Ayu bb 帶你升級 PS Plus，玩盡每月精選遊戲、最新試玩、盡享優惠

作者

艾露貓
發佈日期

2015-02-02
閱讀時間

10分鐘
字體大小

大家好我係 Ayu 呀！今次來到 unwire，同大家講打機 ^^！相信有唔少 unwire 讀者都係 PS3、PS4 機主吧？咁除咗單單買隻 GAME 番屋企玩之外，你又有無試過加入 PlayStation Plus，用佢入面嘅功能呢？佢除咗會大派免費 Game 玩之外，其他功能仲「多蘿蘿」！以下就等小妹為大家介紹啦！

有睇開我地 unwire，相信不時都會睇到 PS Plus 呢個字眼，咁究竟佢係什麼東東，加入成為會員之後又有乜嘢好處呢？以下就一一為大家介紹。

用 Share Play 免費試新 GAME

依家好多 Game 都有連線合作，不過買咗隻 Game 無 Friend 陪你一齊玩，係咪無計可施呢？梗係唔會啦！當我地雙方都係 PS Plus 會員嘅話，就可以用到 Share Play 功能，可以將玩緊嘅 Game，由畫面、聲音、到手掣嘅控制權，一齊 Share 比朋友仔，就算對方無買到 Game，都可以唔駛比錢一齊玩，「毒」佢試你隻 Game！當佢鍾意咗就買多隻一齊玩 (因為 Share Play 每次限時為 60 分鐘，想再玩就要重新開 Part 再加入)！當然，如果你嘅朋友仔買咗新 Game，你就可以叫佢「Share Play」比你免費玩，啱心水先買﹗

▲同朋友仔開咗 Party 之後，就可以喺右上角開 Share Play 功能喇！

▲之後就可以將控制權交比朋友仔，等佢試玩你隻 GAME。

其實對於小妹來講，Share Play 仲有一個更重要嘅用法，就係幫我脫離「卡關」嘅困境！好似小妹咁，過唔到《The Last of US》某一版，一個電話邀請朋友仔參加 PS4 私人派對，就可以好輕鬆咁搵個打機勁嘅朋友仔利用 Share Play 功能幫手遙距過關，仲可以順便參考一下佢嘅打法，乘機偷師 hehe ^_^

▲「卡關」過極都過唔到呀 >_< 呢個時候有 Share Play 就幫到手！

仲有呀仲有，其實 Share Play 除咗比朋友玩你隻 Game之外，亦都可對應一啲雙打嘅遊戲，例如踢 Winning 咁，你可以分多個手掣權比朋友仔作為 Player 2，搵佢陪你雙打，就算佢無隻 Game 都可以一齊玩，大家控制同隊不同球員，一齊挑戰強勁電腦！

▲悶悶地想踢吓波，用 Share Play 搵朋友一齊踢就最啱！

▲可以合作一齊控制同一隊，過關無難度喇！

每月唔同精選 FREE GAME

加入咗 PS Plus 之後，上 PlayStation®Store 就可以每月免費下載精選遊戲，個個月都有唔同Game！例如今個月 (2015-02-05 至 2015-03-04) 就有 PS4 嘅《Transistor》、《Rogue Legacy》、PS3 嘅《Prototype 2》同埋《Dungeons & Dragons: Chronicles of Mystara》。

▲PS Plus 年費唔算貴，而且一個 PS Plus 帳號用晒 PS3、PS4 同 PS Vita 三個平台。

▲每個月都有大作比你免費玩！

▲幾十蚊一個月就拎到幾隻大作嗱！

另外亦唔好以為啲 GAME 玩得一個月呀！下載完隻 GAME 之後，只需要繼續係 PS Plus 會員，就算過咗下載期間，亦都可以開返隻 Game 嚟玩！所以做得會員，就要記住每月上 PS Store Check 吓有咩免費 Game 喇！

其實呢個會員福利比我有好多驚喜，老實好多 Game 本來以為麻麻地，未必啱小妹玩，後來喺呢度見免費就「唔執輸」Download 嚟玩，先至發現有好幾款其實都唔錯。單係呢堆免費 Game 其實都夠我嘅 PS Plus 「回本」了！

▲做咗會員就記得每月上去拎 GAME 啦！

買 Game 折扣優惠：

除咗免費玩 GAME 之外，PS Plus 會員每個月都有買 Game 折扣優惠，例如今個月 (2015-02-05 至 2015-03-04) 就有 PS4 嘅《Trine 2: Complete Story》、PS3嘅《BLAZBLUE CHRONOPHANTASMA Full game》，同埋PS Vita嘅《DANBALL-SENKI W Full game》提供六折優惠，分分鐘平過出面買二手！今個月(2015-02-20至2015-03-05)下載《The Order: 1886 》仲有九折優惠添﹗