筆者睇過唔少電影題材，當中運動肯定係最難拍攝的題材之一，印象中港產片入面就只有《少林足球》比較成功，不過都係以搞笑為引子吸引觀眾，係咪能令大家更了解足球呢項運動？無囉。今次港產大導林超賢繼《激戰》之後，再次挑戰運動題材，拍出《破風》，繼續玩熱血！究竟睇落係點？而家就等 Edward 同大家分享一下。
繼續熱血無「廁所位」
如果大家有睇過《激戰》，應該都會感受到由古惑仔、去到警匪片、再去到而家拍運動熱血片的林大導，題材轉營認真快。不過有睇過林導電影的人，應該都會感受到個種「零冷場」的風格。係今次《破風》，電影就繼續玩「零廁所位」，Edward 係睇電影個時，真係就算想去「小解」，但都死忍唔敢去，深怕錯過任一劇情，從此大家可以見到劇情確實好緊湊。而且今次的《破風》，繼續有金句令大家印象難忘，一句：風在前，無懼！令人睇到熱血沸騰。當然，layman 啲講，即係 Never give up，永不放棄向前衝，就算遇上難關都唔退縮逃避的精神。而呢種精神，就由開始到結束一直貫穿住整套電影，即使眾角色係過程中都遇過失意、人生低潮的一刻，但最終都「係邊度跌低，就係邊度企番起身」。電影入面紅色牆上的打氣字句，都印住永不放棄的意思字句，熱血至此，確實俾到觀眾大量「正能量」。
唔識單車都睇得入神
老實講，Edward 本身並非一名單車運動愛好者，甚至連踩單車都唔太識（笑~~~），不過係《破風》入面，透過眾角色之間的交流，以及各種單車比賽的旁述，都令觀眾對單車運動了解更多，而且就算唔識咩叫做破風手、衝線手、各種單車戰術等，都可以係電影入面一一學到。而且入面的單車比賽都好多元化，唔止有場地賽、公路賽、山路賽、沙漠賽等，甚至連比較冷門的「麥迪遜賽」都有緣睇到。當然，Edward 並唔了解單車比賽，當中抽述的同現賽比賽係咪咁寫實？筆者無從探究得到（只係覺得係咪咁容易有意外？好似每場比賽都好驚險咁……），但至少能令完全零認識，只係識得岩士唐一位車手的筆者，都能夠投入到電影入面的單車世界中，已經算係好成功了。
拍攝超認真唔單靠 CG
以往去到咁刺激的場面，好多電影都會係拍攝中借助 CG，一來可以更有效保護參演演員，二來亦較容易控制出來的效果。而今次林超賢拍攝《破風》，就明顯用了極多實景拍攝，而且筆者好奇留至見到「劇終」先離場，至從拍攝幕後花絮睇到林導拍攝此電影之認真：唔止所有角色親身上陣唔用替身，而且無論係閒角定係彭于晏、崔始源等主角，都有係拍攝前進行單車特訓，拍攝過程亦跌到損手爛腳。另外各項單車賽事，都動用了唔少來自中國、香港、台灣等地的真正單車手，就連世界著名單車手 Rui Costa 都請得出鏡！單係呢種認真態度，已值得令大家付出金錢入場支持。
愛情、友情點綴恰到好處
港產片無論拍攝任何題材，一向都會用友情、愛情吸引觀眾，而今次的《破風》，亦有呢種元素，不過明顯唔係主軸，無論係彭于晏、竇曉、王珞丹之間的愛情；彭于晏、竇曉之間的友情；彭于晏、崔始源之間先係隊友、後變對手，但彼此惺惺相惜的友情，都令大家感受到絲絲暖意。劇中都有唔少笑位，就好似：竇曉著住老西去平民餐館同彭宇晏、王珞丹食飯，都令人睇到引唔住笑出來。但呢啲元素，都係點到即止，未有搶走主軸：單車比賽、追夢、永不放棄呢啲題材的鋒芒，Edward 不得不大讚林導的功力。
總結：要睇就快啦！
整體來講，《破風》作為一套以單車為主題的運動電影，既不沉悶，又可以令大家對呢項世界著名的運動有更深認識。而且有玩開單車的觀眾會睇得津津有味，就算無接觸開的都無損觀感同趣味，呢種手法確實令 Edward 留下深刻印象。此外，林導同埋眾演員係此電影中的認真態度，以及不同比賽場景的壯麗美景，都令 Edward 有種好似係電視度睇緊真正的單車比賽的感覺。總括來講，《破風》Edward 覺得比起以往任何一套運動「港產片」，包括《少林足球》都要成功，至少唔洗單靠搞笑，都令觀眾睇到入哂神，單係呢一點，都已經值得大家入場支持了！不過在此 Edward 都要同大家道歉，因為之前工作太繁忙，所以去到昨晚先有時間入場欣賞並撰寫此觀後感。如果大家仍未睇，就要快啦，因為真係唔知仲有幾耐就會落畫……
分享到 :
最新影片
