小編：「自拍方便！但冇 Hotshoe 始終差啲」Panasonic Lumix GF7 相機評測

今時今日「影相」同「自拍」已經同等重要，正如選購手機會睇前鏡頭，相機都要睇有冇得自拍，而 Panasonic 今日發佈的「女友」系列 Lumix GF7 就針對自拍而設，屏幕可 180 度揭起，而且還新增多項自拍方式，就算唔按快門都可以輕鬆自拍！(以下有更多資料。)

可反芒！「癡」埋即合照

不經不覺「女友」系列出到 Lumix GF7 (下稱: GF7) ，起初小編以為 GM 已取代 GF 系列，直至見佢主打「自拍」才醒起 GM 係冇「反芒」。顧名思義，GF7 今代硬件上改動就係加入「反芒」，屏幕可從下揭起至 180 度，讓拍攝者可從前面觀看屏幕自拍。當然單憑「反芒」係唔夠，因此拍攝介面上加了「自拍」功能，除了美顏、瘦面、柔焦等「美化」效果，更重要是提供拍攝方式，包括手勢、合照 (兩個臉拍埋)、觸控及 Fn 鍵快門 (適合左手用家)，當中頭兩項屬全自動，不按快門都會拍攝，非常方便！

▲ 屏幕向反起 180 度，方便自拍。

▲ 新增不同自拍模式，其中「手勢」及「合照」都可不用按快門。

▲ 支援不同美顏模式，每個選項都有 Level 調較。

大細適中！內置 WiFi

Lumix GF7 某程度是針對女性用家，因此機身設計都有所調整。首先，重量會比 GF6 大幅減 60g，但機身未有仿傚 GM1 做得更細，原因是 GF7 會反方向「揸機」，太細反而容易整跌，因此小編拿起 GF7 都唔覺難拎，女士的話就更「Fit」。除此之外，機面亦加入皮革設計，配合不同顏色如粉紅或啡色令風格傾向「中性」，但小編就認為有點太「膠」。最後，GF7 跟 GF6 一樣備有內建 WiFi 功能，不同的是 WiFi 增設「無密碼」模式，令連接跟為方便。

▲ 機身冇 GM5 咁細，即使小編拿起都唔覺太辛苦。

▲ 機頂依舊冇 Hotshoe 設計，但仍提供內置閃燈。

▲ 機底放入電池及 SD 記憶卡，電池容量為 680mAh。

▲ 3 吋屏幕支援觸控設計。

▲ WiFi 可透過「無密碼」模式跟手機連接，但感覺似乎用 QRcode 方式仍是最方便。

用 GM5 規格、極限 ISO 3,200 可用

GF7 會採用 GM 系列同級的 1,600 萬像素 Live MOS 感光元件及 Venus Engine 處理器，可拍攝 1080p 60p 短片及支持 5.8fps 高速連拍，對焦系統亦對應 -4EV 環境運作，意味著黑夜都能對焦。至於對焦，配搭 12-32mm Kit 鏡頭反應都算唔錯 (當然不及 GH4 / LX100)，先天 24mm 拍攝或自拍都更具優勢。相片方面，細節都很清楚銳利 (難怪要加後製模式）而 ISO 小編粗略試過 ISO 1,600 以上雜訊就開始明顯，因此上限最高去到 ISO 3,200 左右。

▲ ISO 1,600 、F5.6 、1/50s。

▲ ISO 1,600 、F5.6 、1/40s。( 合照模式 + Soft Skin全開。)

▲ ISO 1,600

▲ ISO 3,200