：「授人以魚，不如授人以漁」，意思即係與其餵飽一個人，幫佢渡過一時三刻的困境，不如教佢求生技能，等佢自己可以獨立生活。教育，唔多唔少都有呢種成分係入面。
最近係網上睇到一件真人真事，話兩年前美國有個 Programmer 同個流浪漢deal：
我可以俾100蚊美金你，亦都可以同你上兩個月「Coding速成班」，你會點揀？
Source: Pressafrik
流浪漢都唔係傻嘅，佢亦都知道「授人以魚，不如授人以漁」的道理，梗係揀上堂。學左的野都係自己的資產，話唔定第時可以有用。由佢睇第一本 Coding 書起計，四個月後，佢就練成左 8 個鐘寫成 Whatsapp 的武功掌握左寫 Apps 的技巧，推出個人首個 App，「Trees for Cars」。簡單黎講，係一隻 O2O 的 App，Match 司機同乘客，鼓勵大家搭順風車，減少廢氣排放，實行環保。
呢個咁有爆點的故仔為流浪漢帶黎名氣，上電視上報紙，有好多訪問，更加成為網絡紅人，周街都俾人認出，流浪漢亦以為自己的一生會從此改變。但年半之後，佢冇再繼續營運隻 App，而且繼續流落街頭。有時條街度有人認到佢，問佢做乜仲係咁呀，佢堅持話自己「十分享受戶外生活」，「我崇尚環保」，雖然骨子裡，佢其實係想寫隻再勁啲，搵到多啲錢的 App。
流浪漢語重心長咁講，話自己好似俾人睇死一定不能成大器，但係上過電視咁多人知道佢有啲料到，佢就學左啲野：
“I’ve learned this:
When people are negative, you have to keep your head in the clouds.”
夢想看似不切實際，其實很有意義。當個個都睇死你唔得的時候，自己仍堅持有一絲信念，專注做你認為重要的事，當然會唔會成功就冇人知，至少你係當中付出過的血汗你係覺得值得。而就算件事最終失敗左，你都贏左經驗，對你黎講係獨一無二。
流浪漢同時學左另一樣野：
“You’re hot one minute, you’re gone the next.”
剎那的光輝不代表永恆。正如 Pop Art 大師 Andy Warhol 所講，「每個人都可以成名 15 分鐘」。尤其係呢個互聯網世代，你夜媽媽係條街度慾火焚身好，抑或係深水埗長期供應平靚正飯盒俾公公婆婆好，幾微不足道的事都有機會令你突然爆紅。你當然可以諗辦法在高處時站穩住腳，但冇人擔保你經營的野會係幾時跌落黎。如何能勝而不驕，敗而無怨不特止，仲可以繼續用平常心看待世事，就係智慧啦。
流浪漢故事的詳盡內容，請看 Mashable。
