今日的士app大戰，Uber 以免費兩程招乘客，「快的」就每程 $18 補貼司機，傲將軍嘅文章提到，呢個年頭就算有幾好創意，功能幾完善，如果冇資金，冇金主做銀彈攻勢造到壟斷，最終係走向末路。
商業社會就係咁現實，俗語話「西瓜靠大邊」，當個個都用 Google search 嘅時候，微軟 2013 年燒咗 20 億美金落 Bing 度都力挽唔到狂瀾，喺美國 Bing+Yahoo 市場佔有都不過三成，建立咗「慣性收視」，就算你係王維基有成億做宣傳，都唔係話變就變。
話雖如此，startup 界裏面，冇嘢係冇可能。最直接嘅方法，就係搵投資者，充足返自己彈藥，再殺出一條血路。本身已經有 30 萬用戶嘅本地薑「飛的」app 透露，今日嘅 order 量冇顯著減少，反而仲多咗人 download。諗深一層，Uber 吸引只係咗大部分平日唔會「搭的士上班去」嘅人，而「快的」補貼司機又唔會令到多咗客叫車，結果「鷸蚌相爭，漁人得利」。（當然，因為呢場大戰令到報紙大篇幅報道，Facebook 網媒不斷轉載，大幅曝光已經收回成本。）
的士同貨 van app 嘅模式類近，除咗要搵客 download，更重要，而且一個 app 最大嘅資產，係搵高質素嘅司機，假如有一次唔好嘅經驗（例如司機冇禮貌、遲到、亂收費）留唔住個客，之前嘅宣傳成本就會前功盡廢。調轉講，無論係「飛的」或者 CALL4VAN 客貨車，欠缺本錢做大量宣傳，就要從司機著手，希望以服務質素留住客戶，長遠改善外界對行業嘅印象，最終先可以令到盤生意持續發展。
知易行難，司機亦要搵食，就算理念幾宏大但冇生意畀司機，結果一樣係浪費心機。所以 CALL4VAN 會繼續對外尋求合作機會，透過聯同中小型電召台合作，先鞏固實力，再乘勝追擊。
分享到 :
最新影片
