成日出街，見到唔少商務用家都仍然係帶住 notebook 出街，問番佢哋點解唔考慮平板？佢哋 9 成以上都係答：要整圖打字工作，始終都係 notebook 好用啲：「因為有鍵盤同 keypad 嘛，點都好過平板用手畫。」最近 Sony 推出了 Xperia Z4 Tablet，擺明主攻工作娛樂兼備的商務客群。究竟係咪真係幫到佢哋？unwire 就搵來經常要出街工作甚至出 trip 的香港零售科技商會副會長梁偉峯 Joseph 來幫大家試一試。
防水又夠輕適合流動一族
Joseph 試了 Sony Xperia Z4 Tablet 一個星期，佢覺得作為經常要出外甚至出國工作的人來講，機身夠輕薄好重要：「因為有時出去做嘢，唔止要帶電腦，仲要帶埋唔少文件，Z4 Tablet 機身真係好輕，就算加埋個鍵盤 cover 都輕過一部輕薄型的 Ultrabook 電腦，帶埋文件一齊出街都唔太覺重。」
另外，近這幾個星期，經常都下傾盆大雨，Joseph 出外工作已經孭著一個擁有防水拉鏈，號稱防水的背囊，但都大雨都令背囊滲水，令佢覺得帶出街的裝置擁有防水功能好重要：「Xperia Z4 Tablet 本身擁有 IP68 防水防塵功能，有水滲入背囊都好彩無整壞平板，比著以前帶 notebook，因為無防水功能，真係會驚整壞，而家就無咁擔心了。」
有鍵盤媲美輕薄 notebook
Joseph 表示，平時局住要帶 notebook，都係因為有個鍵盤同 Trackpad 工作舒服好多：「尤其是我經常都要寫專欄，之前又要讀 Arbitration 仲裁課程，有鍵盤同 Trackpad 打字同操控部機真係易過用平板係熒幕上面畫畫寫寫同篤虛擬鍵盤。今次試用 Z4 Tablet，佢最大優點係個鍵盤好好打，而且有 Trackpad 操控，感覺就同用緊輕薄型 notebook 差唔多，有時要做 powerpoint 或者簡單圖表，放係檯面做點都易過要拿住部平板，仲要用手指操控同打字。而且重點係：帶 Z4 Tablet 出街唔似 notebook 咁要帶埋火牛，好方便。」Joseph 更覺得，Z4 Tablet 基本上已經可以取代以 Atom 為處理器的輕薄型電腦，但如果處理再複雜些的工作，例如：用 Photoshop 整複雜圖，用返電腦會較合適。
另外，Joseph 亦好欣賞 Sony 為 Xperia Z4 Tablet 推出原裝藍牙鍵盤，因為唔係好多品牌會咁做：「買其他品牌嘅平板，你多數只能購買第三方品牌的藍牙鍵盤，但一來 size 未必 fit 機身，二來帶出街用又要帶住兩舊嘢，唔似得 Z4 Tablet 咁好似 notebook 咁一打開就用得，仲夠力撐起部平板唔會放係檯面用個時向後傾倒；而一蓋埋就可以令平板進入休眠狀態，鍵盤仲可以當埋 case 保護熒幕，帶出街用好安全。」Joseph 還認為，Xperia Z4 Tablet 平板本身同藍牙鍵盤都支援 NFC 功能，只要輕觸一下就可以進行配對，唔似第三方藍牙鍵盤要輸入密碼咁麻煩。
相關文章:
Sony 測試 AI 驅動遊戲角色 已將《Horizon》 Aloy AI 化 《芒亨》熱潮帶動 PS5 銷量 日本急升 7 倍超越 Switch Sony PSVR2 日本宣布大減價 換算約 3,480 元、減幅達 75 折
附送一年 Office 365 商務人士極方便
另外，Joseph 覺得 Sony Xperia Z4 Tablet 只要購買鍵盤，還會贈送 Office 365 一年使用權，呢一點又係對於商務用家來講的一大吸引之處：「平時嘅平板，就算有內建 Office 或文書處理 APP，多數都係只能瀏覽唔可以新建或編輯，而 Sony Xperia Z4 Tablet 只要購買鍵盤就附送埋 1 年 Office 365 使用權，可以用到完整版 Office，要係街度新建 Word 文件、編列 Excel 圖表或者開 Powerpoint 來做 present，都好方便！而且係用 Microsoft 自家出品 APP，唔驚文件內的圖表、圖片會走位。」Joseph 還覺得，有時收到客戶的 Word 檔案，有 Office 365 還可以將它轉換為 PDF 檔，令以往只能在電腦上處理的工作，現在在平板上都做到，真是十分方便。
熒幕顯示飛電視方便 present 娛樂兩用
另外，對於經常要外出或演講的 Joseph 來講，presentation 的體驗十分重要：「好多人會覺得 present 就一定要用 notebook，因為平板用 HDMI 駁投影機或者電視好難。但 Sony Xperia Z4 Tablet 就好容易，只要買個 MHL 接駁線，就可以用 HDMI 線將畫面顯示的 powerpoint 或者影片輸出顯示，真係好方便。」
Joseph 更加表示，其實出 trip 時都發覺，唔少外國酒店的電視都已經支援 Miracast 功能，平時番到酒店想睇下電影或劇集輕鬆一下，只要用 Sony Xperia Z4 Tablet 的 Miracast 功能，將影片 Throw 到房間電視上，就可以躺在床上慢慢欣賞：「本身 Z4 Tablet 的內置喇叭都好夠聲音質都算唔錯，就算唔用電視播聲，用番平板本身都好足夠，呢樣真係好方便。」
支援 4G LTE CAT 6 平板選擇唔多
對於商務用家來講，除了輕薄及方便做 present 之外，Joseph 覺得第三個重點在於網絡：「市面上唔少平板都只有 Wi-Fi 功能，就算有 4G LTE 都只係 CAT 4，去到外國工作，就算用到 4G 都唔夠快。Sony Xperia Z4 Tablet 就屬於市面少有支援 4G LTE CAT 6 網絡嘅平板，去到某些網絡發展較發達嘅國家，例如：日本、韓國，上網都會快好多，對於要成日上網工作嘅我來講，真係好方便。」
效能超快容量夠用有突
最後，Joseph 對 Xperia Z4 Tablet 還有幾句感受：「其實商務用家平時都會有好多文件要帶出街用，有時都要 save 落電腦或 USB 手指，而 Z4 Tablet 本身都有 32GB 儲存空間，仲要支援最高 128GB microSD 卡，扣除 OS 所佔空間都有 140GB 左右用，足夠有突！再係唔夠，仲可以用 Google Drive、OneDrive 等進一步擴充空間，唔會唔夠用。」
至於效能方面，有 3GB RAM 同埋 Qualcomm Snapdragon 810 八核處理器的 Z4 Tablet，Joseph 覺得已經好夠用，平時操控都好暢順，唔覺會窒。熒幕仲要有 2K QHD 解像度，加上 Sony 本身的 Triluminos Display 及 X-Reality 技術，用來睇片或者 Powerpoint 都好舒服。加上電量超足，用足一日以上都無問題，對於商務用家來講，可以講得上係一部完美 Ultrabook Replacement！
梁偉峯 Joseph profile
香港零售科技商會副會長，致力於資訊科技行業超過27年，現正擔任聯款通企業發展總監，有關於電子付款和流動付款相關的服務。曾被任命為香港電腦學會執行總監，亦曾參與開發全港第一個流動入門網站。梁先生亦經常為不同的雜誌編寫專欄，如資本一週、e-Zone、PCM、Job Market 。
相關文章:
Sony 測試 AI 驅動遊戲角色 已將《Horizon》 Aloy AI 化 《芒亨》熱潮帶動 PS5 銷量 日本急升 7 倍超越 Switch Sony PSVR2 日本宣布大減價 換算約 3,480 元、減幅達 75 折
