小編：「功能夠齊更好揸手」- Sony Xperia Z3

作者

David
發佈日期

2014-09-15
閱讀時間

9分鐘
字體大小

Sony 真係兌現承諾 Xperia Z3 真係半年後就面世，雖然僅僅半年，但這次外殼將會重新設計，相機會加強功能，而且音效更加入 Hi-Res Audio，不知整體感覺跟半年前 Xperia Z2 有咩分別呢？（以下有更多資料）

弧邊更好揸

撇除顏色 Xperia Z3 同 Z2 驟眼睇好似差唔多，但實際兩機邊框已經完全不同，Xperia Z3 用的是全弧形設計，有別上兩代的「弧直弧」設計，握住感覺更舒服貼手，重量跟 Z2 差唔多（實際輕了約 10g），而新設計四邊都是金屬邊，但角位卻是橡膠，一方面造了條邊更圓，其次跌落地橡膠起到減傷作用，小編認為比之前進步。此外，它還升級了防塵防水級別至 IP68，新防水蓋都更美觀，但改用 Nano SIM 對舊用戶升級就唔太方便。

夜攝「High ISO」手持搞掂

自從 Xperia Z1 開始用 2,070 萬像素 G 鏡頭，去到 Xperia Z3 都會繼續保留此規格，雖然感覺同 Xperia Z2 差不多，但實際上新增或加強了拍攝功能，其中「High ISO」模式讓 ISO 最高設至 12,800 水平，即手持可拍攝夜景，甚至在冇「慢快門」下拍攝星軌，但相質好唔好就真係見仁見智。

▲ 冇慢快門下依然拍攝到「夜空相」，相信手機來說只有 Xperia Z3 做到。

▲ 夜景增強，日景拍攝更是強到「不得了」。

新功能「惡搞」又好玩

除了增強 ISO 選項，它還新增「AR 趣拍」、正面特寫、Sound Photo 及「多相機」等模式，中間兩項相信唔難理解，而「AR 趣拍」就是「AR 效果」輕量版，用後畫面不會見到恐龍，但可加入一些水果、炸彈甚至自己畫的 AR 效果，感覺就好似貼紙相玩後製。至於「多相機」是配合其他 Xperia Z3 或 Alpha 相機組合成多角度拍攝，效果似 Album 式一圖多相，但佢就變成實時拍攝（相片/影片)，如果用來拍跳舞或滑板花式就可紀錄得更詳細。

▲ 「AR 趣拍」可在畫面加一些趣怪特效，甚至自己畫圖案，感覺比「AR 效果」更彈性好玩。

▲ 「多相機」可連接 3 台 Xperia Z3 同時拍攝，三台機可不同角度，這樣令小編想起「多啦 A 夢」的六面照相機。

性能冇驚喜、屏幕更白淨

Xperia Z3 設計有驚喜，但規格停留 Xperia Z2 就比較失望，它仍搭載 Qualcomm Snapdragon 801 及 3GB RAM，並繼續使用 5.2 吋 1080p Triluminos (IPS) 屏幕，性能仍屬頂級之列，但年尾新機未用 Snapdragon 805 或 2K 屏幕就感覺「差少少」。屏幕方面，顏色跟 Xperia Z2 稍藍一點，白色感覺更白，冇上代微黃情況，可視角度夠闊，平常收看感覺良好，但若果開住「X-Reality」睇相感覺就好「味精」，小編個人喜歡關掉此功能。

▲ 睇網頁時可以看到 Xperia Z3 (左) 白色比 Xperia Z2 (右) 更光更白，但可事角度就依然咁廣闊。

▲ 開了「X-Reality」模式影像顏色更鮮艷、對比更高，但小編就不太喜歡過份「味精」。

▲ 搭載 Qualcomm Snapdraon 801 、3GB RAM 規格跟 Xperia Z2 相同。而網絡則支援 FDD-LTE 及 TD-LTE 雙制式，另外還有 FDD-LTE + 2G 雙卡版本。

▲ 這次 Xperia Z3 介面都有改動，主要是 Icon 及文字都放大了。

喇叭、耳機更好聲

Xperia Z3 跟 Xperia Z2 一樣用了雙前置喇叭設計，但兩者分別是喇叭明顯改良，音量夠大，而且還設低音效果，小編試過在車上收看「動新聞」、myTV 及「NOW 新聞」，現在以上三個 App 都可清楚聽見片中對白。至於新增的 Hi-Res Audio，內置 Walkman 已能支援 FLAC / ALAC 格式檔案，小編用 Sony MDR-XB70 來試聽發現同一首歌 Xperia Z3 音色會較暖，推 In-Ear 音量基本足夠，但推 Headphone 就只是僅僅夠聲。

▲ 係車上收看影片音量都非常充足。

▲ 小編用自己對 MDR-XB70 耳機收聽 FLAC 檔案，音量足夠（推力一般），音色比其他機較暖。