正當人人都講 iPhone 4 o既時候，先之達人係呢度黎個反高潮講番 iPhone 3GS。冇錯，iPhone 4 規格上係就係勁好多，但相信總有 D 人仲用緊 iPhone 3G，就算換機都唔一定係換 iPhone 4，可以貪平平地買番部3GS 玩下，如果你以為出左iPhone 4 3Gs 即刻會跌價，錯勒! 而家仲未係時候!
早排 iPhone 4 o岩o岩發表果陣，香港 3GS 行貨減左價，賣到 16GB $4,488 同 32GB $4,988。果時先達仲有唔少舖手上o既貨，係跟舊價折讓入番黎，約莫係$5,180 同 $6,080，睇見Apple 玩減價，當堂嚇到要蝕賣散貨，大約每部蝕$700至 $1,100。
後尾班大佬見原來真係有幾多人放棄 iPhone 4，貪平買 3GS，於是再入來貨價平左o既 3GS 番黎賣。點知 Apple 轉個頭就封盤暫停賣 3GS，搞到先達舖又再齊齊搶購剩低o既貨尾，機價自然又扯番高，而家竟然去番 $5,380 同 $6,280，即係同 iPhone 4 發布前一樣，咁就唔抵買啦！不過，而家只係 iPhone 3GS 同 4 o既交接混亂期o者，相信到 iPhone 4 行貨出埋果陣，3GS 就會再次低價供應，決定左換 3GS o既朋友，應該唔駛再等好耐就可以用合理價位入手。
Apple Store 賣過一陣 $4,488 同 $4,988 o既 3GS 就封左盤，而家 Click 入去搵唔番買機條 Link。
唔止先達，聽講白蘆薈都冇乜 3GS 賣，馮宅更加未減過價添，仲賣緊 $5,388 同 $6,288，有貨都唔好幫襯住！
