小編自 iPad 一代起，平板已經一直在用 Apple 的平板。兩年前因為貪輕，所以轉投 iPad mini 懷抱。早前 Apple 推出 iPad Air 2，自同事手中借來的機一摸一試，已經立即愛上。究竟用了 7 日，作為由 7.9 吋平板轉投回 9.7 吋平板的 Edward 有什麼感受？現在就為大家分享一下啦。
偏好 iPad 因夠多 tablet APP
手機上，認識我 Edward 的朋友都知道比較偏向鐘意用 Android 機款；但講到平板，由 iPad 一代推出至今，就一直偏好 iPad。誠然我覺得不算是果粉，但 iPad 平台始終較多專為平板大芒設計的 APP，所以一直偏好 iPad 就是這個主因（當然我不是說 Android 平板設計、功能唔好，不過人就是有偏好，好吧？）。
相關文章:
【評測】SonarPen 2 : Apple Pencil 平替之選 支援側轉 低延遲筆觸 【教學】iPhone 連 Wi-Fi 自動關流動數據 離開 Wi-Fi 自動啟動 、不怕誤用數據 【教學】ChatGPT 香港人付款攻略 毋須外國信用卡訂閱 ChatGPT Plus
因太重轉用 iPad mini
還記得兩年前 iPad mini 剛推出的時候，小編當時已買入 iPad 9.7 吋的第四代，當然用了 Retina 熒幕、改用 Lightning 插頭，更重要的是支援香港 4G，當時感覺是好吸引的，但 iPad 四代的最大致命傷：機身重（成 662g 呀！！），令我用了一個月已經「頂唔順」改購用了 iPad 2 規格，但機身輕一半（332g），亦支援香港 4G 的 iPad mini。
▲當年為了 Retina 熒幕由 iPad 2 升級去 iPad 4 代，不過真係好重，拿出街用單手拿住超辛苦。
▲為了加強便攜性，所以兩年前唯有犧牲 Retina 熒幕，轉用 iPad mini。
因 Air 重新考慮接受 9.7 吋 iPad
仲記得舊年 Apple 推出 iPad Air，重量比起四代 iPad 已經大大降低，不過小編一直有留意 Apple 產品「趨勢」，看到通常新系列「第一代」的產品，也有大大小小的問題；加上 iPad mini 入手了只不過一年，感覺仍「可用」，另外眼見 iPhone 5s 已有 Touch ID，但在 iPad Air 上卻沒有，感覺沒有太大意慾升級，所以就繼續使用手上的 iPad mini。但到了今年，手上的 iPad mini 經過接近兩年的洗禮，加上升到 iOS 8.1 後，變得愈來愈慢，而且很容易「彈 APP」，所以終於決定換機。
本來是打算轉用 iPad mini 3 的，但玩過同事的真機後，覺得「咪又係咁」，就連硬件都是用回上代，只是加了金色、128GB 及 Touch ID，興趣不大；反而到 Apple Store 親身玩過同期推出的 iPad Air 2 後，覺得比四代 iPad 仍然輕好多（444g），而比起手上的 iPad mini 又唔係重好多（其實手感是極之接近，感覺無重過），加上肯定用了新硬件，影相質素聽落都好左，所以最終決定回到 9.7 吋 iPad 懷抱，入手 iPad Air 2。
相關文章:
【評測】SonarPen 2 : Apple Pencil 平替之選 支援側轉 低延遲筆觸 【教學】iPhone 連 Wi-Fi 自動關流動數據 離開 Wi-Fi 自動啟動 、不怕誤用數據 【教學】ChatGPT 香港人付款攻略 毋須外國信用卡訂閱 ChatGPT Plus
第一感覺：帶出街無負擔
Edward 買回來的是太空灰 4G + Wi-Fi 版的 128GB iPad Air 2，買回家差足電，開盒做好設定，然後就拿出街用了。第一感覺是：真係好輕！同部 iPad mini 左右手拿下秤下，感覺幾乎無分別！須知道 iPad Air 2 比起 iPad mini 系列 tablet 足足大了幾乎 2 吋熒幕，能有這種手感真係唔簡單。講老實，iPad mini 的熒幕雖然已有 7.9 吋，但視覺效果上總係無 iPad Air 2 的 9.7 吋開揚，在「有大食大」的前提下，不加重負擔但能令睇芒時感覺更舒服，呢方面 iPad Air 2 令小編好滿意。
第一水熒幕不再「中伏」
如果大家仲記得舊年 Apple 推出 iPad Air 時，熒幕是靚，但就出現「陰陽芒」問題。今年的 iPad Air 2 到手，Edward 當然第一時間 check check 仲有冇呢個問題啦。試過全黑、全白熒幕後就見到，熒幕左邊仍然有輕微黑影現像，但比舊年的 iPad Air 已經有很大改善，而且舊件小編有朋友的 iPad Air 出現偏色（偏黃）問題，今年的 iPad Air 2 就十分準確（至少眼見而言）。當在全黑畫面時，亦只有在右上角及左下角見到輕微漏光問題，對於日常使用，應該無太大影響。
▲今年的 iPad Air 2，陰陽芒情況比舊年的 iPad Air 改善了，但仍然有熒幕左方（上圖紅框位置）輕微這情況。
▲至於漏光情況，仍然見到在左下角及右上角有一點（上圖紅圈位置）。
反光問題大大改善
仲記得之前用 iPad mini，點解要較到畫面最光？主要都係因為如果係日頭街上面用，iPad mini 的熒幕都會幾反光，不過就算較到最光，始終因為熒幕用的都是 IPS LCD 芒，所以都係要就住角度或者用手遮一遮，先至睇到熒幕上面的顯示。至於 iPad Air 2 上面，因為改變了熒幕結構，所以就算在街上面睇芒，都可以睇得到，而家出街用 iPad 終於唔驚會反光啦。
▲用 iPad mini 在街上面睇，真是反光到睇唔到熒幕顯示。
▲在 iPad Air 2 上面，就算在街上面都唔驚反光，真係好呀。
相關文章:
【評測】SonarPen 2 : Apple Pencil 平替之選 支援側轉 低延遲筆觸 【教學】iPhone 連 Wi-Fi 自動關流動數據 離開 Wi-Fi 自動啟動 、不怕誤用數據 【教學】ChatGPT 香港人付款攻略 毋須外國信用卡訂閱 ChatGPT Plus
iPad 相機終於可用
以往要影相，iPad 無論是第四代還是 iPad mini，影相效果都係一般般，所以影相多數都是用手機。但由於小編唔算係「果粉」，所以手機無用 iPhone，導致要抄相、拍片去 iPad 進行簡單執相甚至剪片，都好麻煩，通常都要用 email 傳送，都幾麻煩。去到今代 iPad Air 2，相機唔止有 800 萬像素，而且成像比以往的 iPad 都好得多，而拍片亦有 1080p，效果都算唔錯（感覺應該最少有 iPhone 5s 的水平）。以後要影相拍片，可以直接用 iPad Air 2 拍，然後直接用 iPhoto、iMovie 呢類軟件編輯，所有工序一條龍。加上入手的機款是 128GB，咁就唔怕唔夠位啦。
試相區
Touch ID 令我更方便
好多人都覺得，iPad 上面有 Touch ID，無係 iPhone 上面有咁有用。但如果你問我，我會覺得點會無用？仲記得之前無論用 iPad 四代定係 iPad mini，最憎就係 download APPS 或者 unlock 個陣要入 password。所以個時見到朋友用 iPhone 5s，已經諗緊如果 iPad 都有就好了。舊年 iPad Air 最終無加入 Touch ID，亦係小編無入手的原因。今代終於有 Touch ID，買 APP、unlock 部機、甚至為部分程式解鎖（例如：Google Drive），除左一開機個陣要入一次 password，之後都係一隻手指搞掂，好方便。所以邊個話，iPad Air 2 上面的 Touch ID 無用？
▲連 3rd party APPS（例如：Google Drive）都支援 Touch ID，以後 unlock APP 真係好方便。
64-bit x METAL 打機一流
今代 iPad Air 2 算是第二代 iPad 支援 64-bit 硬件 x 軟件架構，而在 iOS 8 更加上 METAL 這個全新硬件加速圖像處理 API，令打機時的效果更加一流。小編平時都鐘意玩下賽車遊戲，其中一款 Asphalt 8 就正正支援 64-bit + METAL 這個配搭，確實係玩的時候，加上 Retina 熒幕，打機效果真係可以媲美電腦 game。唯一缺點係支援 64-bit + METAL 這個搭配的遊戲暫時都唔算多，都係 10 隻手指數得曬，希望未來會多些動作、體育或者賽車遊戲支援，咁係 iPad Air 2 打機個時就更爽了。
▲暫時支援 METAL 的遊戲仍然唔多，但相信過多一排應該會多番一堆了。
傳檔到 MBA 靠 Air Drop 超方便
當然，呢個唔係 iPad Air 2 先有的功能啦，而係 Mac OS X Yosemite 新增的功能。有用過 Apple 裝置的讀者應該都知道，Mac OS 同埋 iOS 入面的 Air Drop，已經唔係新功能，但係之前就只支援 Mac to Mac 或者 iOS to iOS 裝置之間互傳檔案，要從 iPad（iOS 裝置）傳檔案去 Mac OS 裝置（例如：小編手上的 MacBook Air），一係就靠 iTunes，再唔係就唯有靠第三方程式（例如：Instashare）。雖然都係免費，但總係感覺無用 Air Drop 咁直接同方便。今代採用了 iOS 8.1 的 iPad Air 2，配合升左上 Yosemite 的 MBA，終於可以互相傳送相片、影片等檔案，以後要分享或者備份都容易得多了，確實超方便！
相關文章:
【評測】SonarPen 2 : Apple Pencil 平替之選 支援側轉 低延遲筆觸 【教學】iPhone 連 Wi-Fi 自動關流動數據 離開 Wi-Fi 自動啟動 、不怕誤用數據 【教學】ChatGPT 香港人付款攻略 毋須外國信用卡訂閱 ChatGPT Plus
中高使用量仍可 2 日 1 叉
有用過 iPad 的 unwire 讀者，相信都知道 iPad 系列一向都好慳電，兩日一充絕對唔成問題，但自從改用 Retina 熒幕（第三代 iPad）後，耗電問題就嚴重左好多，尤其是好似小編呢種高用量兼且鐘意較到個芒亮度最高的用家來講，自從入手 iPad 四代後，從此就要同兩日一充的生活講 bye bye，呢個亦係當年點解小編會轉用 iPad mini 的另一原因。而今代 iPad Air 2，開頭都有少許擔心它的耗電問題，但用落 7 日，感覺真係好慳電，基本上經常上來睇網頁、睇討論區 APP、以 streaming APP 睇戲追劇、甚至打機，都唔會誇張到一日一充，基本上日半都兩日先一充是無問題的。呢一點，對於成日要出去做野的小編來講，真係好重要！
總結：重回大芒世界真好！
用了 iPad Air 2 七日，無論是佢的熒幕、Touch ID、相機、效能、甚至電量都好滿意，可以講得上係近乎完美。不過有一點要講講的，就係今代 Air 2 雖然減到得番 6.1mm，但正是這個優點，對於小編來講反而係缺點，因為機身太薄，拿上去感覺唔太實在，甚至單手拿住個時有點怪怪的感覺，所以最後都係套番個原廠 Smart Case，先至舒服一點。另外，音效方面，可能因為機身太薄的關係，雖然音質都算唔錯，但當有低音個陣，機身會變得有點震，令人聲變得有點兒散，所以小編聽歌、睇戲個陣，會轉番用耳機聽，一來唔會嘈到人，二來算係解決到呢個「死症」。
另外，作為成日要出去打稿做野的小編，對 Apple 都有一樣不滿，就係只推出面蓋 Smart Cover 或者保護套 Smart Case，但就無出配備藍牙無線鍵盤的保護套！試想想，如果有個保護套，入面有埋實體 Apple 鍵盤，感覺確實會好完美，打字都會爽一點。但偏偏原廠就無出，看來小編而家當務之急，就係要搵番個鍵盤 case，等打字個時會舒服一點啦！唔知 unwire 讀者們有無好介紹呢？
相關文章:
【評測】SonarPen 2 : Apple Pencil 平替之選 支援側轉 低延遲筆觸 【教學】iPhone 連 Wi-Fi 自動關流動數據 離開 Wi-Fi 自動啟動 、不怕誤用數據 【教學】ChatGPT 香港人付款攻略 毋須外國信用卡訂閱 ChatGPT Plus
分享到 :
最新影片
