從我上一篇落雞亞 N900 文o既回應之中，見到大家雖然未必會買佢，但對佢始終幾有興趣。仲有朋友提到旺角o既女射同胃信都掛晒訂機廣告，胃信o既預訂價更做到 $4,888，所以我都想同大家 Update 下佢個預訂市況，因為佢竟然未出機先減價！
上星期六我講到先達有舖頭o既 N900 預訂價係 $4,880，但鐘圓同落雞亞至尊店都話佢個定價其實係 $5,088/$5,098。點知到左星期日，白蘆薈、馮宅、女射、胃信，甚至詠乘同慢乘，都開始高調叫客預訂 N900，其中白蘆薈同馮宅更加整定價錢牌，明碼實價寫住售價係 $4,988，就連胃信 Sales 都話係賣 $4,988，只不過預訂o既話，可以做到特價 $4,880。
要知道白蘆薈同馮宅兩間龍頭大舖 D 價係唔會亂標，佢o地標得出黎o既，九成九係官方定價，即係落雞亞極可能已經暗啞底減價 $100。唔通連佢o地都覺得部機唔值賣 5 字頭，要減番落 4 字頭，等個價好睇 D？
不過，今次我又去落雞亞至尊店求證時，店員仲係答我 $5,098，其他電器舖亦有 Sales 繼續話賣 $5,088，但係佢o地似係未 Update 個價多 D。點都好，所有人都話部機係o係 5 月 1 日正式推出，真正定價係幾多，到時自有分曉。
而家各大電器舖都掛晒大芒假機或巨型廣告牌出黎，搞到成條西洋菜街都係 N900，個勢認真屬利，只係唔知落雞亞花左幾多錢先做到呢個勢。
胃信門口又擺左呢部假機做 Display，有幾多人圍住睇，睇黎 D 人對 N900 o既反應都算唔錯。
從慢乘呢塊廣告牌見到，買 N900 會送一個藍牙耳機。
分享到 :
最新影片
