提起 BlackBerry，對 gadgets 產品稍有年資的 unwire.hk 讀者，應該會記得兩項元素：qwerty 實體鍵盤及光學 trackpad 觸控板。不過近年轉用 BB 10 OS 的新機入面，全部唔係主打實體鍵盤就係 touchscreen，最好用的 trackpad 就完全失蹤，令唔少 BB 粉絲都好懷念經典的 BlackBerry 手機設計。今次 BlackBerry 推出的 Classic 就一於玩復古，唔止有 touchscreen 同埋 qwerty 實體鍵盤，仲有番 trackpad。究竟用落係點？以下有更多資料：
光學 trackpad 操控更勝 touchscreen
今次 BlackBerry Classic 大玩復古，一部機擁有 touchscreen、光學 trackpad 同埋 qwerty 實體鍵盤 3 大操控，目標都好簡單：吸引過往 BB 粉絲「回巢」。當然，要有齊呢 D 元素，又要兼顧單手操控，熒幕就唯有縮細至 3.5 吋 720 x 720 解像度正方形設計，但用起來單手操控同埋打字都好舒服，而且係呢種設計下，用 trackpad 操控其實比用 touchscreen 更舒服，因為平時在主 UI 可以用它操控遊標移動，而按下它就代表決定功能，至於入到 APP，畫面就會多左個滑鼠箭咀，透過 trackpad 就可以操控它。
▲ trackpad on BB 10 OS 終於係 BlackBerry Classic 呢部機度回歸。
▲從以上影片就知道，trackpad 唔止可以控制 APP 同埋手機，就連複製網頁文字都可以一隻手指做到，仲可以即時透過 Facebook、WhatsApp 等分享俾朋友，都幾方便。不過揀字個度就真係要 D 時間熟習……
至於鍵盤方面，由於是傳統 BlackBerry 的 qwerty 實體鍵盤，所以用慣 BB 手機的用家，應該都好習慣，尤其是對於要經常打字的用家來講，真係幾好用。而且係較暗的地方，鍵盤仲會有背光，咁就唔洗驚夜媽媽或者係 pub 飲野個時打唔到字覆唔到 messages 啦。
▲qwerty 實體鍵盤用來打字係幾舒服既。
▲3.5 吋熒幕雖然細左 D，但都支援 touchscreen 功能。
▲在較暗地方鍵盤會發出背光，就算係暗角或者 pub 都唔驚打唔到字啦。
trackpad 玩 Android APP 都幾好
相信大家都知道，BB 10 而家已經可以安裝 Android APP，所以今次 BlackBerry 推出的 Classic，同樣都可以裝到 Android APP。不過大家都知道，Android 手機一般熒幕都係 16：9 或者 16：10 比例，再唔係就係 4：3 比例（雖然都已經好少），好似 BlackBerry Classic 咁用到 1：1 比例熒幕的機款，絕無僅有。所以要係 BlackBerry Classic 上面用 Android APP，就要適應要用 trackpad 碌上碌落的使用習慣，不過整體來講，都算好用既，至少 load 布卡來睇漫畫，每頁都係比平時禁多一下，okay 啦。
▲由於採用 BB 10 OS，所以可以裝到 Android APP。
▲不過因為採用正方形熒幕，所以 Edward 睇布卡漫畫個時睇一版就要禁多一下制啦。
▲因為採用 BB 10 OS，所以介面同其他最近推出的 BlackBerry 手機，例如：Passport、Z10 都類似。
▲單手操控基本上無問題。
▲機背雖然係膠，但係加入了格仔斜紋，手感都算唔錯。
▲機邊就採用金屬物料，而且因為 Classic 採用內置電池設計，所以就連插 SIM 卡或者 microSD 卡都好似 iPhone、HTC One M8 咁，要用針將 tray 從機側「篤」出來。
Edward：「粉絲先會買！」
整體來講，今次 BlackBerry 推出 Classic，其實只係用之前 Bold 9900 的設計，以及全新 BB 10 OS 的作業系統的合成品而已，揉合了有 touchscreen、可以用 Android APP 的功能、BB 10 OS 的 UI、以及可以用 qwerty 鍵盤及光學 trackpad 操控的功能，可說是集各家之大家，對於追求傳統 BlackBerry 手機設計的懷舊一族來講，又或者經常在手機打字的用家而言，確實係唔錯的選擇。不過對於一般用家來講，$4,388 的售價，在今時今日來講，以一部只是用 Qualcomm Snapdragon 8960 1.5GHz 雙核心 CPU（已是兩年幾前主流旗艦手機所用的 CPU……）來講，真係有 D 貴，所以呢部機，都算係 fans 向，又或者公司買俾員工做公司手機先至會考慮，一般用家來講，或許正正經經買番 iPhone 或者同價位的 Android 手機會更適合。
