小女子（化名：杏子）是一名典型 OL，第一次在這裡與大家見面，請大家多多指教！最近打算入手一部手提電腦，剛巧 Unwire.hk 邀請小妹試玩 Acer Aspire One D260 這部小筆電，就趁今次機會，同大家從女性角度分享一下試用這部 netbook 的感受吧！
其實每個女仔揀 Gadgets，你可以說我們膚淺，但女仔天生鐘意靚，就好似揀男朋友咁，即使唔一定揀個好似林峰咁靚仔，但也總不會揀八兩金吧！（個人意見，不喜勿插！）這是女士的天性，無罪掛？！所以揀電腦、揀手機，肯定係用「靚唔靚」做第一選擇條件！第一眼看到這部 D260，第一感覺：「嘩！紫色！『賣飛佛！（My Favourite 的意思）』」沒錯，女士總是喜歡「大紅大紫」的。點解？浪漫囉！
連機身內都係紫色架！正！
當然，我認我膚淺，但唔代表無知！揀手提電腦，就同揀男朋友一樣，樣靚係唔夠的！還有什麼？當然是內涵啦！電腦什麼什麼規格，用咩 CPU、有幾多 RAM、幾大硬碟……這些我統統唔知！要考究這些 facts 的事項，問身邊男人便可以了，對於我來說，內涵＝使用感受！打開電腦，看到是用 Windows 7，大叫萬幸！我平常有時間都留來去同朋友唱 K 飲酒啦，仲要我學埋咩新款 OS，例如 Android、Mac OS，想死！所以由細到大習慣用的 Windows，人人話佢慢，對我就一流！因為唔洗學過。
我成日都會拿部電腦出街，收工之後坐在星X克邊等朋友邊用它上網、又或者寫下 Blog 吹下老闆有幾衰、又或者隔離同事有幾多個女朋友！部機只有 1.25kg，放落手袋剛剛好！而且仲配埋粒 5,200mAh 容量的電池，玩一整日都夠啦！講開寫 blog，自然是要狂打字，所以鍵盤都係我好重視的，D260 個鍵盤打起來浮下浮下咁（後尾問番 unwire.hk 的編輯，先知道呢種叫做懸浮式鍵盤！好，又學多樣野了！），感覺好舒服！我就用佢來打左幾篇 blog，手完全唔覺累，一流！咦？Mon 頂仲有個 130 萬像素鏡頭仔喎！出 trip 時咪可以用來同男朋友玩視像傾計，一於用來 check 住佢有冇趁我出 trip 偷食！呵呵！！！
懸浮式鍵盤，打字一流呢！
仲有咩分享？無啦！上面的試用感受，都夠我決定了買番部了！老實說，好多人會覺得香港女仔鐘意買名牌（如果電腦來說，他們的名牌是指 Apple、Sony 那些），但對於我這個小 OL 來說，靚咪得囉！洗鬼一定要大大大名牌？況且 Acer 都係名牌呀！我讀書個時都已經聽到有 Acer 電腦啦，呢種背景，已經俾到我信心了。重點是，它滿足到我的需要！無論揀 Gad 定係揀仔，都係咁唧！係咪？
About 杏子
杏子，一名典型 OL，少有愛搞 Gad（Gadgets）玩 Gad 女中豪傑，平時鐘意買 Gad，玩兩玩就賣番走，搞 Gad 換 Gad 態度同她的愛情觀完全背道而馳！「我自認膚淺，但並非無知！」這句格言經常掛在口邊，皆因她揀 Gad，除了外表靚唔靚係第一選擇外，都會睇內涵！重視使用體驗，在她手上可以用得上超過 3 個月的 Gad，一般都已是人人也會讚好的神級 Gadgets！
分享到 :
最新影片
