今日應該很多讀者出發去長旅行了，其實這幾年科技及通訊發達，旅行所帶準備的東西已經跟以往有所不同，讓我 Edward 提提各位 unwire 讀者，作為 2015 年的我們應該如何「執行李」，不要再 OUT 了 ！
行李篇:
1. 別輕視手機 – 自拍神棍 + 遙控快門
現在手機攝影質素提升，很多人旅行都直接用手機影相，影完相，唔駛等番到香港先至 upload + share 俾親友睇 ，不過好多時想自拍又要影埋後面景的話，自拍神棍可就一定要跟身啦！不過有咗自拍神棍，始終拉遠咗部機，如果要禁快門制真係有 D 困難，建議大家同時搭配隻遙控快門，又或者你部相機支援用手機遙控快門同 Zoom，咁就最 perfect 池啦！別以為帶了單反或甚麼專業相機就忽視手機影相的重要性，相信 Edward 你旅行中途有很多時候都不方便，甚至是累得不想拿起相機來，手機永遠是最方便的攝影 + GPS 工具，如果你拒抗使用手機拍攝，你的旅行會很多東西沒被紀錄。
注意 : 有 D 國家唔用得「神棍」
要提提大家，用「神棍」影自拍固然方便，但去某 D 國家的話，就要注意當地政府是打擊使用的，例如：南韓就全面打擊使用「神棍」，原因是有些「神棍」內建了藍牙功能，可能會影響無線通訊儀器運作；而新加坡就剛宣佈在多個旅遊景點，包括：聖淘沙、Marina Bay、國家運動場、Zouk Club 都會在即將舉行的聖誕新年大型活動中禁止攜帶「神棍」，理由是自拍棍如果在人多的場合使用可能會意外弄傷別人、甚至有人有機會將它當作武器使用，有一定危險性。所以當大家外遊時，就要查清楚前往國家是否容許大家使用「神棍」，否則為了影張靚自拍相，被罰款事小，萬一要受牢獄之災，就得不償失了。
2. 唔使帶咁多火牛啦 !
今時今日我諗每個人都最少一、兩部智能裝置隨身了吧，加上部分相機、手提遊戲機、 DAP 等都支援用 USB 充電，如果旅行要全部帶出國，以往可能要帶備多個火牛，或者兩個火牛，每天晚上回到酒店逐件差電。但而家市面上有唔少可以一拖五、甚至一拖十的充電座，部分更同時支援 1A（一般來說用在手機上）及 2.1A（一般來說用在平板上）電壓輸出，這樣帶一個座可以同時為多件產品充電，無論是一個人定係全家人一齊去玩，在酒店都可以同時充電，咁就一家人都咁幸福啦！
3.大容量外置電 is a must 啦
當然，唔少得的肯定係大容量外置電池啦，因為大家去旅行，在外面通常都玩成日，萬一手機或者相機無電，又或者用來導航搵方向的平板唔夠電，就真係幾掃興。如果帶備一粒 8,000mAh 或以上的大容量電池出外，咁就方便得多。建議大家揀有 2 個插頭的款式，咁樣差電就會快得多。同埋如果打算用來差平板，買電時要留意電池係咪支援 2.1A 電壓輸出，否則就得物無所用啦。
4. 唔好信酒店房 wifi － 自備流動 router + Lan 線
雖然今時今日，去到好多國家的酒店，都有免費 Wi-Fi 俾大家用，但係通常都唔可以駁好多裝置；如果去到民宿，更可能只有固網，而無 Wi-Fi。如果想多部流動裝置係酒店都上到網，就記得帶定個流動 router，只要駁左酒店的 LAN 線，就可以將網絡用 Wi-Fi 分享俾手提電腦、手機、平板、甚至相機等使用，咁要 share 靚相或者寫 blog 就方便得多啦。
5. 外出玩時成班 FD 一齊上網開心 Share
– 3G / 4G Wi-Fi 分享器
在酒店就話可以用流動 router 唧，但出到街又可以點？其實而家唔少國家都有俾遊客購買的 3G / 4G SIM 卡，只要將佢地插入 3G / 4G「蛋」，就可以將網絡同時分享俾一家人用，咁就唔洗人人自己買張 SIM 卡咁哂錢啦。另外，其實香港都有借 Wi-Fi「蛋」俾大家拿去外國用的公司，一般來講以日、韓計算，每日都係幾十蚊，就可以 5 部裝置同時用到 4G，都幾划算。而且有 D 公司直頭可以係個邊機場直接拿「蛋」，唔洗係香港拿定，都幾方便。不過要留意的是，有 D 公司係要收取手續費或者按金，萬一機件有損壞可能會在按金扣除，記得租借前先問清楚。
6. 長旅行租蛋 / 買 SIM / Wifi 點都抵過用漫遊 !
坊間有唔少公司提供各國家的 Wi-Fi「蛋」或 SIM 卡租借服務，如果大家想了解更多資料，我們年初就總結過台、日、韓三地的 Wi-Fi「蛋」租借資料，有興趣的讀者可以參考一下（建議向所屬公司查詢最新資料，因為可能價格或服務有變）。唔好咁傻豬用漫遊啦，好貴嫁 !
請參考:
「趕尾車」新年旅行 II : 手機台日韓上網攻略
http://unwire.hk/2014/01/17/data-roaming/headline/
其他當用必備物品
上面同大家分享的，是 Edward 覺得大家都應該去旅行時帶備的產品，但仲有冇其他野要拿？衣服、護理用品、個人清潔用品、護照個 D 我就唔多講啦，相信大家都知一定要帶架啦。Edward 建議大家都按需要，考慮帶備以下物件，方便自己方便旅伴。
- 拖板／充電器 ／ 轉換插（尤其是隨身帶備唔可以用 USB 差電的裝置，例如：DSLR 或者 M4/3 相機等）
- 腳架（最好帶單腳個種，方便影夜景又唔會阻到人地）
- 平安藥（一般藥房都買到，平均百零二百蚊一份左右，內有 panadol、胃藥等一般藥品）
- 護照、身份證等身份證明文件有相片的一頁的影印本（萬一遺失左都方便補領或者向當地大使館展示你的身份）
- 手套 / 保暖衣物
- 耳筒（咁樣旅程中聽歌都唔怕嘈親人地，不過唔好買太差的款式，否則漏聲嚴重戴左耳筒都無用）
[divider]
APP 篇
出發前仲有咩 APP 要預備，為旅途解悶，又或者旅途中方便自己？就等 Edward 同大家分享一下啦。
7 . 唔一定要訂酒店 － 民宿 APP 搵特色房
如果大家唔想搵大酒店，而想搵好似民宿呢類特色房，都有辦法，大家可以考慮類似 Airbnb 呢類平台，佢上面提供咗唔同國家的民宿，只要搵到啱心水又有空房就可以預訂，一般都唔洗未出發俾全費，只需要落訂就得，去到住咗入去先至找全數。而且係個 APP 度全程可以同民宿負責人商量安排，甚至有 D 民宿可以安排專車接送，真係好體貼架！
Airbnb（網頁）：https://www.airbnb.com.hk/
Airbnb APP（iOS）：https://itunes.apple.com/hk/app/airbnb-quan-qiu-min-su-yu-ding/id401626263?l=zh&mt=8
Airbnb APP（Android）：https://play.google.com/store/apps/details?id=com.airbnb.android&hl=en
8. 預先下載音樂離線聽
去到外國，未必個個地方都有得無限上網（其實香港都無啦，唉……），所以如果平時大家有用串流音樂平台聽歌，而在旅途中又想聽番呢 D 歌解悶？其實可以預先下載在手機中，咁樣就算去到外國，或者係飛機上面上唔到網，都可以唔洗 login 都聽到。而且一般都支援幾千首歌，基本上一定夠聽。
Step 01：
首先進入 APP 並進入設定，以 KKBOX 為例可以設定儲存多少歌曲、儲存在手機內置儲存空間定係 SD 卡。而音質 Edward 建議選擇「高音質」。
Step 02：
然後在「設定」入面勾選「離線模式」。
Step 03：
再進入你自設的音樂 playlist 或者希望旅途入面聽的大碟，再點按「全部下載」或者逐首選擇下載，就得架啦。
Step 04：
當係上唔到網的地方，就算開左 APP，都可以聽到已下載的歌啦！
▲其他音樂 APP 其實都可以做到，不過好似 Spotify 咁就要每月俾 $48 註冊成為 Premium 會員先可以離線下載（不過首 3 個月都係 $48，即係每個月俾 10 幾蚊已經可以任聽又可以下載，都幾抵）
9 . 預先下載離線地圖
今時今日，識用地圖搵方向景點一定係用 Google Map。不過又係個句，去到外國就算上網幾平都好，都未必度度收到 4G，有 D 地方甚至可能得番 2G（小編試過，係台北十份、平溪、菁桐個 D 山區，真係得番 Edge……）！所以為咗大家上唔到網都可以搵到方向或者景點位置，建議可以先將景點附近的 Google Map 預先儲存落來，咁樣就算到時上唔到網都唔驚啦。以下就教教大家方法啦。（不過要留意，台灣及日本是不支援儲存離線地圖的。）
以下就為大家講解一下點做啦。
Step 01：
首先入 Google Map APP，並在搜尋格輸入將到訪的城市或者景點名稱。
Step 02：
然後點按左方景點圖右上角的點點按鍵，並點按「儲存離線地圖」。
Step 03：
然後選擇希望儲存的範圍，完成後點按「儲存」。
Step 04：
再輸入地點或景點名稱，就完成啦，地圖會儲存在「您的地點」列表中。
Step 05：
當去到外國時，打開 Google Map 並點選搜尋格左方的三橫線按鍵，然後選擇「您的地點」。
Step 06：
然後就會睇到儲存的地圖，點按它就可以睇到地圖啦！
Step 07：
可以見到即使放大了，基本主要街道名都睇到，但如果要睇景點詳細資料，就要上到網先睇到啦。
▲其實除咗 Google Maps，坊間都有唔少第三方公司研發的離線地圖，好似呢款 MAPS.ME，唔止有埋圖資，仲可以離線導航。
MAPS.ME（iOS）：https://itunes.apple.com/hk/app/maps.me-li-xian-de-tu/id510623322?l=zh&mt=8
MAPS.ME（Android）：https://play.google.com/store/apps/details?id=com.mapswithme.maps.pro&hl=en
10. 唔識搭車 ? 裝定公共交通 APP
去到外國，除非你是自駕遊，否則都好難避免要搭公共交通工具，例如：巴士、地鐵、火車等等。其實今日如果你去的是發達國家（例如：日本、南韓、台灣、歐美等），好多公共交通工具都有營運公司或者第三方 developer 寫的 APP 的資料，當中肯定包括路線圖、時間表、路線搜尋、甚至可能有下一班到達時間。有咗呢 D APP，再係指定時間早 15 分鐘左右到站等，咁就唔驚 miss 咗班車要等下一班啦。
▲要用 APP 搵日本 JR 資料，無問題啦。
▲去到台北，要睇捷運資料都搵得到。
11 .搵免費 Wi-Fi APP
雖然大家都會買定數據卡，但有 D 國家可能無無限數據選擇，剩係得有限 500MB 或者 1GB，用完就要再充值先再有得用。所以建議大家都 download 定搵免費 Wi-Fi 熱點的 APP，當想坐低上下網 hea 下，又或者想搵個有得食野飲野又有得 Wi-Fi 上網的地方時，開個 APP 附近有咩熱點一目瞭然。
Wi-Fi Finder（iOS）：https://itunes.apple.com/hk/app/wi-fi-finder/id300708497?l=zh&mt=8
Wi-Fi Finder（Android）：https://play.google.com/store/apps/details?id=com.jiwire.android.finder&hl=en
12. 搵野玩搵野食推介 APP
最後一種 APP，尤其是如果大家係自由行，雖然係香港個時都應該一早搵定去邊個景點、玩乜同埋食乜，但可能都會遇上當地節慶或者「漏網之魚」睇唔到，又或者預計咗去某景點或餐廳但唔記得咗預先記低點去。其實 App Store / Play Store 上面都有唔少旅遊觀光 APP 俾大家免費下載，大家可以睇住資料去規劃每一日的行程，咁就唔怕去漏啦。
▲其實呢類 APP 好多，不過如果講到可信度，TripAdvisor 應該會較高，而且比較偏門的國家都有，而且資料由網民提供，「賣廣告」成份較少，有一定參考價值。
TripAdvisor（iOS）：https://itunes.apple.com/hk/app/tripadvisor-hotels-flights/id284876795?l=zh&mt=8
TripAdvisor（Android）：https://play.google.com/store/apps/details?id=com.tripadvisor.tripadvisor&hl=en
13. 唔使打 IDD 啦
仲 IDD 咁貴 ? 如果返到酒店加埋 Edward 上面教你用番自己個 Router，接收咁 ok ，可以用 Smart Phone 的 Skype / Facetime/ Facebook /Line 等等呢類 VOIP 軟件
其他旅行小貼士 :
兌換外幣可以點做？
要去旅行，執行李都唔係最麻煩，最驚就係兌外幣時被人呃，或者睇唔啱兌換率換貴咗。以下 unwire Edward 就建議大家幾個方法，等大家可以用最抵兌換率，換到最多的外幣出遊啦！
方法一：香港兌換
第一個方法，就係係香港兌換定。至於香港可供大家兌換外幣的地方，最方便肯定係銀行（除非大家真係咁大頭蝦完全無咗件事，否則千祈千祈唔好去到機場入禁區後的兌換店暢外幣，通常兌換率都奇差！）。如果係常見的外幣，例如：日元、韓圜、人民幣、英磅、歐羅、美元、澳幣等，大銀行都有足夠存貨（除非大家係一次過兌十幾萬港元的外幣啦 Orz……），但都建議大家打定電話落銀行度預留，咁就唔洗行兩次。呢種係本地兌換最方便的方法，不過就要收手續費。
如果唔想俾手續費，好多人都會去中環百年兌換，不過就排隊排餐死，大家最好預留半日排隊兌換外幣，同埋最好平日去會少 D 人。至於兌換率，無論身處香港定係外國，都可以透過以下兩個辦法查閱。
▲TTRate 提供各銀行即時匯率，一般無該銀行戶口可留意「現鈔銀行賣出」。有外匯戶口就可留意「電匯銀行賣出」。
TTRate：http://hk.ttrate.com/zh_hk/index.php?b=0&c=JPY&s=3&t=3
▲手機上亦有「香港外幣匯率」App，可隨時在手機查看兌換率。
香港外幣匯率（Android）：https://play.google.com/store/apps/details?id=com.eks.hkrate&hl=zh_TW
外幣現金匯率（iOS）：https://itunes.apple.com/hk/app/wai-bi-xian-jin-hui-lu/id599398231?l=zh&mt=8
方法二：找換店兌換
如果去到外國，最方便當然係搵找換店兌換啦，如果講到方便中的方便，肯定係係當地機場暢錢，不過機場找換店兌換率一定無咁好（雖然都已經比香港機場好得多啦……），建議大家去到市區先至搵找換店暢外幣，一般遊客區或者商業區都會有，咁會划算好多。不過建議大家都先用上面提及過的 APP check 清楚當日的兌換率，然後搵間最接近的找換店兌，咁就唔怕蝕大底啦。另外提一提大家，如果係連鎖酒店，比較大型的都可以在前台暢外幣，不過兌換率一般比係找換店更差，除非真係急住用，否則盡量唔好咁做。
方法三：銀行直接禁
其實而家兌外幣，要方便都唔洗咁麻煩，直接用香港銀行的提款卡，在外國銀行的櫃員機直接禁外幣出來都已經得，而且同係銀行、找換店甚至酒店暢更接近香港兌換率，不過同係找換店、銀行一樣都係要收手續費（兌一次收一次）。基本上大家去到搵有銀聯標誌的櫃員機就得，不過有三點要記住：第一係你張提款卡一定要支援銀聯系統，如果唔清楚可以直接問番香港的銀行；第二係出發前一定要係銀行開通「境外提款服務」，唔係既話就算銀行戶口多多錢都禁唔到架啦；第三係每間銀行每日海外可供提款的最高金額都未必一樣，不過一般都係 2 萬港元左右，對於一般人來講應該都夠用啦。
番外篇：信用卡付款抵唔抵？
去旅行，有 D 人都會帶定一兩張信用卡傍身，萬一唔夠錢都可以碌住先，仲可以儲積分來換飛行里數，隨時可以為下次旅程的免費機票做好準備！但究竟碌卡俾錢抵唔抵？Edward 會同大家講：視乎銀行而定。如果大家拿住的信用卡，在海外簽帳有 4 倍或以上積分獎賞的話，就建議大家「碌住先」，番到香港先用港幣找卡數，咁樣先夠 cover 簽帳的手續費。至於卡種方面，兌換率來講 VISA、MasterCard 同銀聯基本上都差唔多，而銀聯最著數，因為唔洗俾手續費；至於 AE，佢會先將外幣轉做美金，再由美金轉做港幣，計多次兌換率，點計都唔會抵，所以如果你拿住 AE 卡，都係建議你俾 cash 算吧啦。
咩話，仲未 Book 機票酒店 ?
對於鍾意玩「速閃」或者公司啱啱先批到假的朋友來講，通常都係 last minute 先訂機票、酒店。究竟仲有咩辦法可以 last minute 訂到？留意各大旅遊網站或者相關的 Facebook 專頁，又或者專門訂 packages 的旅遊公司，例如：Expedia、Hotels.com、Agoda 等，有時都會 last minute 執到人地一早訂咗但 last minute cancel 的機位、酒店房，航空公司或者酒店為咗「唔好哂」，通常都會接近成本價出售，價錢隨時仲平過 Early Bird 添！
分享到 :
最新影片
