考考大家，記唔記得索愛 X10 出左幾耐？又記唔記得初初賣幾錢？開估！水貨同行貨都係 3 月尾到，第一口價分別係 $5,980 同 $5,880！做乜無啦啦提番 X10？因為想話俾大家知，佢個價而家跌到幾殘，行貨 $4,999、水貨 $3,480 咋！
查實索愛不嬲都係插水王，當初 X10 行貨開出 $5,880 o既定價，又喪俾人話貴，極速插水應該係大家o既意料中事，結果真係出機兩個幾月，就跌左八百幾蚊。但都唔夠水貨慘烈，而家先達做緊 $3,480，比行貨平足千五蚊，咁仲邊有人買行貨呀？不過最濕滯都係 X10 Mini，先達仲賣緊行貨 $2,380 同水貨 $2,080，只爭 X10 水機千零蚊，就更加冇人買佢啦，真係俾 X10 頂死晒！
順帶一提，三叔部 Galaxy S 行貨定價係 $5,588，都係猛俾人話貴，唔知正式賣街後，又會唔會好似 X10 咁，插水插得咁勁呢？
X10 行貨定價跌到 $4,999，銀碼好古怪。
二千零蚊o既 X10 Mini，冇乜空間同 X10 鬥插水。
