近幾個月，市面都出咗唔少大芒手機，尺寸由 5 吋、5.5 吋、6.3 吋、甚至 6.44 吋都有，真係睇到人花多眼亂。小編身邊都有唔少用開細芒手機（5 吋以下）嘅朋友不停問我：「大芒手機係咪真係咁正呀？」呢個問題，小編呢幾個月都一直係度諗，最後得出個答案係：大芒係正，但都要睇自己嘅使用習慣。
大芒視野闊睇得舒服
如果你問我，我會覺得大芒手機真係有佢嘅好處，最明顯就係視野比一般 5 吋、甚至更細嘅手機闊好多，睇網頁、文件、甚至影片嘅時候，真係會覺得舒服好多。話說小編以前習慣咗用 5 吋芒以下嘅手機，貪嘅係屏幕都 OK 大之餘，又可以做到單手操控嘅效果；但近半年接觸過無數咁多部 5 吋甚至更大芒嘅手機之後，真係有少少改觀，至少對於小編呢種成日睇無數咁多網頁，而且慣咗用手機多過電腦多多聲睇片嘅人來講，大芒手機睇起嘢來真係好舒服，至少唔會有細芒手機個種焗促感，呢樣嘢係大芒手機近一年咁流行嘅重要原因。（大家睇下街上面幾多人用大芒手機睇 Captain Cool 同埋韓劇就知道啦！）
720p 有啲 Out！1080p 配大芒是王道
當然，大芒手機解像度都有唔少選擇，有啲會用最新嘅 1,920 x 1,080 解像度的 1080p 全高清屏幕，有啲就只用咗「過時科技」1,280 x 720 解像度的 720p 屏幕。當然大家會話：就算係大芒，都只不過係幾吋芒唧，720p 同 1080p 屏幕真係差咁遠？如果唔係差咁遠我買 720p 嘅大芒手機就已經得啦！其實小編可以同大家講：真係差好遠！因為 720p 解像度芒，以前係 5 吋以下、甚至係 5 吋芒嘅機入面，出來嘅效果都算唔錯，但當去到 5.5 吋、甚至超過 6 吋芒嘅情況下，如果仲用 720p 屏幕，亦即係會拉散咗啲 pixel，睇片時可能未必咁覺，但係如果大家係睇文件或者網頁，就會見到啲字嘅邊位唔夠 sharp 或者 blur blur 哋，總係覺得唔太舒服。當然，可能小編對眼利過一般人啦，所以好在意呢種「唔完美」嘅視覺享受，所以如果你問小編，我覺得如果真係要揀大芒手機，唔好揀 720p 解像度芒嘅機款啦，一去就去盡佢揀 1080p 解像度芒嘅機款啦！
單手操控必定犧牲
正所謂：魚與熊掌不可兼得，大芒手機顧得視野開揚，就一定會有「失」嘅一面，相信唔止小編，好多人第一時間都會諗到單手操控會係首要犧牲嘅功能。確實，人對手嘅大細有限，就算部機做到幾薄幾輕，要用大芒手機個時，單手操控哂成個屏幕，肯定係有難度的（除非你嘅手好似打 NBA 嘅球星咁大啦！）。當然，有啲品牌都會加入一啲功能，令大家可以「局部」進行單手操控，例如：將鍵盤側埋一邊，令大家可以按用邊隻手用手機，就將個鍵盤側番去個一邊打字，不過呢種方法，始終都係解決唔到大芒手機難以單手操控嘅問題。所以，大家記住：如果你好重視單手操控，大芒手機就肯定唔係你杯茶啦，就算真係要買，5 吋芒嘅機款應該係極限。
放入褲袋男士重視
另一樣大家買大芒手機個時一定要知道或者考慮嘅因素，就喺：你帶部手機出街用個時會放係邊。女士們，相信呢個問題都唔洗太重視，因為好多女仔帶部手機出街，都會放係手袋，除非妳用嘅手袋細到無倫啦，唔係七吋機都擺得落啦，六吋幾芒嘅手機，碎料啦。呢個問題，可能男士們會比較重視，因為好多男人拿部手機出街，都會放係褲袋。如果你習慣咗著 slim-cut 牛仔褲，又或者褲袋比較細嘅褲，用超過 5 吋芒嘅手機，相信大家坐低或者縛鞋帶個時，一定會覺得好辛苦！所以，如果你有上面提及嘅著褲習慣，大過 5 吋芒嘅手機，同樣唔係你杯茶囉。
不必隨波逐流玩極大芒‧追功能更實際
事實上，大芒已經係未來手機發展嘅必然趨勢，我相信除非係入門或者中階嘅手機，否則第日大家要揀部細芒嘅旗艦手機，都應該幾困難。縱然咁講，但大家係咪又一定要「隨波逐流」，個個話 6 吋幾芒有幾正有幾靚，就要跟風去買呢？小編覺得大可不必，因為極大芒（以小編而言大於 5 吋已是極大芒的類別）嘅手機，真喺唔係個個啱用嘅，如果你係用慣手袋嘅女士或者公事包嘅男士，又或者好似小編咁著慣直腳或鬆身嘅褲，又或者有一對大手，咁極大芒手機就真係啱你用，否則幾千蚊買番來唔啱自己用，要改變自己嘅習慣去遷就件死物，就真係無謂。
反而 5 吋芒手機，下半年似乎選擇唔少，而且有啲功能仲幾吸引，就好似 Sony 預計係九月發佈個部 i1，唔單止傳聞會用咗 Android 手機入面最強嘅 2,000 萬像素 Sony G 鏡頭，仲傳聞可以透過支援 Wi-Fi Direct 嘅 adaptor，可以無線接駁 NEX 相機系列嘅鏡頭用來影相，呢項功能，都咪話唔勁！至於其他廠，暫時雖然未有咩聲氣，但相信隨著 IFA 愈來愈近，應該都會有愈來愈多新機傳聞，如果大家覺得極大芒手機唔係你杯茶，不妨再等下，可能下半年會有你的 Dream Phone 出現呢！
分享到 :
最新影片
