只要有部手機/平板出街都可以好似係屋企咁打機睇片，雖然視覺唔差好遠，但音質肯定冇屋企用喇叭咁講究。不過，SoMiC 較早前推出一款 P1 耳機，佢係極少數針對手機 Gaming 的入耳式耳機，賣點是可模擬 7.1 環迴立體聲，而且售價都係兩百蚊。（以下有更多資料。）
搶眼橙色 線控可調音量
這款 SoMiC P1 是針對手機的 Gaming 耳機，同大家常見的電腦 Gaming 耳機最大分別係體積，因為它屬入耳式設計，輕巧又容易收藏。線材用了搶眼橙色及「手榴彈」插頭設計，並特設可調音量的線控，透過切換鍵可完全支援 iPhone 及 Android 裝置，功能還好，但設計膠感太重，幸好顏色都迎合到 Gaming 主題。
裝 App 可模擬 7.1 聲道！
Gaming 耳機主要功能都係提供「環迴立體聲」，這款 P1 也不例外，但要啟用「環迴立體聲」功能就先要安裝「SomicAudio」手機程式，完成後掃瞄說明書條碼就可啟用帳號。打開 App 就會發現有音樂、遊戲及電影等主要選項，點選模式便可啟用，當然音效每個人要求唔同，因此它還可為環迴效果、重低音等進行微調，令打機睇片都有更佳效果。此外，這個 App 還可選擇安裝驅動程式，安裝後音質分別會更大，但前提需 Root 機才可安裝，因此不太建議一般用家安裝。
▲ 模擬「7.1 聲道」須配合 SomicAudio 手機程式使用。
▲ 除了遊戲及電影模式，音樂模式還有更多 EQ 選項。
▲ 每個模式都有微調選項，讓用戶可以自訂最佳音色。
▲ 透過拍攝盒內條碼激活 VIP 賬戶，這樣就可進入 App 內所有微調功能。
▲ 打開 App 它會建議你安裝驅動程式，前提手機必須 Root 機才行，但唔 Root 都可繼續使用。
打 FPS 遊戲有「環迴」感
兩百蚊有 7.1 聲道咁神奇，小編當然要親自感受下喇！首先，小編試玩 Dead Trigger 2 發現用同唔用「7.1 聲道」效果頗明顯，啟用後聲音明顯有包圍感，雖然分唔出是否 7.1 聲道，但肯定的是遊戲更有現場感，但前提遊戲必須是 FPS 類型，換轉是賽車或平面遊戲就分別不大。至於驅動程式分別，小編都試過在已 Root 機上的平板測試過，「環迴」更強烈，但感覺去到有點「朦」的情況，估計要微調一段時間才有理想效果。
售價：$198
查詢：EVERBEST (2544 0103)
