之前我依莉詩都同大家分享過幾個脫毛方案 ，為咗脫走身上嘅毛毛，基本上大部份嘅方法都試過，唯獨是彩光脫毛遲遲未敢試，因為彩光比較難控制，容易灼傷皮膚。不過隨住技術進步，彩光脫毛機亦漸漸可以帶番屋企，變得更安全。而我今次就借咗 Panasonic 無線彩光脫毛機 (ES-WH80) 嚟試下，睇下又有無激光脫毛咁痛先。
無線設計+連續閃光，方便就手
呢部脫毛機比起上一代 Lumea IPL 彩光脫毛機細同輕，只有 335g ，而且喺無線設計，充一次電可發出 600次閃光，唔怕用嘅時候會有線阻住，就算脫腋下同比基尼線位置都好方便。另外，按壓式閃光機頭設計同連續閃光都可以令脫毛短間縮短。只要將機頭貼喺皮膚輕輕壓下，並垂直拖放，每隔 3秒就會發出閃光，最多連續閃光 10次，唔洗每下都拎番起再禁制，減少對位時間之餘，仲唔怕打漏某幾條毛。
▲ 充電後能發放 600次閃光，夠做幾次全身療程。
▲ 個按鈕喺機頭度，貼緊皮膚輕壓就會發出閃光，唔洗額外禁制。
燈頭範圍唔太大，燈盒壽命短
呢部脫毛機雖然幾方便，不過燈頭只有 3 x 1 cm ，即每次照射範圍 3.6 x 1.5 cm (以濾光窗面積計算)，唔算特別大。換言之每一下打嘅面積得一個手指位左右，一隻手臂就差唔多要打 50 下，而且燈盒壽命較短只能發出 20000次閃光，比起 Lumea IPL 彩光脫毛機嘅燈盒可閃 >140.000 次少，如果按建議頻率同時間使用，大約兩年半就要換燈頭。
▲ 佢只有一個 3 x 1 cm 燈頭，用嚟脫面毛又會太大，所以唔建議用嚟做面部脫毛。
▲ 燈盒壽命較短只能發出 20000次閃光，脫晒手腳的話，大約兩年半就要換燈頭。
相關文章:
Panasonic 開發「AI 版創辦人」 向現在的員工傳承企業理念
5段光能設定，但可脫毛部位少
脫毛機可以設定 5段光能，適合唔同肌膚需要，不過佢只有一個燈唔大唔細嘅燈頭，所以可脫毛部位比較少，只能脫腋下、手臂、小腿、比堅尼線，唔可以好似 Flash & Go LUXX 宅光脫毛機咁，脫埋上唇、臉頰、鬢角、大腿同腹部。另外，佢只可以壓止毛髮生長，一定要定時定候做，即小腿/手臂首2個月每2星期使用一次，期後每 4星期一次；腋下/比堅尼線首2個月每星期一次，期後每2星期一次，如果停止使用，毛髮會再次生長。唔似 Flash & Go LUXX 宅光脫毛機聲稱接受一年半到兩年療程後，能達到接近永久脫毛效果。
▲ 脫毛機可以設定 5段光能，適合唔同肌膚需要。
依莉詩：「無宅光機咁痛！」
呢部無線脫毛機用落就幾方便，壓落可以打，係皮膚表面慢慢拉仲可以連續打幾次，唔洗下下再對位，可以打得均勻 D。至於感覺，呢部機反而無宅光同激光咁痛，就算最高強度都只喺有少少痛同熱。奇怪嘅喺我宅光同激光都試過，打完都唔會紅，但唔知點解，用呢部就會打到紅晒，好似敏感咁好痕，不過好彩第二日就無事啦。另外，佢燈盒用得 20000次，而且講明唔可以永久脫毛就有 D 令人卻步，始終幾千蚊買部光學脫毛機都喺想斷尾，如果要每 2星期用剃刀剃完再用彩光脫毛，咁只喺延長咗脫毛時間。
▲ 因為我對手試得太多脫毛方法，搞到有 D 位有毛有 D 位無毛，所以搵咗個朋友示範俾大家睇。脫毛之前記得要先用剃刀剃走 D 毛，唔喺就會好似我朋友咁，痛之餘仲打到條毛燶咗，一陣味。
▲ 要先將要脫毛部份用剃刀除去毛髮，之後先用彩光機脫毛。
▲ 朋友話用彩光脫毛，毛毛的確生得慢咗，而且唔覺得痛。
售價: HK$ 2,680
查詢：Panasonic（2833 0855）
相關文章:
Panasonic 開發「AI 版創辦人」 向現在的員工傳承企業理念
分享到 :
最新影片
