耳語:
「我個 friend 個老豆係做 Skype 的香港 server 架!」
「我識得有人做大陸國防部 server 添啦!」
正當我等緊下一個人講:「其實我阿爸係李剛」的時候,呢幾位坐係隔離枱的後生仔就話埋單走人。唔好意思,有時耳仔太靈敏,雖然我真的不明白點解食食下飯要係朋友面前晒命,但見到佢地係威係勢嘅樣,我都有一絲自豪,因為我終於知道做IT係有人識得欣賞,係一份專業工作,唔係 IT support 咁簡單,求其阿豬阿狗識㩒兩下電腦就話自己係 IT 人(即係好似我咁,我已經係屋企最 IT 個個,電視電腦電話電器都係我搞掂…所以屋企都係以 low tech 為主,哈哈哈)。
唔知係因為我入左呢一行接觸多左,定係近年IT野真係咁大行其道(應該係 both XD),我覺得無論新聞好,還是日常傾計,都好難避免唔講科技野,好似政治咁…尤其是報紙同電視,都幾經常都見到以科技作為題材的報導同創作。例如報章上,iPhone 6 開售竟然可以有免費頭版廣告成為頭條;更有不少人因為放棄大公司的高薪厚職,自己創業闖出個名堂(不少為 IT 業界朋友),而成為記者專訪對象;電視更加唔使講,新聞節目又好,戲劇節目又好,上年都見到唔少,例如 TVB 套《名門暗戰》聽講有部分內容同整 APPS 有關;唔好講傳媒啦,網絡廿三條又好,創新及科技局又好,議員開會講錯野都好,好多政策都關事。
啲人成日話香港經濟停滯不前,增長放緩,但係如果有留意,科技界好似反其道而行,你睇 Instagram 由 7 億變 350 億美金,馬雲成為中國首富,GoGoVan 係近半年入面得到 1650 萬美金融資…下面張圖就好易明啦,近十年流動科技的增長率係勁到你唔信,所以總結係,我冇入錯行,哈哈哈!
Source: Harborx Blog 16 Dec 2014
點解要講咁多呢啲野呢,事源早排有個朋友同我講話年尾出埋花紅雙糧又到轉工的時候(?),想搵份有前景的工作。我諗黎諗去都覺得,係呢個「書都未識揭,字都唔識多隻,就已經識得掃平板電腦」的年代,愈黎愈多人懂得欣賞呢個行業,而呢個高增長的行業咁啱又好等人用,而咁啱我自己都體驗到少少邊際利潤,但又同時好似唔係好多人了解行情…
我雖然唔識個 friend 個老豆做 Skype 的 server、亦都唔識得人做大陸國防部 server,但係行內不少公司都有講話大力發展緊同請緊人。如果大家出晒花紅雙糧,好有 passion 想係科技界一展拳腳,我會係數碼港默默支持你地架!
分享到 :
最新影片
![](https://cdn.unwire.hk/wp-content/uploads/2024/09/iphone16_d_web2-694x390.jpg)