最近 Steam 正舉行夏日特價，連早前全城熱話的 GTA V 都有減價，不過，買咗 Game 部電腦唔夠力玩？除了砌過部 Desktop，最近 Asus 推出全新 ZenBook Pro N501，賣點是配備 15.6 吋 4K 屏幕及搭載 GeForce GTX 960M 獨立顯示卡，唔知夠唔夠力玩 GTA 呢？
4K 霧面 冇咁 Sharp
雖然 4K 仲未普及（包括 Desktop），但 N501 已經配備 15.6 吋 4K 屏幕，數字上唔睇都知會比 Retina（2K）細緻，但佢同 MBPR 感覺最唔同係採用霧面設計，唔反光抵讚，但用於打機睇片就肯定冇用「水晶面」咁討好，因此我覺得配搭有點奇怪。顏色方面，這款 N501 聲稱屏幕色準（100% sRGB、72% NTSC），驟眼睇都冇乜偏色，只係灰少少，都算 sRGB 取向，因此用於後製都唔太差。
▲ 擁有 3,840 x 2,160（4K）解像度。
▲ 由於霧面關係，屏幕睇落感覺會冇水晶面咁 Sharp。
4K @ GTA 5 僅僅玩到
ZenBook Pro N501 係一款高級配置 Notebook，機內搭載 Intel Core i7-4720HQ 四核處理器、12GB RAM 及 GeForce GTX 960M 4GB 獨立顯示卡，級數已拍得住 Gaming Notebook，而我花了一晚時間安裝 GTA 5 後，發現 N501 在 4K（3,840 x 2,160）解像度及低畫質選項，格數維持 24-30fps，勉強都叫玩到，想流暢還是把解像度調低至 1080p，這樣格數就可增至 45-70fps，相比 4K 1080p 會易操控得多。
▲ 搭載 Intel Core i7-4720HQ 四核八線程處理器、12GB RAM 及 GeForce GTX 960M 4GB 獨立顯示卡。
▲ 內建 256GB SSD，容量唔算好大，但都夠裝 GTA 5。
▲ 在 3,840 x 2,160 解像度時，GTA 5 格數平衡只有 24-30fps。
▲ 調低至 1,920 x 1,080 解像度時，格數平衡去返 45-70fps，感覺流暢很多。
相關文章:
【評測】ASUS ZenFone 12 Ultra 詳細評測 相機表現有提升 + 設計更簡約風 + 旗艦效能依然抵玩 華碩拍賣黃仁勳簽名 ROG RTX 5090 黃金限量版、收益撥捐洛杉磯山火 華碩 ROG 攜手阿拉伯 Qiddiya City 2025 台北國際電玩展聯合展演
散熱唔錯 打機唔辣手
Notebook 打機好多人都會擔心過熱，但我在 N501 執行 GTA 5 時用「測溫槍」量度機身溫度，除了出風口會噴出 41 度暖風，鍵盤及 TouchPad 都只係微暖（但機底會暖大脾），實際僅升溫 2 – 3 度，其間亦只係聽到少少風扇噪音，散熱效果都算唔錯。
▲ 即時執行 GTA 5 這種高要求遊戲，機身發熱情況唔算好嚴重。
金屬感強烈 機身好薄
N501 外觀比一般 Gaming Notebook 來得美觀，灰色金屬外殼加入拉絲紋，感覺冇乜「蘋果味」，機身比想像中薄，厚度剛好容納到 USB 接口，但重量仍有 2.06kg，因此唔算太便攜。內籠方面都係金屬製，鍵盤、TouchPad 係 15.6 吋機都唔會有太細問題，但我就略嫌鍵盤按鍵太實，打字唔太爽。最後，擴充提供了 3 組 USB 3.0、HDMI 及讀卡器，以及 1 組定制接口用作 VGA / LAN。
▲ 提供 3 組 USB、HDMI 及 SD 讀卡器，另外還有轉頭可駁 VGA / LAN。
▲ 機底配備 B&O 立體聲喇叭，音質比普通內置喇叭好，但重低音就普通。
小編 ：工作娛樂包辦 貴但合理
試完部 Zenbook Pro N501 小編 覺得佢相當唔錯，頂級規格配搭 4K 屏幕，設計又用了金屬外殼，基本上唔睇都知價值不非。不過，佢實際只售 $14,998，作為 PC Notebook 價錢算幾貴，但其配置跟 MacBook Pro 15 Retina 比較其實一點都唔輸蝕，但前提係你需要呢個級數的機種。
售價：$14,998
查詢：ASUS（3582 4770）
相關文章:
【評測】ASUS ZenFone 12 Ultra 詳細評測 相機表現有提升 + 設計更簡約風 + 旗艦效能依然抵玩 華碩拍賣黃仁勳簽名 ROG RTX 5090 黃金限量版、收益撥捐洛杉磯山火 華碩 ROG 攜手阿拉伯 Qiddiya City 2025 台北國際電玩展聯合展演
